Read Punu Dutalu 9 Bible Online

Dutalu 9 - Punu bible

Dutalu 9

¹Mu tsungi jitega mu yilima ayimubeji banopala o bulongu buEgypte Fumu amavosa na Moise o kumu jiSinai.

²Amavosa rie: BaIsrael bajangingi Paque vatemu ajimasolu.

³Dujijanganga mu temu ajimasolu mu yilumbu yimugumi na muina tsisiga tsiotsu; dujanganga nana migaga miotsu na maruma motsu bimadukunsulu.

⁴Moise amavosa na baIsrael rie:

⁵Mu yilumbu yidigumi na muina yitsungi jitega ava tsisiga o kumu jiSinai jogu baji Paque; baIsrael bamakelisa tindi ukebsa maruma motsu ama Fumu amaruma Moise.

⁶Vamaba babaala bamosi abamakebivisa na mfumbi, basamarugula uji Paque mu yilumbu yieni. Kabogu bamakelasa va gusu Moise na Aaron;

⁷babaala beni bamavosa na Moise rie: Jetu tumakebivisa na mfumbi. Dibandu yi tugovagulila Fumu pagu va mosi na baIsrael va temu ajimasolu?

⁸Moise amabatsingula rie: Lekelanu vengu nyujaba adi Fumu erondi uduruma.

⁹Fumu amatsingula Moise rie:

¹⁰Pa baIsrael ne bategula bogu bokebivisa na mfumbi vo pa mutu va gari ogu aji o ulinga ne nana aji Paque uyitsa Fumu.

¹¹Ne nana bojijanganga tumba mu tsungi ajimubeji muna yilumbu yidigumi na muina ava tsisiga bojanganga yindombu na mapa amagaa na dufunusu na magaji manduli.

¹²Bayasuega ne yima yimosi te na kedi na bayabula bivisi biyindombu. Bokelisanga tindi ukelisa maruma motsu maPaque.

¹³Pa jandi aguvu uwelimina agaa o ulinga, yiotsu ayi ebusili uji Paque, jandi guna ogusulu va gari batu bandi mu mbari asamavagulila Fumu pagu va temu ajimasolu, dibaala dieni owarila mukilu udibi diandi.

¹⁴Pa muenyi aguvu ombu genu oji Paque jiFumu vengu akelisi migaga na maruma biPaque. Jenu botsu duba na migaga mimosi, nesi muenyi nesi mutsiga.

¹⁵Yilumbu ayi Ndagu Nsambi jimarangugulu, dimungi dimajikubiga na dimakubiga Ndagu Yibenguna ubanda tsisiga te na kedi, ava tsisiga dimalabana nderi muji.

¹⁶Anana dimabanganga: nyangu dimungi dimakubiganga Ndagu Nsambi; mukolu dimabanganga nderi muji.

¹⁷Ava dimungi dimagusuyilanga o Ndagu Yibenguna, baIsrael bamasogamanga na bamayevaga milaku va mbura aji dionyi dimasikama.

¹⁸BaIsrael bamawendanga na musuga uFumu na bamavaganga milaku na musuga uFumu wandi; temu tsiotsu atsi dimungi dimasikama va julu Ndagu Yibenguna.

¹⁹Pa dimungi dimasikama yitsingu baIsrael bamadedila maruma maFumu na basamasogamanga.

²⁰Pa dimasikama mua bilumbu va julu Ndagu Yibenguna bamavaga milaku na musuga uFumu; bamasogama na musuga uFumu wandi.

²¹Temu tsimosi dimungi dimasikama yika mukolu mbana ava kedi dimamuewenda, kabogu jogu wogu bamasogamanga. Tumba yeri nyangu yeri mukolu yiotsu ayi dimungi dimawendilanga batu bamakumuganga va milaku na bamadidukanga.

²²Pa dimungi dimasikama va Ndagu Yibenguna mu bilumbu bibeji nesi tsungi mosi nesi yilima yimosi baIsrael bamavaganga milaku vana na basamawenda ne mbura; tumba dinowenda baIsrael bamadidukanga.

²³Bamavaganga milaku na musuga uFumu na bamasogamanga na musuga uFumu wandi; bamadedilanga diruma diFumu nana Moise amabarumina.