Read Punu Matthieu 15 Bible Online

Matthieu 15 - Punu bible

Matthieu 15

¹BaJuif abamaba baPharisie na milonsi mimigaga abamarugasana o Jerusalem bamawenda ombu Jesus na bamamuwivula rie:

²Mu mbari yi badukitsi bagu bagekelisi migaga mibivunda tumba beji na makaka mamuinsi?

³Jesus amabawaka rie: Dibandu yi duilensili diruma diNsambi na duidedili malongi menu?

⁴Mu mbari Nsambi amavosa rie: Yitsa taji agu na nguji. Amabuesa rie: Jandi oguvosila taji andi na nguji mabi oboku.

⁵Tumba ombu genu duisingi yiri mutu ovosa rie: Abi mbe nyivega tata na mama, nyimabivagula pagu ombu Nsambi.

⁶Kabogu mutu eni agomuewamusa taji andi. Mu dionyi duilensi mbembu Nsambi na duisakiyi malongi menu.

⁷Baboti bamiunu! Esaie amabiga buranga mu diambu dienu ava amavosila mambu memama rie

⁸Nsambi amavosa rie: Batu bebaba bekitsi yika na miunu tumba mirima miogu mivu vala nami.

⁹Yika kulini bekitsili mu mbari bekelisi migaga miogu nderi mivu migaga miNsambi.

¹⁰Mbana Jesus amanengila batu na amabatsingula rie: Guluanu na jabanu adidi rie:

¹¹Vagaa yima ne yimosi ayiukota o munu mutu ayiurungula umubivisa tumba amemupalili amana memubivisi.

¹²Mbana badukitsi bamawenda ombu Jesus na bamavosa nandi rie: Guijabi yiri baJuif abavu baPharisie bamanyoga mu diambu diposulu tsiagu?

¹³Jesus amabawaka rie: Yivaru yiotsu ayisamavaru na Taji ami ajivu o julu, yiurubulu.

¹⁴Badundianu! Baji bidunga abiwendisi bidunga; pa yidunga ewendisi yidunga, jogu botsu babeji bagobonduga mu yiduna?

¹⁵Pierre amavosa rie: Tuvindiyili nongu eni.

¹⁶Jesus amabawaka rie: Kabogu jenu wenu dugaa na diela?

¹⁷Dugegulu? Yiotsu ayikoti o munu yiwendi o moji mbana yinyaku.

¹⁸Tumba amevosu na munu meruyili o murima, amana mebivisi mutu.

¹⁹Mu mbari motsu mebandi o murima ne matasa mabi ne bukongu ne bumbembu ne bupumbi ne udaga ne bumbeji bumfurulu ne matamba.

²⁰Amana la mambu amebivisi mutu. Tumba uji na makaka mamuinsi ugebivisi mutu.

²¹Jesus anogusuga vana amawenda o yiari yiTyr na Sidon.

²²Mugetu, muisi Cana agumatsana vana, amamurasuna. Amagamuga rie: Muana David ndasi yingeba! Muana ami umugetu enyonyusungu na yinyunyi yibi.

²³Tumba Jesus asamalemukalila ne diambu dimosi. Badukitsi bamavosa nandi rie: Kokolu tsiagu Fumu, mubingi! Jandi etuduki na nduku andi!

²⁴Jesus amawaka rie: Nyimasindugu yika ombu baIsrael abavu nderi bindombu abimatsiemuga.

²⁵Mugetu anodigulu amakutama va gusu andi novosa rie: Mulonsi, kokolu kwamusi!

²⁶Jesus amamuwagula rie: Digaa diwelimina ubonga biguji bibaana nobibuayila bamondi.

²⁷Mugetu eni amawagula rie: Nyiina Mulonsi, tumba bamondi bageji bikukuku abilagumuyi va tavula tsibafumu bogu?

²⁸Mbana Jesus amavosa nandi rie: Mugetu, yitu yiagu yivu yineni! Adi guirondi diguvagulu. Muna diweru dieni muana andi amabeluga.

²⁹Jesus amagusuga va mbura tsieni na amawenda o yiari yiyiliba yiGalilee. Anomata va julu mukongu amatsana.

³⁰Mbana yinombu yineni yimawenda ombu gandi: na bitsondu na bidunga na mababa na bibomfi na bibedu bisusu bipuela abi bamasunsa va gusu Jesus na jandi amabibelusa.

³¹Batu bamakambulu ulaba yiri mababa makavosa, bibomfi bimabeluga, bitsondu bisamamuetsonduga, bidunga bimatiemuna; botsu bamadodisa Nsambi Israel.

³²Jesus amanengila badukitsi bandi na amavosa rie: Nyilabi batu bebaba yingeba mu mbari baka bilumbu birieru nami na besaa na biguji. Ngerondi ubaganina na nsala mbe bovola nyuru mu nsila.

³³Badukitsi bamamuwivula rie: Turungula ubadilila biguji vava o kumu ejiji?

³⁴Jesus amabawivula rie: Mapa kwe mavu nenu? Jogu bamamugabusila rie: Yisambuali na mua nyama tsimamba tsigeyi.

³⁵Mbana jandi amatsanisa batu

³⁶na amabonga yisambuali yieni yimapa na nyama tsimamba, anomana ugabusila Nsambi diboti amamabukula na amamavega badukitsi na jogu bamagabila batu.

³⁷Botsu bamaji na bamagukuru. Badukitsi bamabola yisambuali yiponsi tsibibuku abimasialulu.

³⁸Jogu abamaji bamaba tosini jina tsibabaala tsiri utala bagetu na baana.

³⁹Mbana amabaganina na amanangama mu bota uwenda o yiari yiMagadan.