Read Punu Dutalu 4 Bible Online

Dutalu 4 - Punu bible

Dutalu 4

²Talanu baana bababaala baQuehat abavu mu dutalu dubisi Levi muna mikuta miogu na muna mandagu mabataji bogu,

³ubanda na abakavu na magumarieru mabilima te na magumaranu, botsu abavu bawelimina usala bisalu bimosi o Ndagu Yibenguna.

⁴Bisalu abi baana bababaala baQuehat bosalanga o Ndagu Yibenguna biuba bibima bitindi Yingitsi.

⁵Ava baIsrael bosoyiminanga Aaron na baana bandi bababaala boyefuriga dumbu na bokubiga yigara yipangini;

⁶bosunsa mfunga jimikata mibindombu amimabensu va julu yionyi mbana bowala tsanda jidumbulu va julu; mbana bokotisa manguangu mayigara yipangini.

⁷Bowala tsanda jidumbulu va julu tavula jimapa madurangumunu mbana bosunsa yipela va julu na bakopa na tasi na mambuta mapagu jiunu; mapa mapagu mobanganga vana.

⁸Bogumba tsanda jibenga va julu bima bieni biotsu na bobipieta mfunga jimikata mibindombu amamabensu; mbana bosoma manguangu matavula.

⁹Bobonga tsanda jidumbulu aji bokubiga dingasa na balambi badionyi na bitsimusulu bidionyi na bisunsulu bimabufu bidionyi na birura biotsu bimatsi bidionyi abimavegu mu yisalu yidionyi;

¹⁰bodisunsa na bisalulu biotsu bidionyi o gari mfunga jimikata mibindombu amimabensu mbana bodisunsa na biotsu bidionyi va yikakala.

¹¹Bowala tsanda jidumbulu va julu yinyensulu yipagu yilora na boyipieta mfunga jimikata mibindombu amimabensu; mbana bokotisa manguangu mayinyensulu yipagu.

¹²Bogukiga bisalulu biotsu abi besalili o Mbura Nsambi na bobisunsa va matsanda madumbulu na bobipieta va mfunga jimikata mibindombu amimabensu mbana bobisunsa va yikakala.

¹³Bogusula mabufu mayinyensulu yipagu yisusu na bowala tsanda jiyinyuru ayivu va gari dumbulu na ubenga va julu yinyensulu yipagu;

¹⁴bosunsa bisalulu biotsu abimasalulu mu yisalu yieni va julu; bisunsulu bimuji na misomu na bipela na bansienga na bisalulu biotsu biyinyensulu yipagu mbana bowala mfunga jimikata mibindombu amimabensu va julu nosoma manguangu mayinyensulu yipagu.

¹⁵Ava Aaron na baana bandi bababaala bomanina ukubiga Mbura Nsambi na bisalulu biotsu biMbura Nsambi mbana baana bababaala baQuehat boruga ava bogusuyila va milaku uyebinangula; tumba bagobemba tindi bima biyingitsi yiri bakefu. Abina la bisalu bibaana bababaala baQuehat abamaba banangulitsi babima biMbura Nsambi.

¹⁶Elazar muana dibaala uAaron muvagulitsi upagu okelisanga matsi madingasa na muyombu aguivandumuyi mbunga na pagu jitsangu na matsi madubiatsu; jandi okelisanga Ndagu Yibenguna jiotsu na biotsu abivu muna na Mbura Nsambi na bisalulu biotsu bijionyi.

¹⁷Fumu amatsingula Moise na Aaron rie:

¹⁸Kebananu tindi ukebana yiri bisi mikuta miQuehat bagogusulu mu dutalu dubisi Levi.

¹⁹Anana dubakelisila yiri bagofu ava bobambinina na Mbura Ajivu Tindi Yingitsi: ndeʼ Aaron na baana bagu bababaala duvega baana bababaala baQuehat mutu mutu yisalu yiandi na ayi onangula.

²⁰Bayakota uyegengila nesi ugengila ava dupietili bima biyingitsi yiri bakefu.

²¹Fumu amaruma Moise rie:

²²Tala baana bababaala baGuerchon muna bifumba bibataji bogu na muna mikuta miogu.

²³Gukasansama botsu abakavu na magumarieru mabilima te na magumaranu mabilima, abavu bawelimina usala yisalu o Ndagu Yibenguna.

²⁴Bisalu abi mikuta mibaana bababaala baGuerchon bosalanga na abi bonangulanga abibi:

²⁵bonangula matogu maNdagu Nsambi na maNdagu Yibenguna na mfunga jitsionyi na mfunga jimikata mibindombu amimabensu ajikubugu va julu na tsanda ajivu va dikotulu diNdagu Yibenguna;

²⁶na matsanda madulombili na tsanda jidikotulu didulombili na amamatsiengila Ndagu Yibenguna na yinyensulu yipagu na mikudu amimasalusu na bisalulu biotsu. Bobeganga biotsu bina.

²⁷Baana bababaala baGuerchon bosalanga bisalu biogu biotsu o tsi durumu duAaron na baana bandi bababaala: abi bonangulanga nesi abi bosalanga biubawakusu nogu.

²⁸Abina la bisalu abi baana bababaala baGuerchon bosalanga o Ndagu Yibenguna. Bosalanga bisalu biogu o tsi durumu dultamar muana dibaala uAaron muvagulitsi upagu.

²⁹Gukasansama baana bababaala baMerari muna mikuta miogu na muna mandagu mabataji bogu;

³⁰gukabasansama ubanda na abakavu na magumarieru mabilima te na magumaranu mabilima; abavu bawelimina usala o Ndagu Yibenguna.

³¹Guluanu bima abi jogu bokelisanga na abi bonangulanga udugusu yisalu yiogu o Ndagu Yibenguna: tsimbi tsiNdagu Yibenguna na baweleti na makutu na mabandu majionyi;

³²na makutu madulombili na mabandu mamakutu mageyi majionyi na mikudu mijionyi na bisalulu biotsu abivu muna na biotsu abimasalulu usala yisalu yieni. Bavagulitsi bapagu bovega mutu mutu abi okelisa nonangula.

³³Abina la bisalu bibaana bababaala baMerari abi bosalanga o Ndagu Yibenguna o tsi durumu dultamar muana dibaala uAaron muvagulitsi upagu.

³⁴Moise na Aaron na baana babakaga badibuli diIsrael bamasansama baana bababaala baQuehat muna mikuta miogu na muna mandagu mabataji bogu;

³⁵ubanda na jogu abakavu na magumarieru mabilima te na magumaranu mabilima; abavu bawelimina usala bisalu bimosi o Ndagu Yibenguna.

³⁶Abamasansumu muna mikuta miogu, dutalu duogu dumaba tosini beji na yisambuali yikama na magumaranu mababaala.

³⁷Aduna la dutalu dumikuta mibaana bababaala baQuehat abamasansumu; botsu abamasalanga bisalu o Ndagu Yibenguna; Moise na Aaron bamabasansama na musuga agu Fumu amavega Moise.

³⁸Baana bababaala baGuerchon bamasansumu muna mikuta na muna mandagu mabataji bogu,

³⁹ubanda na abakavu na magumarieru mabilima te na magumaranu mabilima; botsu abavu bawelimina usala bisalu bimosi o Ndagu Yibenguna,

⁴⁰jogu abamasansumu muna mikuta miogu na muna mandagu mabataji bogu, dutalu duogu dumaba tosini beji na kama yisiamunu na magumarieru mababaala.

⁴¹Aduna la dutalu dumikuta mibaana bababaala baGuerchon abamasansumu, botsu abamasalanga bisalu o Ndagu Yibenguna: Moise na Aaron bamabasansama na musuga agu Fumu amavega Moise.

⁴²Dutalu dumikuta mibaana bababaala baMerari abamasansumu muna mikuta miogu na muna mandagu mabataji bogu,

⁴³ubanda na abakavu na magumarieru mabilima te na magumaranu mabilima, botsu abavu bawelimina usala bisalu bimosi o Ndagu Yibenguna,

⁴⁴jogu abamasansumu muna mikuta miogu, dutalu duogu dumaba tosini yirieru na kama beji tsibabaala.

⁴⁵Aduna la dutalu dumikuta mibaana bababaala baMerari abamasansumu; Moise na Aaron bamabasansama na musuga agu Fumu amavega Moise.

⁴⁶Bisi Levi botsu baMoise na Aaron na baana babakaga baIsrael bamasansama muna mikuta miogu na muna mandagu mabataji bogu,

⁴⁷ubanda na abakavu na magumarieru mabilima te na magumaranu mabilima, botsu abavu bawelimina usala bisalu bimosi noba banangulitsi babima biNdagu Yibenguna,

⁴⁸botsu abamasansumu, dutalu duogu dumaba yinana yitosini na kama yiranu na magumidunana mababaala.

⁴⁹Bamabasansama na musuga agu Fumu amavega Moise na bamavega mutu mutu yisalu ayi osalanga na ayi onangulanga; kabogu anana bamavayila na musuga agu Fumu amavega Moise.