Read Punu Michee 1 Bible Online

Michee 1 - Punu bible

Michee 1

¹Amama la mambu ama Fumu amatsingula Michee muisi Morechet va temu jiYotam na jiAhaz na jiEzekias abamaba bakaga baJuda. Amamutsingula bulumbi buandi mu diambu dimisiengi miSamarie na miJerusalem.

²Jenu batu botsu, guluanu! Butamba ba limba na biotsu abivu muna! Fumu aguvu Fumu Nsambi ana kueru nenu, Fumu aguvu o mbura andi jiyingitsi

³Fumu amapala o mbura andi usunduga esunduyi, ulinga elingi va julu tsimikongu.

⁴Mikongu misulumuyi o tsi makulu mandi, nesi bibususu bisiengumuyi, nderi dilendi va mugula muji nesi mamba amevindimi.

⁵Bumbini bubategula baJacob na nsimbulu tsibaIsrael bimabarombisa motsu mana! Dibi yi Jacob amavaga? Tsia Samarie! Anyi amalonsa Juda uyitsa bakosi? Tsia Jerusalem?

⁶Fumu amavosa rie: nyukalusa Samarie digvki dimamanyi nesi mbura uvarila mfuga tsirayisan; nyubungasana mamanyi mamusiengi eni o yibususu na nyusila bibuga biuonyi va yijalala.

⁷Bitumba biotsu biSamarie bibubulu, futa tsiandi tsinsoruru tsiunyensu o muji na nyubunga bakosi bandi botsu abamadilu na futa tsinsoruru atsina tsiuba yisaku yibuvuyisa.

⁸La dibandu menu Michee nyulilanga na nyutatilanga, nyivula bapondu na nyuba penyi, nyugamuga migamu nderi makoju na nyubimanga nderi otarisa.

⁹Pura Samarie jivu tindi buali jimalava te no Juda jimakota te no makotulu maJerusalem te no batu bami.

¹⁰Duyadisamuna o Gat, duyalila! Na munyongu nyimagolana difufundu o Bet-l-eafra.

¹¹Bisi Chafir, vioganu na penyi na yisonyi yienu! Bisi Saanan bageweliyi upala musiengi. Belili o Bet-Essel, uisaa yisuemunu.

¹²Bisi Marot uregama bereyimi mu diambu didugobutsu duogu. Maguga ama Fumu amatinda mamakota nesi o makotulu maJerusalem.

¹³Bisi Lakich, tunganu bakabala mu makalu menu. Dumagukulila bumbini buIsrael na dumarombisa Jerusalem ufubana nenu.

¹⁴La dibandu vengu dukakinina na bisi Morechet-Gat. Mbe ka musiengi Akzib ugomuewamusa bakaga baIsrael.

¹⁵Bisi Marecha nyudubeyila Fumu jigona; bundumba bubaIsrael bunyava te no malima maAdoullam.

¹⁶Fuganu, nesi utabula nanga tsienu mu diambu dibi si Jerusalem! Kefuganu mavenda nderi mbira ajimagonyulu, mu mbari baana benu bamurima uweʼ bewendi o bukoli tindi vala nenu.