Read Punu Matthieu 28 Bible Online

Matthieu 28 - Punu bible

Matthieu 28

¹Ava matebuglu mayilumbu yitsona Marie muisi Magdala na Marie jisusu bamawenda o ngila.

²Vana vana vamaba disiana dineni dibutamba; yiansa yiFumu yimasunduyila o julu, yimabungasana dimanyi na yimatsana va julu dionyi.

³Jaʼ uotsu yika ulula na yiduaru yiandi yimavedama nana muetsa.

⁴Goma jimagaanga bagora te na bamaba nderi batu abamabembu na dunsansa dukaki.

⁵Tumba yimavosa na bagetu rie: Duyalaba keri! Nyijabi yiri duirombi Jesus ajimagomunu va kurusu.

⁶Agatsi, amarambuga nana amalevosila. Rugatianu na labanu mbura aji jandi amasilugu.

⁷Wendanu uyetsingula badukitsi bandi yiri amarambuga na uwenda ewendi o Galilee; aguna dumulabila. Duyalibana motsu ama nyibanovosa.

⁸Bagetu bamagusuga bisuasu va ngila na mu diambu digoma na nsangu bamawenda mambangu. Bamayetsingula motsu ombu badukitsi baJesus. Yika uvosa bevosi na Jesus amalabana na amavosa nogu rie: Mboluanu!

⁹Banobambana nandi bamakutama na bamamuyitsa.

¹⁰Tumba Jesus amabatsingula rie: Duyalaba keri! Wendanu uyetsingula baana baTaji bami uwenda nyiwendi o Galilee; aguna bondabila.

¹¹Ava bagetu bamabila mu nsila bagora bamosi bamakota o musiengi na bamatsingula bivunda bibavagulitsi bapagu adimalabana.

¹²Kabogu bivunda bibavagulitsi bapagu na bivunda bisusu bamawenda fundu na bamatabula diambu uvega bagora mbongu tsipuela tsipuela.

¹³Bamavosa nogu rie: Vosanu rie: Mukolu ava tubetsili bilu badukitsi bandi batsidaga mfumbi.

¹⁴Duyalaba yivunda yibulongu goma pa odijaba tumugubitsa na dugoba na diambu.

¹⁵Bagora bamabonga mbongu na bamakipa malongi ama bamalonsu. Te na namunyi anana baJuif bevosili.

¹⁶Digumi na mudukitsi umosi bamawenda o Galilee na bamamata o julu mukongu agu Jesus amalebalonsa.

¹⁷Ava bamamulabila bamagudama va gusu andi diuleba bamosi bamatumuna paga.

¹⁸Jesus anobambana nogu amabatsingula rie: Mangolu motsu mamapegu ubandila o julu te no vava tsi.

¹⁹Wendanu o bulongu buotsu na funisanu badukitsi bami na babatisianu mu diina diTaji na diMuana na diYinyunyi yiNsambi

²⁰na balonsianu udedila ama nyimadulonsa. Jabanu rie: Nyuba nenu te na disukusulu dibulongu.