Read Punu Matthieu 16 Bible Online

Matthieu 16 - Punu bible

Matthieu 16

¹BaJuif ne baPharisie ne baSadducee bamawenda ombu Jesus uyemutsundisa. Mumuweliga bamamuwivula ubalasa yilimba ujaba yeri Nsambi aji nandi.

²Jesus amabagabusila rie: Jenu beni duivosi rie: Kedi jiuba jiboti mu mbari tsisiga julu jivu jibenga riri.

³Mbana kedi duivosi rie: Mfula jiunoga mu mbari julu jivu fubiri. Pa duirunguli ugengila julu nojaba adiuba kabogu dibandu yi dugorungulila ujaba adivu netu temu ejiji?

⁴Ka muna dibi di di vu na batu batemu ejiji! Duikeli yilimba tumba dugolaba yilimba yisusu yika ayi Jonas. Mbana amabaganina na amayenawenda.

⁵Ava badukitsi bamavioyila o disimu dimosi diyiliba bamalibana ubega mapa.

⁶Jesus amabalubusa rie: Kebananu mu diambu didufunusu dubaJuif ne baPharisie ne baSadducee.

⁷Badukitsi bamatsundanga joʼ benina joʼ beni rie: Dibandu yi evosili nana? Mu mbari tugaa na mapa?

⁸Jesus amajaba adi bevosi kabogu amabawivula rie: Dibandu yi duitasili diambu dimapa? Ka yitu ugeyi yi yivu nenu!

⁹Dugegulu? Dugerangimini ava nyimabukulila mapa maranu ama tosini yiranu tsibabaala bamaji? Durtiabola ponsi kwe tsibibuku abimasialulu?

¹⁰Ava nyimabukulila yisambuali yimapa ulisila tosini jina tsibabaala dumabola ponsi kwe tsibibuku abimasialulu?

¹¹Dibandu yi dugaagulu yiri ngaavosa diambu dimapa? Kebananu mu diambu didufunusu dubaJuif ne baPharisie ne baSadducee.

¹²Mbana badukitsi bamatsiyisa yiri asamabalubusa mu diambu didufunusu dumapa tumba amabalubusa mu diambu dimalongi mabaPharisie na baSadducee.

¹³Jesus amawenda na badukitsi bandi o dimbu diCesaree jiPhilippe. Amawivula badukitsi bandi rie: Yi batu bevosi mu diambu diMuana Mutu?

¹⁴Jogu bamamugabusila rie: Bamosi bevosi yiri guji Jean Baptiste. Basusu yiri guji Elie, bamosi bevosi yiri guji Jeremie vo mubiyitsi ususu.

¹⁵Jandi amabawivula rie: Tumba jenu yi duitasi?

¹⁶Simon Pierre amamugabusila rie: Guji Christ, Muana Nsambi ajivu monyu.

¹⁷Jesus amamuwaka rie: Simon muana Jean, ka muna nsangu ji jivu nagu! Gusamalonsu na mutu uvosa dionyi tumba Taji ami ajivu o julu amagulonsa.

¹⁸Kabogu nyigutsinguli rie: Pierre guji nderi dimanyi na va julu dionyi nyurunga dibundu diami. Ne dufu dugorungula uviolila dibundu diami.

¹⁹Nyuguvega tsafi tsijulu: adi gugandisa vava tsi diugandusu o julu wandi; adi guisigi vava tsi diusingu o julu wandi.

²⁰Mbana Jesus amalubusa badukitsi bandi rie: Duyatsingula batu rie: Nyiji Christ.

²¹Ubongila va temu eni Jesus amabanda ulonsa badukitsi bandi rie: Vengu nyuwenda o Jerusalem, aguna bivunda na bavagulitsi bapagu na milonsi mimigaga bondasa maguga. Va julu vana nyuboku na nyurambuga o dufu mu yilumbu yimurieru.

²²Mbana Pierre amamubega o fundu na amamunyangila rie: Fumu, Nsambi agogaru! Digorungula uba.

²³Mbana Jesus amageluga na amavosa na Pierre rie: Ndundi Satan! Matasa magu mavu mabatu tsiri maNsambi.

²⁴Mbana Jesus amavosa na badukitsi bandi rie: Pa mutu erondi unduka vengu obusa mandi motsu nonangula kurusu andi nonduka.

²⁵Mu mbari oyirondi ukegobula otsiemuga tumba oyikevega mu diambu diami ogobulu.

²⁶Ne pa mutu odila bulongu buotsu tumba otsiemuga vo obungana, ubueji uka? Va yisalu ayiurungula ugabusa monyu?

²⁷Mu mbari Muana Mutu yika uruga eruyi na bundumba buTaji andi na bubiansa mbana ofuta botsu nana bamasalila.

²⁸Jabanu rie: Bamosi abavu vava bagolefu te na Durumu duMuana Mutu dujabunu.