Read Punu Dutalu 36 Bible Online

Dutalu 36 - Punu bible

Dutalu 36

¹Bivunda bimikuta miGalaad, baana bababaala baMakir na baana bababaala baManasse va gari mikuta mibaana bababaala baJoseph bamarasuna Moise na baana babakaga na bivunda bimikuta miIsrael.

²Bamavosa rie: Ndeʼ Moise Fumu amaguruma ugabila baIsrael disiala na mbanda. Gumadila musuga uFumu uvega disiala diSelofad muana taji etu ombu baana bandi babagetu.

³Pa bamawelana na yifumba yisusu yiIsrael, disiala diogu diupatulu mu disiala dibataji betu na diubuesu o yifumba ayi jogu boba; dionyi diurombisa disiala dietu adi tumagabulu na mbanda usiegalana.

⁴Ava yilima yidujegusu na yiduyitsu yibaIsrael yiutolila disiala diogu diubuesu o yifumba ayi jogu boba, dionyi diugusulu mu yifumba yibataji betu.

⁵Moise amatolisa maruma maFumu ombu baIsrael. Amavosa rie: Yifumba yibaana bababaala baJoseph yivu na ndunga.

⁶Guluanu adi Fumu erumi mu diambu dibaana babagetu baSelofad rie: Bana musuga uwelana nana berondili tumba vengu mu mikuta mu yifumba yibataji bogu.

⁷Vagaa ne disiala dimosi dibaIsrael adiuvegu o yifumba yimosi nomuevegu o yifumba yisusu; baIsrael bokipa yifumba yifumba disiala dibataji bandi.

⁸Muana mugetu uotsu aguba na disiala mu yifumba yibaIsrael owelana mu muisi yifumba yitaji andi yiri yifumba yifumba yibaIsrael yiubialila disiala ditaji andi.

⁹Vagaa ne disiala dimosi adiuvegu o yifumba yimosi nomuevegu o yifumba yisusu tumba yifumba yibaIsrael bokipa yifumba yifumba disiala dibataji bandi.

¹⁰Baana babagetu baSelofad bamadedila diruma adi Fumu amaruma Moise.

¹¹Mala na Tirsa na Hogla na Milka na Noa, botsu bana baana babagetu baSelofad bamawelana na baana bababaala babakatsi bogu;

¹²bamawelana mu mikuta mibaana bababaala baManasse, muana dibaala uJoseph, na disiala diogu dimasiala mu yifumba yimukuta utaji ogu.

¹³Amana la maruma na migaga abi Fumu amavega Moise uvega baIsrael o kumu tsiMoab va disimu diJourdain va nsungisini na Jericho.