Read Punu Habacuc 2 Bible Online

Habacuc 2 - Punu bible

Habacuc 2

¹Nyimaba diteli va mbura ami jibuwatsi; nyimavivanga ugulu adi Fumu onsinguta nesi adi nyumuwagula mu diambu dimitatu miami.

²Fumu amansingula rie: Sona mbigulu, tsibaki mu mamanyi yiri jandi oyitsirangi orungula uranga mbangu.

³Mu mbari temu jimbigulu tsieni jimakunsu kala, uruga jiruyi, jigovivu kulini; pa jisakalabana jivivingi mu mbari jiudugusu, dingensa jiudugusu.

⁴Sona: Mutu mubi otsiemuga; tumba mutu usungama odila monyu mu diambu diyitu yiandi.

⁵Mungo dunangu agetsani sui avu nderi mungo dilangi nesi mungo durutsu; ewali munu andi nderi mbura jiabafu, dedi mosi na dufu agemani nsala. Eduti malongu motsu ombu gandi na egukiyi batu botsu wandi.

⁶Je agodesungu nesi upejungu nesi urekungu na batu botsu? Bovosanga rie: Ka muna maguga ma jandi oyigukiyi abigaa biandi olaba! Ka muna maguga ma jandi oyisombingi olaba! Te na temu yi?

⁷Basombisitsi bagu bosundila ulabana; bakuanitsi bagu bosundila ugukinda.

⁸Ndeʼ gumakinda malongu mapuela, bansialutsu botsu bogukinda; ndeʼ gumaboka batu gumafunisila bisi bulongu nesi misiengi dikasi.

⁹Ka muna maguga ma ombu jandi oyigukiyili batu bandi busina bubi nesi oyirungi ndagu jisakama yiri batu babi bagomudala!

¹⁰Gumalasa bisi ndagu agu yisonyi ava gumabokila batu bapuela bapuela, gumakevayila mabi.

¹¹Mamanyi mabivaga mogamuga na tsimbi tsiwarisi muansa tsimaviki.

¹²Ka muna maguga ma jandi oyirungi misiengi olaba, nesi oyibandi dimbu na dikasi.

¹³Guluanu Fumu Mabadi amatabula diambu, batu besalingi bisalu tumba muji yika ubisielasana, bisi malongu beketsoyisa kulini.

¹⁴Dujabu dubundumba buFumu duibasi butamba dedi mosi nana mamba mebasi mubu.

¹⁵Ka muna maguga ma gulaba ndeʼ aguinuisi mutu nagu malamu amavu nderi ndombu. Ka muna maguga ma ndeʼ gulaba ndeʼ aguimulasi yisonyi, ava elasili penyi andi.

¹⁶Gumatopulu yisonyi tsiri digoba; nu, ndeʼ beni nokelasa penyi. Kopa jikabu jiFumu ajivu va dikaka dimabaala mandi, ndeʼ beni gujinu na yisonyi yiutsiemusa bundumba buagu.

¹⁷Dikasi adimalasu bisi Liban diugabuga ombu gagu, dubungu duneni dubibulu wandi. Gumaboka batu bapuela na gumalasa dikasi o bulongu nesi o musiengi.

¹⁸Yisalu yi yitumba yiusala? Dibandu yi musalitsi opakila yitumba? Yisalu yiyitumba yikunga ayilonsi mamfurulu yiusala? Dibandu yi agumapaka yitumba oyivayila yitu? Tsia bakosi aba evali bagevosi?

¹⁹Ka muna maguga ma jandi olaba, oyivosi na kosi rie: Retsama! Oyivosi na dimanyi rie: Rambuga! Diurungula ulonsu malongi? Labati dimanamugu lora na lora jivema tumba digaa na punga.

²⁰Fumu avu o Ndagu andi jiNsambi! Batu botsu babi sui va gusu andi.