Read Punu Sophonie 1 Bible Online

Sophonie 1 - Punu bible

Sophonie 1

¹Abubu la bulumbi abu Fumu amatsingula Sophonie muana dibaala uKouchi muana dibaala uGuedalia mutegula uAmaria mundelabongu jiEzekias va temu Josias amabila kaga jiJuda.

²Fumu amavosa rie: Nyubunga biotsu abivu va butamba.

³Nyubunga batu na bibulu na batsoli na nyama tsimamba na bakosi va mosi na batu babi; nyubokisa batu botsu va butamba.

⁴Nyulasa Juda mangolu mami nesi bisi Jerusalem botsu; nyutsiemusa bansialutsu botsu baBaal nesi diina dimilonsi miandi nesi bavagulitsi bandi bapagu.

⁵Nyubunga jogu abegudimi va julu tsimiansa uyitsa bambuelili na tsungi na wisi nesi jogu abegudimi noleva pesi na diina diMilkom nsambi ogu.

⁶Nyubunga jogu abendiyili nsima nesi jogu abagetombi na abagensalili.

⁷Banu sui va gusu Nsambi aguvu Fumu! Mu mbari yilumbu yikabu jiFumu yika bebeli; Fumu amakunsa pagu, amaliomisa abandi aba amanengila.

⁸Fumu amavosa rie: Mu yilumbu yipagu nyukilisa basefu na baana bakaga, nesi jogu abeduari biduaru bingana.

⁹Muna yilumbu yieni nyukilisa botsu abelobuyi yilemondi yindagu fumu ogu nesi jogu abefunisi dikasi nesi ndunsulu.

¹⁰Fumu amavosa rie: Muna yilumbu yieni o Jerusalem migamu miugulunu va dikotulu diNyama Tsimamba, na milingi miugulunu o banda o yiari ayi wisi epalili na nduku jineni jiugulunu o julu tsibikundubuga.

¹¹Bisi Mfudu bimaganu! Mu mbari botsu abetiyi muteti bamabungu, babaala botsu abepitsi lora jivema bamaboku.

¹²Vana temu eni nyubonga Iambi nofuyi Jerusalem, nyukilisa babaala abekelasa nderi bavu sui nderi malamu amasakapupusu, dibondi divu o tsi; abevosi rie: Fumu agevayi ne diboti ne dibi.

¹³Kabogu bima biogu biukindu na mandagu mopansu; bamarungisa mandagu ama bagotsanina; bamavarisa mfuga tsirayisan na bagonu malamu matsionyi.

¹⁴Yilumbu yikabu jiFumu yika bebeli, uruga yiruyi mbangu; na ngogaga ugamuga egamuyi na munyongu.

¹⁵Yilumbu yieni yiuba yikabu, yilumbu yimaguga na yikeri, yilumbu yidubungu na yidupansu, yilumbu yipisama na pisama, yilumbu yimamungi na mamungi.

¹⁶Yilumbu ayi mumbanda ugulunu va mosi na migamu midivita o misiengi mikandu nesi o mandagu masakama.

¹⁷Fumu amavosa rie: Nyulasa babaala maguga na bowendanga nderi bidunga mu mbari bamavaga masumu va gusu ami. Malungu mogu mowitulu yiari na yiari nderi difufundu na bamfumbi bogu bagotsigu.

¹⁸Lora tsiogu tsivema na lora tsiogu bigorungula ubawaka kalala mu yilumbu yikabu jiFumu. Butamba buotsu busielusunu na muji udiwavi diandi. Osundila ubunga batu botsu.