Read Punu Matthieu 21 Bible Online

Matthieu 21 - Punu bible

Matthieu 21

¹Banobambana o Jerusalem mbe basakatola o Bethpage o yiari yimukongu umiOlive, Jesus amaruma badukitsi bandi babeji rie:

²Wendanu o dimbu adivu o gusu. Yika duipali durasuna yibusi yiburu yitungu na muana andi; banyangulianu na bambeyilianu.

³Pa mutu oduwivula rie: Yi duivayi? Mugabusilianu rie: Fumu ebarondi; vana vana odusingisa ubabega.

⁴Dimalabana udugusu adimavosu na babiyitsi rie:

⁵Tsingulanu bisi Sion rie: Kaga enu uruga eruyi, avu na buvolambombu; enangimi va julu buru diwendi rie: eruyi va julu muana buru.

⁶Badukitsi bamawenda na bamavaga adi Jesus amabatsingula.

⁷Banobega buru na muana andi bamamusakiga biduaru biogu mbana bamanangiga Jesus.

⁸Yinombu yineni yimayenawalanga biduaru biogu na metu muna nsila.

⁹Binombu abimawenda va gusu Jesus na abimamuduka bimayenagamuganga rie: Diboti ombu Muana David! Miula mibi ombu jandi oyiruyi mu diina diFumu! Diboti ombu Nsambi!

¹⁰Ava bamatolila o Jerusalem batu botsu bamakambulu na bamawivasana rie: Agugu la nyi?

¹¹Bamosi bamawaka rie: La mubiyitsi, Jesus muisi Nazareth o Galilee.

¹²Jesus amakota o Ndagu Nsambi na amasansa jogu abamasumbisanga na abamasumbanga muna. Amagudiga tavula tsibasansitsi bambongu na bivika bibasumbisitsi bamabembi.

¹³Mbana amabatsingula rie: Ndagu ami jiunengulungu Ndagu Dusambu. Tumba jenu dumajivaga yisuemunu yibadayitsi.

¹⁴Bidunga na bitsondu bamabambana na Jesus ava amabila o Ndagu Nsambi na amababelusa.

¹⁵Bivunda bibavagulitsi bapagu na milonsi mimigaga bamalaba mambu maboti ama jandi amavaga na bamagulu bangebi ugamuga begamuyi o Ndagu Nsambi rie: Diboti ombu Muana David!

¹⁶Kabogu jogu bamamuwivula rie: Gugegulu adi bevosi? Jesus amabagabusila rie: Nyigulu. Jenu mbe dusakaranga Bisonu abisonugu rie: Gumarombisa bangebi na baana uyenadodisanga.

¹⁷Mbana Jesus amabasila uwenda o Bethanie; amasilimina guna.

¹⁸Kedi ava amagabuyilanga amagulu nsala;

¹⁹anolabilila mumanga amawenda uyetsuna tumba amarasuna yika magaji na magaji. Kabogu amavosa na mumanga rie: Mutu agomueji mimanga miagu, via! Vana vana mumanga umagumuga.

²⁰Badukitsi bamadilaba na bamakambulu. Bamawivula Jesus rie: Dibandu yi mumanga umasundila ugumuga?

²¹Jesus amabagabusila rie: Jabanu rie: Pa duna yitu na pa dugotumuna paga durungula uvaga munongu mosi nana nyimavayila mumanga ne uviolila. Durungula uvosa na mukongu egugu rie: Gusuga vana, vioga o mubu na uonyi ugusuga.

²²Pa duna yitu adi duwivula na dusambu, adina dudila.

²³Jesus amawenda o Ndagu Nsambi. Ava amalonsila, bivunda bivagulitsi bapagu na bivunda bibaJuif bamaruga ombu gandi. Bamamuwivula rie: Agunyi guidilili musuga uvaga mambu meni? Anyi amaguvega musuga egugu?

²⁴Jesus amabagabusila rie: Menu wami nyuduwivula yivu pa dukwagula nyudutsingula agunyi musuga ami uiruyili.

²⁵Nsingulianu, anyi amasindiga Jean ubatisa? Nsambi vo batu? Tumba bamavosa joʼ beni na joʼ beni rie: Pa tuwagula rie: Nsambi amamusindiga, otuwivula rie: Dibandu yi dusamamuvayila yitu.

²⁶Pa tuwagula rie: Batu bamamusindiga, tuidumi batu, mu mbari betasi yiri Jean amaba mubiyitsi.

²⁷Kabogu bamawagula Jesus rie: Tugejabi. Amabawaka rie: Kabogu menu wami ngodutsingula agunyi nyidilili musuga uvaga mambu memama.

²⁸Jesus amabawivula rie: Yi duitasi mu diambu diedidi? Mutu amaba na baana babeji bababaala. Amavosa na yivunda rie: Wenda namunyi oyesala o nungi ami.

²⁹Muana amagabusila rie: Ngowenda. Tumba o gusu amakalula diela na amawenda.

³⁰Amavosa munongu mosi na ngebi. Ngebi amamuwagula rie: Oo! Uweʼ nyiwendi tumba asamamuewenda.

³¹Va gari ogu anyi amavaga durondu dutaji andi? Bamamugabusila rie: Yivunda. Jesus amabatsingula rie: Jabanu rie: Babongitsi balepu na bimbembu boduviolila ava Durumu duNsambi dujabununu.

³²Jean amaruga ombu genu udusungiga nsila na dusamagaru; yika babongitsi balepu na bimbembu bamamuvayila yitu. Motsu mana dumalaba ne nana dusamakalula diela.

³³Jesus amamuebabuayila nongu rie: Dibaala amavara nungi. Amajitsiengisa yivaga; amakunsa yigamunu na amarunga mua yikumbulu yimfula. Amajisila ombu basalitsi na amawenda o ulinga.

³⁴Mu temu jidutsonsugu amasindiga basalitsi bandi ombu basalitsi beni uyebonga dikabu diandi.

³⁵Basalitsi bamagaanga abamaruga: bamadimba umosi bamaboka ususu na bamatinda agumurieru mamanyi.

³⁶Kabogu dibaala dieni amamuetinda basalitsi basusu bapuela ne uviolila temu ajitega; tumba basalitsi beni bamabavayila munongu mosi.

³⁷Mbana amasindiga muana andi novosa rie: Boyitsa muana ami.

³⁸Tumba ava basalitsi bamalabila muana, bamavosa joʼ beni na boʼ beni rie: Labanu mubongitsi disiala! Ruganu tumubokianu yiri disiala diuba adietu.

³⁹Kabogu bamagaanga muana na bamamuboka mbana bamasila mfumbi o pari.

⁴⁰Jesus amawivula rie: Ava fumu nungi oruyila tsie ovayila basalitsi beni?

⁴¹Bamamugabusila rie: Jandi oruga noboka basalitsi beni novega nungi ombu basusu, diwendi rie: abomuvega dikabu diandi.

⁴²Mbana Jesus amabawivula rie: Dusakaranga Bisonu abimasonugu rie: Dimanyi adimabuagu na barungitsi divu tindi adiviolila ubueji! Adudu la duganu duFumu na duonyi duitulasi ubueji!

⁴³Jesus amabuela rie: La dibandu nyidutsinguli rie: Durumu duNsambi dugojabunu ombu genu tumba dujabunu ombu bisi bulongu abofunanga. [

⁴⁴Uotsu oberuga va dimanyi dieni otsungugu na jandi o dimanyi dieni diubonduyila ogesumuga.]

⁴⁵Bivunda bibavagulitsi bapagu na baJuif abamaba baPharisie bamajaba yiri Jesus amabatsokila na nongu eni.

⁴⁶Mbe baronda umugaanga tumba bamaduma batu mu mbari bamalaba Jesus mubiyitsi avu.