Read Punu Dutalu 7 Bible Online

Dutalu 7 - Punu bible

Dutalu 7

¹Ava Moise amamanina urangiga Mbura Nsambi amajisinga matsi na amajiliomisa va mosi na bisalulu biotsu abimaba muna; amavaga munongu mosi na yinyensulu yipagu na biotsu abimaba muna.

²Mbana baana babasefu baIsrael na bivunda bimandagu mabataji bogu bamaruga na pagu tsiogu; jogu bamaba baana babasefu babifumba abimaruma ava bamasansumunu.

³Bamabega pagu tsiogu ombu Fumu: makalu masiamunu amamadibugu na miansa na yigumi na ngombi beji; baana babeji bamabega dikalu dimosi na kadi muana kaga amavega ngombi andi; bamabitolisa te na va gusu Mbura Nsambi.

⁴Mbana Fumu amaruma Moise rie:

⁵Bonga makalu na bangombi beni yiri biusalulu mu bisalu biNdagu Yibenguna; gukabivega ombu bisi Levi, mutu mutu dedi na yisalu yiandi.

⁶Moise amabonga makalu na bangombi na amabiwakisa ombu bisi Levi.

⁷Amavega baana bababaala baGuerchon makalu mabeji na bangombi bana usala bisalu abimabavegu.

⁸Amavega baana bababaala baMerari makalu mana na yinana yibangombi usala bisalu abimabavegu abimarumungu na Itamar muana dibaala uAaron agumaba muvagulitsi upagu.

⁹Tumba asamavega makalu vo bangombi ombu baana bababaala baQuehat mu mbari bisalu biogu bimaba unangula bima biyingitsi va masambaka.

¹⁰Basefu bamawakisa pagu tsiogu muna yilumbu ayi yinyensulu yipagu yimawakusulu nosingu matsi; basefu bamatolisa pagu tsiogu te na va gusu yinyensulu yipagu.

¹¹Fumu amatsingula Moise rie: Basefu boruganga umoʼ umosi na mutu mutu yilumbu yiandi uyewakisa pagu tsiduwakusulu duyinyensulu yipagu.

¹²Agumawakisa pagu tsiandi yilumbu yitega la Nachon, muana dibaala uAmminadab mu yifumba yiJuda.

¹³Amavagula yipela yilora jivema; utsira uyionyi umaba kilu mosi na kama yirieru tsigarama; na nsienga jilora jivema; utsira ujionyi umaba yisambuali yikama tsigarama; bima biotsu bimawetsugu na mbongu tsiMbura Nsambi. Biotsu bibeji bimabasu na fufu atsimasobunu na matsi atsimaba pagu jitsangu.

¹⁴Na dimoyi dilora: utsira udionyi umaba kama garama adimabasu na miyombu.

¹⁵Na mulumi ngombi na mulumi yindombu na yindombu ayikavu yilima yimosi, abimaba pagu jiunyensa;

¹⁶na mulumi yinsabi agumaba pagu jiutsindula dibumi;

¹⁷na bangombi babeji na balumi baranu babindombu na balumi baranu babinsabi na baana babindombu baranu abakavu yilima yimosi; abimaba pagu jikabusulu tsimaboti. Atsina tsimaba pagu tsiNachon muana dibaala uAmminadab.

¹⁸Yilumbu ayimubeji, Netaneel muana dibaala uSouar mu yifumba yiIssakar amawakisa pagu andi.

¹⁹Amavagula yipela yilora jivema; utsira uyionyi umaba kilu mosi na kama yirieru tsigarama na nsienga jilora jivema; utsira ujionyi umaba yisambuali yikama tsigarama, bima biotsu bimawetsugu na mbongu tsiMbura Nsambi. Biotsu bibeji bimabasu na fufu atsimasobunu na matsi atsimaba pagu jitsangu.

²⁰Na dimoyi dilora; utsira udionyi umaba kama garama, adimabasu na miyombu.

²¹Na mulumi ngombi na mulumi yindombu na yindombu ayikavu yilima yimosi, abimaba pagu jiunyensa;

²²na mulumi yinsabi agumaba pagu jiutsindula dibumi;

²³na bangombi babeji na balumi baranu babindombu na balumi baranu babinsabi na baana babindombu baranu abakavu yilima yimosi, abimaba pagu jikabusulu tsimaboti. Atsina tsimaba pagu tsiNetaneel muana dibaala uSouar.

²⁴Yilumbu ayimurieru, Eliab muana dibaala uHelon, mu yifumba yiZabulon.

²⁵Amavagula yipela yilora jivema; utsira uyionyi umaba kilu mosi na kama yirieru tsigarama na nsienga jilora jivema; utsira ujionyi umaba yisambuali yikama tsigarama, bima biotsu bimawetsugu na mbongu tsiMbura Nsambi. Biotsu bibeji bimabasu na fufu atsimasobunu na matsi atsimaba pagu jitsangu;

²⁶na dimoyi dilora; utsira udionyi umaba kama garama adimabasu na miyombu.

²⁷Na mulumi ngombi na mulumi yindombu na yindombu ayikavu yilima yimosi, abimaba pagu jiunyensa;

²⁸na mulumi yinsabi agumaba pagu jiutsindula dibumi;

²⁹na bangombi babeji na balumi baranu babindombu na balumi baranu babinsabi na baana babindombu baranu abakavu yilima yimosi, abimaba pagu jikabusulu tsimaboti. Atsina tsimaba pagu tsiEliab muana dibaala uHelon.

³⁰Yilumbu ayimuina, Elissour muana dibaala uChedeour, mu yifumba yiRuben.

³¹Amavagula yipela yilora jivema; utsira uyionyi umaba kilu mosi na kama yirieru tsigarama na nsienga jilora jivema; utsira ujionyi umaba yisambuali yikama tsigarama, bima biotsu bimawetsugu na mbongu tsiMbura Nsambi. Biotsu bibeji bimabasu na fufu atsimasobunu na matsi atsimaba pagu jitsangu;

³²na dimoyi dilora; utsira udionyi umaba kama garama adimabasu na miyombu.

³³Na mulumi ngombi na mulumi yindombu na yindombu ayikavu yilima yimosi, abimaba pagu jiunyensa;

³⁴na mulumi yinsabi agumaba pagu jiutsindula dibumi;

³⁵na bangombi babeji na balumi baranu babindombu na balumi baranu babinsabi na baana babindombu baranu abakavu yilima yimosi, abimaba pagu jikabusulu tsimaboti. Atsina tsimaba pagu tsiElissour muana dibaala uChedeour.

³⁶Yilumbu ayimuranu, Cheloumiel muana dibaala uSourichaddai, mu yifumba yiSimeon.

³⁷Amavagula yipela yilora jivema; utsira uyionyi umaba kilu mosi na kama yirieru tsigarama na nsienga jilora jivema; utsira ujionyi umaba yisambuali yikama tsigarama; bima biotsu bimawetsugu na mbongu tsiMbura Nsambi. Biotsu bibeji bimabasu na fufu atsimasobunu na matsi atsimaba pagu jitsangu;

³⁸na dimoyi dilora; utsira udionyi umaba kama garama, adimabasu na miyombu.

³⁹Na mulumi ngombi na mulumi yindombu na yindombu ayikavu yilima yimosi, abimaba pagu jiunyensa;

⁴⁰na mulumi yinsabi agumaba pagu jiutsindula dibumi;

⁴¹na bangombi babeji na balumi baranu abakavu yilima yimosi, abimaba pagu jikabusulu tsimaboti. Atsina tsimaba pagu tsiChelumiel muana dibaala uSourichaddai.

⁴²Yilumbu ayimusiamunu, Eliassaf muana dibaala uDeouel mu yifumba yiGad.

⁴³Amavagula yipela yilora jivema; utsira uyionyi umaba kilu mosi na kama yirieru tsigarama na nsienga jilora jivema; utsira ujionyi umaba yisambuali yikama tsigarama; bima biotsu bimawetsugu na mbongu tsiMbura Nsambi. Biotsu bibeji bimabasu na fufu atsimasobunu na matsi atsimaba pagu jitsangu;

⁴⁴na dimoyi dilora; utsira udionyi umaba kama garama adimabasu na miyombu.

⁴⁵Na mulumi ngombi na mulumi yindombu na yindombu ayikavu yilima yimosi, abimaba pagu jiunyensa;

⁴⁶na mulumi yinsabi agumaba pagu jiutsindula dibumi;

⁴⁷na bangombi babeji na balumi baranu babindombu na balumi baranu babinsabi na baana babindombu baranu abakavu yilima yimosi, abimaba pagu jikabusulu tsimaboti. Atsina tsimaba pagu tsiElissaf muana dibaala uDeouel.

⁴⁸Yilumbu ayimusambuali, Elichama muana dibaala uAmmihoud mu yifumba yiEfraim.

⁴⁹Amavagula yipela yilora jivema; utsira uyionyi umaba kilu mosi na kama yirieru tsigarama na nsienga jilora jivema; utsira ujionyi umaba yisambuali tsikama tsigarama; bima biotsu bimawetsugu na mbongu tsiMbura Nsambi. Biotsu bibeji bimabasu na fufu atsimasobunu na matsi atsimaba pagu jitsangu;

⁵⁰na dimoyi dilora; utsira udionyi umaba kama garama adimabasu na miyombu.

⁵¹Na mulumi ngombi na mulumi yindombu na yindombu ayikavu yilima yimosi, abimaba pagu jiunyensa;

⁵²na mulumi yinsabi agumaba pagu jiutsindula dibumi;

⁵³na bangombi babeji na balumi baranu babindombu na balumi baranu babinsabi na baana babindombu baranu abakavu yilima yimosi, abimaba pagu jikabusulu tsimaboti. Atsina tsimaba pagu tsiElichama, muana dibaala uAmmihoud.

⁵⁴Yilumbu yimunana, Gamliel muana dibaala uPedassour mu yifumba yiManasse.

⁵⁵Amavagula yipela yilora jivema; utsira uyionyi umaba kilu mosi na kama yirieru tsigarama na nsienga jilora jivema; utsira ujionyi umaba yisambuali yikama tsigarama, bima biotsu bimawetsugu na mbongu tsiMbura Nsambi. Biotsu bibeji bimabasu na fufu atsimasobunu na matsi atsimaba pagu jitsangu;

⁵⁶na dimoyi dilora; utsira udionyi umaba kama garama, adimabasu na miyombu.

⁵⁷Na mulumi ngombi na mulumi yindombu na yindombu ayikavu yilima yimosi, abimaba pagu jiunyensa;

⁵⁸na mulumi yinsabi agumaba pagu jiutsindula dibumi;

⁵⁹na bangombi babeji na balumi baranu babindombu na balumi baranu babinsabi na baana babindombu baranu abakavu yilima yimosi, abimaba pagu jikabusulu tsimaboti. Atsina tsimaba pagu tsiGamliel muana dibaala uPedassour.

⁶⁰Yilumbu ayimufu, Abidan muana dibaala uGuidoni mu yifumba yiBenjamin.

⁶¹Amavagula yipela yilora jivema; utsira uyionyi umaba kilu mosi na kama yirieru tsigarama na nsienga jilora jivema; utsira ujionyi umaba yisambuali yikama tsigarama; bima biotsu bimawetsugu na mbongu tsiMbura Nsambi. Biotsu bibeji bimabasu na fufu atsimasobunu na matsi atsimaba pagu jitsangu;

⁶²na dimoyi dilora; utsira udionyi umaba kama garama, adimabasu na miyombu.

⁶³Na mulumi ngombi na mulumi yindombu na yindombu ayikavu na yilima yimosi, abimaba pagu jiunyensa;

⁶⁴na mulumi yinsabi agumaba pagu jiutsindula dibumi;

⁶⁵na bangombi babeji na balumi baranu babindombu na balumi baranu babinsabi na baana babindombu baranu abakavu yilima yimosi, abimaba pagu jikabusulu tsimaboti. Atsina tsimaba pagu tsiAbidan muana dibaala uGuidoni.

⁶⁶Yilumbu ayimugumi, Ahiezer muana dibaala uAmmichaddai mu yifumba yiDan.

⁶⁷Amavagula yipela yilora jivema; utsira uyionyi umaba kilu mosi na kama yirieru tsigarama na nsienga jilora jivema utsira ujionyi umaba yisambuali yikama tsigarama, bima biotsu bimawetsugu na mbongu tsiMbura Nsambi. Biotsu bibeji bimabasu na fufu atsimasobunu na matsi atsimaba pagu jitsangu;

⁶⁸na dimoyi dilora; utsira udionyi umaba kama garama, adimabasu na miyombu.

⁶⁹Na mulumi ngombi na mulumi yindombu ayikavu yilima yimosi, abimaba pagu jiunyensa;

⁷⁰na mulumi yinsabi agumaba pagu jiutsindula dibumi;

⁷¹na bangombi babeji na balumi baranu babindombu na balumi baranu babinsabi na baana babindombu baranu abakavu yilima yimosi, abimaba pagu jikabusulu tsimaboti. Atsina tsimaba pagu tsiAhiezer muana dibaala uAmmichaddai.

⁷²Yilumbu yiyigumi na yimosi Paguiel muana dibaala uOkran mu yifumba yiAsser.

⁷³Amavagula yipela yilora jivema; utsira uyionyi umaba kilu mosi na kama yirieru tsigarama na nsienga jilora jivema; utsira ujionyi umaba yisambuali yikama tsigarama; bima biotsu bimawetsugu na mbongu tsiMbura Nsambi. Biotsu bibeji bimabasu na fufu atsimasobunu na matsi abimaba pagu jitsangu;

⁷⁴na dimoyi dilora; utsira udionyi umaba kama garama, adimabasu na miyombu.

⁷⁵Na mulumi ngombi na mulumi yindombu na yindombu ayikavu yilima yimosi, abimaba pagu jiunyensa;

⁷⁶na mulumi yinsabi agumaba pagu jiutsindula dibumi;

⁷⁷na bangombi babeji na balumi baranu babindombu na balumi baranu babinsabi na baana babindombu baranu abakavu yilima yimosi, abimaba pagu jikabusulu tsimaboti. Atsina tsimaba pagu tsiPaguiel muana dibaala uOkran.

⁷⁸Yilumbu yimugumi na bibeji, Ahira muana dibaala uEnan mu yifumba yiNeftali.

⁷⁹Amavagula yipela yilora jivema; utsira uyionyi umaba kilu mosi na kama yirieru tsigarama na nsienga jilora jivema; utsira ujionyi umaba yisambuali yikama tsigarama; bima biotsu bimawetsugu na mbongu tsiMbura Nsambi. Biotsu bibeji bimabasu na fufu atsimasobunu na matsi abimaba pagu jitsangu;

⁸⁰na dimoyi dilora; utsira udionyi umaba kama garama, adimabasu na miyombu.

⁸¹Na mulumi ngombi na mulumi yindombu na yindombu ayikavu yilima yimosi, abimaba pagu jiunyensa;

⁸²na mulumi yinsabi agumaba pagu jiutsindula dibumi;

⁸³na bangombi babeji na balumi baranu babindombu na balumi baranu babinsabi na baana babindombu baranu abakavu yilima yimosi, abimaba pagu jikabusulu tsimaboti. Atsina tsimaba pagu tsiAhira muana dibaala uEnan.

⁸⁴Atsina tsimaba pagu tsibaana babasefti babifumba biIsrael tsiduwakusulu duyinyensulu yipagu mu yilumbu ayi bamayisingila matsi; yigumi na bipela bibeji bilora jivema, yigumi na nsienga beji tsilora jivema, yigumi na mamoyi mabeji malora;

⁸⁵utsira ukadi yipela umaba kilu mosi na kama yirieru tsigarama, utsira ukadi nsienga umaba yisambuali yikama tsigarama; kilu tsibima bieni biotsu bilora jivema tsimaba magumabeji na kilu jina; biotsu bimawetsugu na mbongu tsiMbura Nsambi.

⁸⁶Yigumi na mamoyi mabeji malora amamabasu na miyombu mamawetsugu kilu mosi na kama beji tsigarama; utsira ukadi dimoyi umaba kama garama; biotsu bimawetsugu na mbongu tsiMbura Nsambi.

⁸⁷Dutalu dibibulu abimavagulu pagu tsiunyensa adudu: yigumi na balumi babeji babangombi na yigumi na balumi babeji babindombu na yigumi na baana babeji babindombu abakavu yilima yimosi va mosi na pagu jitsangu. Na yigumi na balumi babeji babinsabi bapagu jiutsindula dibumi.

⁸⁸Dutalu dubibulu bipagu jikabusulu tsimaboti adudu: magumabeji na bangombi bana na magumasiamunu mabalumi babindombu na magumasiamunu mabalumi babinsabi na magumasiamunu mabaana babindombu abakavu yilima yimosi. Atsina tsimaba pagu tsiduwakusulu duyinyensulu yipagu yiotsu ayi bamayisingila matsi.

⁸⁹Ava Moise amakotila o Ndagu Yibenguna uyevosa na Fumu, amagulu diufi adimaruyila o julu va nsungisini jiyitsiga yiyingeba ayimaba yidibutsu yiyigara yipangini va gari bibagunu bibeji bibiansa. Amamoganga na Fumu.