Read Punu Matthieu 27 Bible Online

Matthieu 27 - Punu bible

Matthieu 27

¹Muna kedi bivunda bibavagulitsi bapagu na bivunda bibaJuif bamabenguna botsu va mosi uyegelila Jesus yinsima nana obokulu.

²Banomana utunga Jesus bapanga bamamubega ombu Pilate omaba yivunda yibulongu.

³Mbana Judas omamufunda anolaba yiri Jesus amavegu mbela dufu amakalula diela na amagabusa magumarieru mambongu tsilora jivema ombu bivunda bibavagulitsi bapagu nombu bivunda. Amavosa rie: Nyimavaga dibi mu mbari nyimasumbisa mutu agugaa na diambu.

⁴Bamamuwaka rie: Adina divu va julu muru agu!

⁵Judas amabuaga mbongu o gari Ndagu Nsambi na amawenda uyesuekama.

⁶Bivunda bibavagulitsi bapagu bamabola mbongu na bamavosa rie: Tsietsitsi tsivu malungu na malungu. Tugaa na musuga utsisobana mu yisuegulu yiNdagu Nsambi.

⁷Banomana utsunda bamasumba yiasi yimusiru yimubumbitsi na mbongu tsieni mutsiyilanga benyi.

⁸La dibandu mbura eni jinengulungu musiru umalungu te na namunyi.

⁹Dimalabana udugusu adi Jeremie mubiyitsi amavosa rie: Jogu bamabonga magumarieru mambongu tsilora jivema (atsina bamavangana na baIsrael)

¹⁰na bamasumba musiru umubumbitsi nana Fumu amatumina.

¹¹Jesus anobegu ombu yivunda yibulongu amamuwivula rie: Ndeʼ la kaga baJuif? Jesus amamugabusila rie: Ndeʼ beni gumadivosa.

¹²Ava bivunda bibavagulitsi bapagu na bivunda bisusu bamamufuengilila, Jesus asamawagula ne dimosi.

¹³Pilate amamuemuwivula rie: Gugewaguli ne dimosi? Gugegulu begufuengilili?

¹⁴Jesus amamuebusa uwagula; yivunda yibulongu amakambulu mu dionyi.

¹⁵Kadi feta Paque yivunda yibulongu amabapalisilanga muisi tsugu agu batu bamaronda.

¹⁶O tsugu vamaba mutu mubi diina diandi Jesus Barabbas

¹⁷Kabogu batu banoruga, Pilate amabawivula rie: Anyi duirondi yiri nyudupalisila, Jesus Barabbas vo Jesus ajinengulu Christ?

¹⁸Amajaba yiri bamafunda Jesus mu diambu didivina.

¹⁹Ava Pilate amatsanina va yitsiga yibunsonsi, mugatsi andi amatinda yilumbi umutsingula rie: Vayaba diambu va gari jenu na mutu eni agusungama. Namunyi nsimudora na ndosi jitsindasa goma.

²⁰Tumba bivunda bibavagulitsi bapagu na bivunda bisusu bamatsagumusa yinombu yiri bowivula Pilate ubapalisila Barabbas noboka Jesus.

²¹Yivunda yibulongu amamuebawivula rie: Va gari jogu botsu babeji anyi duirondi yiri nyudupafisila? Bamawagula rie: Barabbas.

²²Pilate amabawivula rie: Kabogu yi nyuvaga na Jesus aji benengili Christ? Botsu bamawagula rie: Agomunu va kurusu!

²³Yivunda yibulongu amabawivula rie: Dibi yi amavaga? Bamagamuga na mangolu rie: Agomunu va kurusu! Agomunu va kurusu!

²⁴Pilate anolaba yiri voba nguba amagolila mamba va gusu batu botsu novosa rie: Dibi diedidi digaa va julu muru ami! Adina diuba dijenu beni!

²⁵Batu botsu bamawagula rie: Dufu duandi dubi va julu miuru mietu te na mibaana betu!

²⁶Mbana Pilate amapalisa Barabbas. Anodimbisa Jesus mikasa amamuwakisa ugomunu va kurusu.

²⁷Bagora baPilate bamabega Jesus o ndagu (diwendi rie: o ndagu yivunda yibulongu), aguna dibuli diotsu bamabenguna va mosi.

²⁸Bamamuvula biduaru biandi na bamamuduisa yijungi yibenga.

²⁹Bamavasa dugaba dumatsiendi na bamamuduisa duonyi. Banomuvakiga nguangu va dikaka dimabaala bamakutama va gusu andi na bamamudesa rie: Mbolua kaga baJuif!

³⁰Bamamufuta mateji na bamamudimba na nguangu va muru.

³¹Banomana umudesa nana bamamugusula yijungi, bamamuemuduisa biduaru biandi na bamamubega uyemugomina va kurusu.

³²Ava bamabila muna nsila bamabenguna na muisi Cyrene, diina diandi Simon. Bamamutsotsa ubega kurusu jiJesus.

³³Mbana bamabega Jesus o Golgotha, divindugulu rie: mbura dubengili.

³⁴Bamamuvega dive dinganyi tumba anodimanga amadibusa.

³⁵Bamamugomina va kurusu. Bamabuaga mbanda ujaba banyi bodila biduaru biandi

³⁶mbana bamatsana umukelisa.

³⁷Mambu memama mamasonu va kurusu rie: Agugu la Jesus kaga jibaJuif.

³⁸Bikongu bibeji bamagomunu wandi; umosi va mabaala mandi na ususu va magetu mandi.

³⁹Ava batu bamavioyilanga bamamusienganga na bamamuangisanga miuru na bamavosanga rie:

⁴⁰Ndeʼ aguvu na mangolu upansa Ndagu Nsambi nomuejirunga mu bilumbu birieru, kegobula!

⁴¹Bivunda bibavagulitsi bapagu na milonsi mimigaga na bivunda bisusu bamamudesanga rie:

⁴²Jandi agumagobula basusu agorungula ukegobula? Tsie tulabiatianu Christ kaga jiIsrael nana esunduyili va kurusu mbana tumuvayila yitu.

⁴³Jandi amakevega ombu Nsambi na amavosa rie: Nyiji Muana Nsambi. Tsie tulabiatianu yeri Nsambi omugobula.

⁴⁴Nesi bikongu abimagomunu nandi bamamusienga munongu mosi.

⁴⁵Ava muangulu bulongu buotsu bumaba yika pisama na pisama te na murekumunu.

⁴⁶Ava murekumunu Jesus amagamuga rie: Eli, Eli lema sabachthani? Divindugulu rie: Nsambi ami, Nsambi ami mu mbari yi gumambuayila?

⁴⁷Bamosi abamaba vana banomugulu bamavosa rie: Guluanu enengili Elie.

⁴⁸Umosi amawenda mbangu ubasa mutsabu dive dinganyi, amaguvakiga va nguangu. Amagubambasana na munu Jesus

⁴⁹mbana basusu bamavosa rie: Lekelatianu tanguji Elie oruga umusundusa.

⁵⁰Jesus amamuegamuga mugamu uneni na amatabuga.

⁵¹Vana diweru dieni dumbu duNdagu Nsambi dumapasiga biasi bibeji, ubandila o julu te no tsi. Butamba bumasisana na mamanyi mamapasiga;

⁵²mangila mamadibuga na batu baNsambi bapuela abamafu kala bamarambuga o dufu.

⁵³Jesus anorambuga o dufu jogu bamawenda va mosi o Jerusalem, aguna batu bapuela bamabalabila.

⁵⁴Disisana dibutamba na motsu amamalabana bimalasa yivunda yikama bagora na bagora basusu goma na bamavosa rie: Dingensa mutu eni abetsi Muana Nsambi.

⁵⁵Vamaba bagetu bapuela abamamukelisa; bamadukanga Jesus na bamayenamusalilanga ubandila o Galilee.

⁵⁶Va gari ogu vamaba Marie muisi Magdala na Marie nguji Jacques na Joseph na nguji baana baZebedee.

⁵⁷Ava tsisiga eni yisina muisi Arimathee, diina diandi Joseph amatola vana, jandi wandi amaba mudukitsi Jesus.

⁵⁸Jandi amawenda ombu Pilate na amavonda mfumbi Jesus.

⁵⁹Pilate amasingisa Joseph ubonga mfumbi na Joseph amajigumba tsanda.

⁶⁰Anojitsiga o ngila ajimatobu mu dimanyi amajidibiga na dimanyi disusu na amayenawenda.

⁶¹Marie muisi Magdala na Marie jisusu bamaba vana, bamakelisa ngila.

⁶²Ava kedi samedi bivunda bibavagulitsi bapagu na baJuif abamaba baPharisie bamawenda va mosi ombu Pilate

⁶³na bamavosa rie: Kaga, jetu tuirangimini adi mufuritsi eni amavosa ava mbe aki monyu. Jandi rie: Nyurambuga o dufu mu yilumbu yimurieru.

⁶⁴Ka ruma yiri ngila jiukelusu te na bilumbu birieru mbana badukitsi bandi bagorungula udaga mfumbi novosa ombu batu rie: Jandi amarambuga o dufu. Ndunsulu jiusita jiuviolila ajitega.

⁶⁵Pilate amabatsingula rie: Jenu duna bagora kabogu jenu beni kelisanu ngila nana duirondili.

⁶⁶Bamawenda na bamawarisa ngila na bamasila bagora vana.