Read Punu Matthieu 24 Bible Online

Matthieu 24 - Punu bible

Matthieu 24

¹Ava Jesus amapalila o Ndagu Nsambi, badukitsi bandi bamabenguna nandi na bamavosa rie: Gengilati tungitsi jiNdagu Nsambi!

²Tumba amabawaka rie: Nyiina, duilabi Ndagu Nsambi tumba jabanu o gusu vagosiala ne dimanyi adigopansu; Ndagu jiotsu jiurakuga.

³Jandi amatsana va julu mukongu umiOlive na badukitsi bamamurasuna na bamamuwivula rie: Tutsinguli mambu meni temu yi mobila? Yilimba yi yiulasa yiri durugu duagu na disukusulu dibulongu biulabana?

⁴Jesus amabagabusila rie: Kebananu yiri mutu agodudunsa.

⁵Bapuela boruga mu diina diami novosa rie: Menu la Christ. Jogu bodunsa batu bapuela.

⁶Duyalaba keri ava dugululu makumbula madivita nesi misamu mimavita amavu yiari na yiari; vengu mambu meni moleba. Tumba disukusulu dibulongu digoba mu temu eni.

⁷Bisi dilongu dimosi botoga na bisi dilongu disusu na bakaga botoga na bakaga basusu; voba dungosu dunsala na masisana mabutamba yiari na yiari.

⁸Dionyi diuba yika dibandu dimagaga.

⁹Bodulasa maguga, bodukuana na duvinu na batu botsu mu diambu diami.

¹⁰Mbana bapuela wandi bobusa Fumu, bofundasana na bovinasana.

¹¹Babiyitsi bamfurulu bofunanga na boyenadunsanga bapuela.

¹²Mabi mofuna te na durondu dubapuela dutsiemuga.

¹³Tumba jandi oguwarila te na disukusulu ogobulu.

¹⁴Musamu Uboti usamunu yiari na yiari te na botsu bogulu mbana disukusulu diuba.

¹⁵Dulaba dubungu adumatubulu na Daniel ava amalabila mbura jiyingitsi (jandi oyirangi atsiyisi!)

¹⁶Jogu aboba o Judee barini o mikongu.

¹⁷Jandi oguba va julu muansa ayaviosa temu umuekota o ndagu andi ubonga abiandi.

¹⁸Jandi oguba o musiru ayagabuga uyebonga yijungi yiandi.

¹⁹Ka muna maguga ma bagetu aboba na mimi na abonuisanga mahenyi bolaba mu bilumbu bieni!

²⁰Sambilanu yiri mambu meni magodurasuna va yitsubi nesi yilumbu yitsona.

²¹Mu temu eni maguga moba maneni amasakalabana na kala ubongila va diweru adi Nsambi amasundila motsu te na namunyi, na o gusu vagoba masusu mamunongu eni, via!

²²Mbe Fumu asamatabula diambu ugufisa bilumbu bieni mbe mutu ne umosi agogobulu tumba amabigufisa mu diambu dijogu abamasolu nandi.

²³Pa mutu odutsingula rie: Christ aji vava vo aji vana, duyamuvayila yitu.

²⁴Mu mbari voba bachrist bamfurulu na babiyitsi bamfurulu; jogu bovaga bilimba bineni na bimaga udunsa aba Nsambi amasola.

²⁵Kabogu lubuganu, nyimadulubusa kala.

²⁶Pa bodutsingula rie: Labanu aji o kumu! Duyawenda. Vo pa bevosi rie: Ruganu, usuema esuemi! Duyadivayila yitu.

²⁷Mu mbari durugu duMuana Mutu dubila nana dusiemu aduirambuyili o wisi epalili na duilabini te no wisi ewendisini.

²⁸Va mbura jiotsu ajivu mfumbi, avana banyunga bobengunina.

²⁹Yiotsu ayi maguga meni movioga, wisi upindusu, tsungi jigomuebatsa muetsa, bambuelili bobonduga na julu jiukungusu.

³⁰Mbana yilimba yiMuana Mutu yiulabana o julu; batu botsu bogamuga na Muana Mutu oruga va gari mamungi na bomulaba na mangolu maneni na bundumba.

³¹Mumbanda usigu mbana osindiga biansa o biari biotsu bibina bibutamba ugukiga aba Nsambi amasola te no masuka mabulongu.

³²Rangiminanu yibagunu yimumanga. Pa bitayi biwansi duijabi yiri mfula yika utuba.

³³Munongu mosi ava duilabili mambu meni, jabanu yiri durugu duMuana Mutu duka bebeli.

³⁴Ngensa nyidutsinguli rie: Dukula duedudu dugolefu te na mambu meni molabana.

³⁵Julu na butamba biutsiemuga tumba mambu mami magotsiemuga, via!

³⁶Yilumbu vo diweru dieni digojabunu na mutu ne biansa ne Muana, yika Taji buandi edijabi.

³⁷Adimalabana mu temu Noe diuba munongu mosi ava durugu duMuana Mutu.

³⁸Ne nyidu jikabasa, batu bamajanganga na bamanuanganga, bamawelanga na bamawetsanga baana bogu te na yilumbu ayi Noe amakotila o dikumbi;

³⁹basamavaga yitu te na nyidu jimabasa na botsu bamafu. Jabanu rie: Diuba munongu mosi ava durugu duMuana Mutu.

⁴⁰Babaala babeji bowenda va mosi o musiru; dimosi diubongu na disusu diusiala.

⁴¹Bagetu babeji boroka va mosi: umosi obongu na ususu osiala.

⁴²Kabogu lubuganu mu mbaridugejabi yilumbu ayi Fumu enu oruyila.

⁴³Jabanu rie: Mbe fumu ndagu amajaba temu aji mudayitsi obula ndagu mbe asamawenda yilu na ndagu mbe jisamabulu.

⁴⁴La dibandu jenu wenu banu dukunsama mu mbari Muana Mutu oruga mu diweru adi dugemuvivi.

⁴⁵Kabogu musalitsi usigama aguvu na diela anyi? La jandi agu fumu ovega musuga ukelisa ndagu, agugabila basalitsi basusu biguji.

⁴⁶Ka muna ubueji gu musalitsi eni olaba pa fumu ndagu oruga nomurasuna yika usala esali!

⁴⁷La dibandu fumu andi omuveyila musuga uruma biandi biotsu.

⁴⁸Tumba tanguji musalitsi eni ovosa o tsi murima rie: Fumu ami etsingi, agomueruga.

⁴⁹Kabogu obanda udimba basalitsi botsu nodibula mulugu andi nolanganga.

⁵⁰Muna yilumbu ayi jandi agemuemuviva, fumu andi oruga.

⁵¹Ka muna musosi gu musalitsi eni olaba! Fumu andi omulasa maguga va mosi na baboti bamiunu. Jandi olilanga na onyonganga.