Read Punu Nahoum 1 Bible Online

Nahoum 1 - Punu bible

Nahoum 1

¹Mambu maNsambi mu diambu diNinive. Dibuku dimbigulu tsiNahoum muisi Elcoch.

²Fumu avu Nsambi diwavi, ekilisi abegayini nandi, avu abasa de na fuiri; Fumu egabusili abemuvini pila, agebatandi.

³Fumu ana pugu, avu na mangolu maneni; agotamba ukilisa. Elingi mu mungudi na mu yimbongila. Mamungi mavu nderi difufundu dimatambi mandi.

⁴Esiembi mubu na egukamusi, ekamusi mijamba miotsu; Bachan na Cannel mimagumuga nderi mambura amagaa na mamba, kembu tsiLiban tsimanengana.

⁵Mikongu mimakungusu va gusu andi, bikundubuga bimasulumuga; va gusu andi nesi butamba nesi makxigu na botsu abavu muna boregama.

⁶Anyi orungula uwarila fuiri andi? Anyi oba sikiri ava kabu andi jiulabinina? Kabu andi jivendumuyi nderi kangi, mamanyi merubiyi va gusu andi.

⁷Fumu avu muboti, avu yisuemunu mu yilumbu yimunyongu. Ejabi jogu abekevega ombu gandi,

⁸dedi mosi na mujamba agumabasa nyidu anana obungila tindi ubunga musiengi egugu nobuaga abemuvini nesi o pisama jidufu.

⁹Fundu jimunongu yi duitungili Fumu? La jandi oyibungi bavinitsi, dugomutungila fundu temu beji!

¹⁰Bavu bagukugu nderi matsiendi na bavu nengingi nana malamu. Bosielusunu nderi bisinga abimagumuga tindi ugumuga.

¹¹Ombu gagu Ninive umapalila jandi agumatungila Fumu fundu aguvu na kanu tsibi.

¹²Fumu amavosa na bisi Juda rie: Diuleba bavinitsi bana mangolu na bavu bapuela botsiemuga tindi utsiemuga. Nyimadusundusa tumba ngomuedusundusa temu ajimubeji.

¹³Nyubogula yilala yibavinitsi ayi dumanangula, nyusurula mikudu miagu.

¹⁴Gulu adi Fumu amaruma mu diambu dijenu bisi Ninive rie: Dugoba na bategula abonengulungu na diina dienu nyugusula bitumba abimavalu nesi bikunga o mandagu mabansambi benu. Nyukunsa mangila menu mu mbari nyimatopulu mabi menu.