Read Punu Nahoum 3 Bible Online

Nahoum 3 - Punu bible

Nahoum 3

¹Ka muna maguga ma musiengi ubukongu ulaba! Aguirumi na ndunsulu, aguidili busina nadikasi aguyenakindanga.

²Agu begulu nduku jimukasa nesi jimakalu madugongula nesi mikiodu mibakabala nesi jimakalu.

³Babeyitsi bamakalu bamawenda mambangu bitogulu bivu nderi bitutu, makongu mevedimi. Bapuela bapuela bamanyensu! Bamfumbi bavu lay ini! Beberuyi va julu bamfumbi!

⁴Ninive yimbembu yibuvuyisa bupuela yimaduta bapuela na kembu na mavanda. Amatsiemusa batu na buvuyisa buandi nesi malengu mandi.

⁵Fumu Mabadi amavosa rie: Nyiina, nyina kueru nagu. Nyusiela yilinga yiagu te no yinsi yiagu nyulasa bisi malongu penyi agu botsu bolaba yisonyi yiagu.

⁶Nyugunamusu nsoruru tsiotsu, nyugubivisa tindi ubivisa. Guba kwaku jibatu botsu.

⁷Botsu abogulaba bogurina vala mbana bovosa rie: Ninive umabungu! Anyi ogunyonga? Babembiyitsi bagu baka?

⁸Ndeʼ Ninive guvu uwelimina uviolila Thebes? Musiengi eni wandi umarungu va mugula mujamba agumaba nderi yivaga.

⁹Ethiopie na Egypte mamaba mangolu mandi amagorungula usuka. Bisi Pout na bisi Libye bamaba bawamusi bandi.

¹⁰Joʼ wogu bamabegu bakoli, bafudu bandi bamagesumunu muna mansila motsu. Bamabuayila basefu mbanda, barumitsi botsu bamatungu bapanga.

¹¹Ninive ndeʼ wagu guba na dilangi dimaguga, gukesuega. Guromba yisuemunu usuema bavinitsi bagu.

¹²Bivaga biagu biotsu bivu nderi mifiga yika bemikuki mibonduyi o munu ujandi oyirondi umiji.

¹³Batoyitsi bagu badivita bavu nderi bagetu; makotulu mamusiengi mesundili udibuga ukotisa bavinitsi bagu; muji usulumusa manguangu mabudilu.

¹⁴Banu dukunsama, dukandu, teganu mamba, warisanu bivaga bienu! Kotanu o yiduna, nyiganu butamba! Muerunganu furu ugoka birika.

¹⁵Avana muji udusielasana, divita diuduboka, dubungana nderi makokoku. Ne nana batu benu boba nderi dibumba dimakokoku!

¹⁶Batiyitsi benu bamuteti bavu bapuela ne uviolila bambuelili. Bavu nderi makokoku amepurumuyi mbana mamatsiemuga.

¹⁷Bivunda bienu bavu nderi makokoku, basefu benu bavu nderi makokoku mapuela amebetimi mu bivaga va temu yiotsi; ava nyangu jibalili mepurumuyi na mutu agojaba mbura aji mabetsi.

¹⁸Aa kaga ji Assyrie, barumitsi bagu betimbingi yilu yimutubu, bagora bagu bamangolu bamaboku; batu bagu bamapansiga o mikongu, mutu agebagukiyi.

¹⁹Bilongu bigatsi ubuga pura agu, pura agu jivu jidufu. Botsu abegulu diambu diagu usangilabesangili.