Read Punu Matthieu 13 Bible Online

Matthieu 13 - Punu bible

Matthieu 13

¹Muna yilumbu yieni Jesus amapala o ndagu na amatsana va mugula yiliba uyelonsa batu.

²Batu bapuela bamagukama te na jandi amanangama o bota uyetsana tumba batu botsu bamasiala va disimu.

³Jandi amababuayila banongu bapuela ubalonsa. Amavosa rie: Mukukitsi amawenda ukuka tsangu tsiandi.

⁴Ava akukilanga tsangu tsimosi tsimabonduga va nsila: batsoli bamayetsidoda.

⁵Tsimosi atsimabonduga va yilala yimamanyi tsimasundila ubenda mu mbari butamba busamaba bunyega.

⁶Tumba nyangu jinobala tsimagumuga na tsimanyenga mu mbari ngansi mbe tsisakafuna.

⁷Tsimosi tsimabonduga va gari ngansi tsimatsiendi. Ngansi tsieni tsimabenda na tsimatutsa bivaru.

⁸Tsimosi tsimabonduga va butamba buboti na tsimabendisa bivaru abimabura milunda: bimosi kama kama, bisutfu magumasia-masiamunu na bisusu magumarie-marieru.

⁹Mbana Jesus amabuesa rie: Jenu adugaa madiba guluanu.

¹⁰Badukitsi bamaruga ombu Jesus na bamamuwivula rie: Dibandu yi guibuayili batu yika banongu na banongu?

¹¹Jesus amabagabusila rie: Dujabu dubimaga biDurumu duNsambi dumaduvegu, tsiri ombu basusu.

¹²Jandi ona yima obuesu na oba na bipuela bipuela; tumba jandi ogaa na yima opatulu ne ayi etasi yivu nandi.

¹³La dibandu nyibalonsili na banongu mu mbari ulaba belabi tumba bagevisi na ugulu begulu tumba bagetsiyisi.

¹⁴Kabogu adi Esaie amabiga divu dingensa rie: Jenu duigulu yika ugulu tumba dugotsiyisa; duigengili yika ugengila tumba dugolaba.

¹⁵Mirima mibatu bebaba mivu migala; jogu beni bamadibiga matuji mogu na bamatsimisa misu mogu, pa tsi nana mbe bakelaba na bakegulu na baketsiyisa nokalula diela mbana Menu Nsambi mbe nyubabelusa.

¹⁶Ka muna ubueji gu duilabi jenu aduilabi nogulu mambu memama!

¹⁷Jabanu rie: Babiyitsi bapuela na bakaga bamaronda ulaba ama duilabi tumba basamamalaba na bamaronda ugulu ama jenu duigulu tumba basamamagulu.

¹⁸Kabogu guluanu divindugulu dinongu jimukukitsi.

¹⁹Jogu abegulu mambu maDurumu duNsambi na bagematsiyisi bebagunu na tsangu atsimabonduga va nsila. Mutu mubi eruyi utsiemusa mambu mu mirima miogu.

²⁰Atsimabonduga va yilala yimamanyi tsibagunu na batu abegulu na nsangu.

²¹Mambu magekoti na jogu bagewari. Ava belabili maguga vo bokuanu mu diambu dimambu maNsambi besundili utsiemusa yitu.

²²Atsimabonduga va gari ngansi tsimatsiendi tsibagunu na batu abegulu mambu maNsambi tumba mitatu mitemu ejiji na durondu dumbongu bibadetsi mirima na bagefuningi.

²³Mbana atsimabonduga va butamba buboti tsibagunu na batu abegulu mambu maNsambi na bematsiyisi. Befuningi: bamosi kama kama na basusu magumasia-masiamunu na basusu magumarie-marieru.

²⁴Jesus amababuayila nongu jisusu rie: Durumu duNsambi duibagunu na mutu agumakuka tsangu tsiboti o nungi andi.

²⁵Mukolu mosi ava amabila yilu, mutu agumamuvina amaruga uyekuka bilonga va gari uresi na amayenawenda

²⁶Kabogu uresi umabura na bilonga bimabenda wandi.

²⁷Basalitsi bandi bamaruga ombu gandi na bamavosa rie: Tsia gumakuka tsangu tsiboti mbe? Tumba bilonga agunyi biruyisini?

²⁸Jandi amabagabusila rie: Tsiri mutu oyipini omabikuka? Basalitsi bamamuwivula rie: Tugobirubula?

²⁹Jandi amabagabusila rie: Nesi, pa duibirubuli durubula uresi wandi.

³⁰Bibi nana te na dutsonsugu. Mbana nyuruma batsonsiyitsi rie: Lerubulanu bilonga na bitungianu mu bibutu nobibuaga o muji tumba sueganu uresi mu yisuegulu yiami.

³¹Jesus amamuebabuayila nongu jisusu rie: Durumu duNsambi duibagunu na tsangu jimutarada aji mutu amavara o nungi andi;

³²diuleba jivu tsangu jigeyi uviolila tsangu tsisusu, yivaru yibendi na yineyi uviolila te na yibi yika muiri nabatsoli berungi muva muna.

³³Jesus amababuayila nongu jisusu rie: Durumu duNsambi duibagunu na dufunusu adu mugetu amasobana na bietsu birieru bifufu umatisa dituka diotsu.

³⁴Jesus amalonsanga batu yika na banongu; motsu ama amavosanga nogu amababuayilanga yika banongu na banongu.

³⁵Amadivaga udugusu adimavosu na babiyitsi rie: Nyubabuayila banongu na nyubasamunina mambu amamasuegu ubanda va disundulu dibulongu

³⁶Mbana Jesus amaganina batu na amakota o ndagu. Badukitsi bandi bamamurasuna na bamamuwivula rie: Bilonga o nungi, divindugulu yi?

³⁷Jandi amabavindiyila rie: Jandi oyikuki tsangu tsiboti la Muana Mutu;

³⁸nungi la bulongu; tsangu tsiboti tsivu baana baNsambi; bilonga bivu baana bamutu mubi;

³⁹mutu omabikuka la diabu; dutsonsugu la disukusulu dibulongu; batsonsiyitsi la biansa.

⁴⁰Kabogu nana borubulila bilonga na bobibuaga o muji anana diubila ava disukusulu dibulongu.

⁴¹Muana Mutu osindiga biansa biandi ugaanga aberombisi batii uvaga mabi na bavayitsi bamasumu botsu.

⁴²Biansa bieni biubabuaga o muji aguneni, aguna bolilanga na bonyonganga.

⁴³Tumba abededili Nsambi bolula nana wisi ava Durumu duTaji ogu dujabununu. Jandi oyigulu alubuyi.

⁴⁴Durumu duNsambi duibagunu wandi na busina abumasuegu o musiru. Mutu oyibulabi emuebusuegulila. Esumbisi biandi biotsu na nsangu yiri orungula usumba musiru eni.

⁴⁵Durumu duNsambi duibagunu wandi na musumbisitsi perala aguirombi baperala uvaga misanga miboti.

⁴⁶Ava amalabila perala ajivu jineni amawenda uyesumbisa biandi biotsu yiri orungula ujisumba.

⁴⁷Durumu duNsambi duibagunu wandi na mbusa ajimabuagu na jisikiyi banyama bamamba bamunongu na munongu.

⁴⁸Yiotsu ayi jibasi bavubitsi bejiduti va disimu; banotsana besali banyama bamamba; bepoduli ababoti mu bindika na bebuayi abagaa baboti.

⁴⁹Diuba munongu mosi va disukusulu dibulongu. Biansa biuruga uyikakasana babi na baboti

⁵⁰na biubabuaga o muji uneni, aguna bolilanga na bonyonganga.

⁵¹Jesus amasita ubawivula rie: Dutsigulu mambu meni motsu? Jogu bamamugabusila rie: Nyiina.

⁵²Jandi amabatsingula rie: La dibandu mulonsi umigaga uotsu oyikaluli diela noviva Durumu duNsambi ebagunu na mutu oyipalisi bima bigona nesi bigulu mu bungunu buandi.

⁵³Jesus anomana ubuaga banongu beni amagusuga vana.

⁵⁴Amagabuga o dimbu adi amabanguyila. Amalonsa o Ndagu Yibenguna na batu abamamugulungu bamakambulu puela. Bamatumuna paga rie: Agunyi amadilila diela dieni? Agunyi amadilila mangolu uvaga bimaga bieni?

⁵⁵Jandi tsiri muana muvalitsi? Marie tsiri nguji andi? Jacques na Joseph na Simon na Jude tsiri baana banguji bandi?

⁵⁶Bibusi biandi biotsu bigaa vava? Agunyi edilili motsu mana?

⁵⁷Kabogu bamamubusa. Jesus amavosa nogu rie: Mubiyitsi eyitsu yiari na yiari, yika batu bandi bemulensi.

⁵⁸Jandi asamavaga bimaga bipuela va mbura eni mu mbari basamamuvayila yitu.