Read Punu Matthieu 5 Bible Online

Matthieu 5 - Punu bible

Matthieu 5

¹Jesus anolaba puela batu amamata o julu mukongu na amatsana. Badukitsi bandi banogukama bebeli nandi

²amalonsa rie:

³Ka muna ubueji gu, uvu na jogu abekelaba bavu batu bageyi: baji o tsiDurumu duNsambi!

⁴Ka muna ubueji gu, uvu na jogu abelili: Nsambi obavotsa.

⁵Ka muna ubueji gu, uvu na bimbesi: bodila aji Nsambi amavangana nogu!

⁶Ka muna ubueji gu, uvu na jogu aberondi udugusu maruma maNsambi: Nsambi jaʼ beni obawamusa tindi uwamusa!

⁷Ka muna ubueji gu, uvu na bango yingeba: Nsambi obalasa yingeba!

⁸Ka muna ubueji gu, uvu na bango mirima miwelimina: bolaba Nsambi!

⁹Ka muna ubueji gu, uvu na jogu abevotsi manguba: Nsambi obanengila baana bandi!

¹⁰Ka muna ubueji gu, uvu na jogu abekuanu mu diambu dimaruma maNsambi: baji o tsi Durumu duNsambi!

¹¹Ka muna ubueji gu, uvu nenu ava batu bodusiengilanga nodukuaninanga nodufurilanga mu mbari duji badukitsi bami.

¹²Labanu ubueji na nsangu mu mbari yisaku yienu yimadusuegulu o julu. Basamalasanga babiyitsi abamadurela maguga munongu mosi?

¹³Jenu duji nderi musayi ombu bisi bulongu. Tumba pa musayi umasambuga, mutu orungula ugugabusa dueyi? Uisaa na yisalu yisusu yika ubuaga.

¹⁴Jenu duji nderi yijalala ombu bisi bulongu. Musiengi agumarungu va julu mukongu ugorungula usuemana.

¹⁵Mutu agebangisi paga ujisuega o tsi ponsi tumba ejivakiyi va dingasa na jimonitsi biotsu abivu o gari ndagu.

¹⁶Munongu mosi yijalala yienu yibangingi yiri batu bolaba bisalu bienu biboti nododisa Taji enu ajivu o julu.

¹⁷Duyatasa yiri nyimaruga uyitsindula migaga miMoise vo malongi mababiyitsi. Nyimaruga tsiri uyibitsindula tumba uyibiwarisa.

¹⁸Nyidutsinguli rie: Ne pa julu na butamba biutsiemuga migaga miotsu miuba nanamivu, nesi te na disukusulu dimotsu.

¹⁹Kabogu jandi ogusumuna ne diruma dimosi vo olonsa basusu udivaga oba yika yifufu ava Durumu duNsambi dujabununu. Tumba jandi oyidedili migaga nolonsa basusu udivaga oba muneni ava Durumu duNsambi dujabununu.

²⁰Nyidutsinguli rie: Dujaba Durumu duNsambi yika pa duna dululu dumigaga uviolila aduvu na milonsi mimigaga na baJuif abavu baPharisie.

²¹Dumagulu yiri bivunda bienu bimatsingulu rie: Guyaboka. Mutu uotsu oyiboki mutu nandi avu awelimina ufundu ombu bansonsi.

²²Tumba menu nyidutsinguli yiri mutu uotsu oyinyoyili muana Taji andi avu awelimina ufundu ombu bansonsi; jandi oyisiengi muana Taji andi rie: Guji yifufu! Avu awelimina ufundu o yibenguna yibivunda bineni. Jandi oyimusiengi rie: Ulaguga! Avu awelimina ubungana o bulungi bumuji.

²³Ava guivagulili pagu ombu Nsambi pa guirangimini yiri muana taji agu ana diambu nagu

²⁴lesila pagu vana yisunsulu yipagu nokunsa diambu na muana taji agu; mbana tsie ruyi uvega pagu agu ombu Nsambi.

²⁵Pa guna diambu na mutu ava egubeyili o mufundu, weliga uditabula nandi mu mbari akeguwakisa ombu nsonsi na nsonsi akeguwakisa ombu bagora na jogu bakegukotisa o tsugu.

²⁶Nyigutsinguli rie: Gugopala o tsugu te na gumamana ufuta muganu uotsu.

²⁷Dumagulu kala rie: Duyavaga bumbembu.

²⁸Tumba menu nyidutsinguli rie: Dibaala oyinyungili mugetu amakevayila bumbembu nandi.

²⁹Kabogu pa disu diagu dimabaala digutsimbusu didonduli nodibuaga! Tsiri diambu diviolila uvura utsiemusa yilema yimosi tumba divu diambu diranga ubungana ndeʼ uotsu o bulungi bumuji.

³⁰Pa dikaka diagu dimabaala digutsimbusu, ditabuli na dibuayi! Tsiri diambu diviolila uvura utsiemusa yilema yimosi tumba divu diambu diranga ubungana ndeʼ uotsu o bulungi bumuji.

³¹Dumagulu kala rie: Dibaala oyigusuli mugatsi andi amuveyi muganda ava ebokili diwela.

³²Tumba nyidutsinguli rie: Dibaala oyigusuli mugatsi andi ne pa mugetu agaa na diambu emurumi uba yivuyisa na jandi oyiweli mugetu eni evayi bumbembu.

³³Dumagulu wandi yiri bivunda bienu bimatsingulu rie: Duyakubula pangini ajimalevulu pesi tumba dugusuanu pangini ajimawarusu na pesi ava dumavanginina va gusu Nsambi.

³⁴Tumba menu nyidutsinguli rie: Duyaleva pesi tsiotsu, nesi pesi jijulu mu mbari julu la yitsiga yiNsambi;

³⁵nesi pesi jibutamba mu mbari buonyi la yisunsulu yimakulu mandi; nesi pesi jiJerusalem mu mbari uonyi la musiengi uKaga ajineni.

³⁶Nesi pesi jimuru agu mu mbari gugaa na musuga uvemisa vo upindisa ne dunanga dumosi.

³⁷Dukavosa rie: Nyiina vo nesi; tsiotsu tsisusu tsiruyili ombu diabu.

³⁸Dumagulu kala rie: Disu na disu mesoyi miuru, nesi dinu na dinu mesoyi miuru.

³⁹Tumba namunyi nyidutsinguli yiri duyagabusila pila. Pa mutu ogudimba va dibanga dimabaala, mugelusili disusu wandi.

⁴⁰Pa mutu ogufunda uyedila yikutu yiagu muveyi yijungi yiagu wandi.

⁴¹Pa mutu ogugoma unangula mufuna andi nowenda kilumetera mosi, ka buesa ajimubeji.

⁴²Pa mutu oguwivula yima, muveyi; vo pa erondi ugusomba, ka musombisi.

⁴³Dumagulu kala rie: Ronda mutu nagu novina muvinitsi agu.

⁴⁴Tumba namunyi nyidutsinguli rie: Rondanu bavinitsi benu na sambilanu mu jogu abedukuani yiri duba baana baTata aguvu o julu.

⁴⁵Jandi ebatsili botsu wisi ne babi ne baboti na enoyisili botsu mfula ne abevayi maboti ne abevayi mabi.

⁴⁶Dibandu yi Nsambi odusakila pa duirondi yika jogu abedurondi? Ne babongitsi balepu bevayi nana!

⁴⁷Pa duisayimini yika bambatsi, ubueji uka? Ne abageduki Nsambi bevayi nana!

⁴⁸Banu batu badugu mu mbari Taji enu ajivu o julu amadugusu motsu.