Read Punu Marc 1 Bible Online

Marc 1 - Punu bible

Marc 1

¹Dibandu diMusamu Uboti uJesus Christ, Muana Nsambi

²dimaba nana mubiyitsi Esaie amasonina rie: Nsambi evosi rie: Nyisindiyi yilumbi yiami va gusu agu ugutsonsiyila nsila.

³Adidi la diufi dimutu oyigamuyi o kumu rie: Solanu nsila Fumu Futsanu mansila mandi!

⁴Jean amalabana o kumu; amabatisanga na amalonsanga malongu mandi rie: Kalulanu diela nobatusu na Nsambi odutanda masumu menu.

⁵Bisi Judee na bisi Jerusalem botsu bamawendanga uyegulu Jean. Bamatubulanga masumu mogu na jandi amababatisanga o mujamba Jourdain.

⁶Jean amaduaranga bikutu abimavagu na mionyi mitsungu na amabiwarisanga na munsiyi umukata. Amajanganga makokoku na buji.

⁷Amalonsanga batu rie: Jandi oyiruyi o nsima ami epiolili mangolu; nyisaweliminane unyangula mikudu mibapondu bandi.

⁸Menu risidubatisa na mamba, jandi odubatisa na Yinyunyi yiNsambi.

⁹Mu temu eni Jesus amaruga o Nazareth o yiari yiGalilee na Jean amamubatisa o Jourdain.

¹⁰Ava Jesus amasabuyila o mamba, julu jimadibuga na Yinyunyi yiNsambi mu yibagunu yidibembi amamubetama.

¹¹Jandi amagulu diufi adimaruyila o julu rie: Guji Muana ami udurondu. Nyilabi nsangu jineni nagu.

¹²Vana vana Yinyunyi yieni amasindiga Jesus o kumu.

¹³Amaviosa magumana mabilumbu guna na Satan amamumanga. Amatsana va gari bibulu bibukanyi na biansa bimamusalila.

¹⁴Jean anokotusu o tsugu Jesus amawenda o Galilee uyelonsa Musamu Uboti uNsambi.

¹⁵Amavosa rie: Temu jimatola namapapa; Durumu duNsambi dujabunu. Kalulanu diela na vayilanu Musamu Uboti yitu.

¹⁶Ava Jesus amavioyila va mugula yiliba yiGalilee amalaba Simon na muana nguji andi Andre, uvuba bevubi na mbusa tsiogu.

¹⁷Jesus amavosa nogu rie: Ndukianu na nyuduvaga tsiri yika bavubitsi tumba jogu abedili batu.

¹⁸Vana vana bamasila mbusa tsiogu na bamamuduka.

¹⁹Anowenda mua vala o gusu agu amalaba Jacques muana Zebedee na muana nguji andi Jean, abamatsana mu bota uyenalondanga mbusa tsiogu.

²⁰Yiotsu ayi Jesus amabalabila amabanengila; kabogu bamasila taji ogu Zebedee na basalitsi mu bota na bamaduka Jesus.

²¹Jesus na badukitsi bandi bamawenda o Capernaum. Yilumbu yitsona Jesus amakota o Ndagu Nsambi na amabanda ulonsa.

²²Batu abamamugulu bamakambulu na malongi mandi mu mbari amalonsa na mangolu tsiri nana milonsi mimigaga bamalonsilanga.

²³Vana vana mutu omaba na yinyunyi yibi amakota o Ndagu Yibenguna na amagamuga rie:

²⁴Jesus muisi Nazareth diambu yi divu va gari jetu nagu? Guirondi utubunga? Nyigujabi! Guji yilumbi yiNsambi.

²⁵Jesus amaruma yinyunyi yibi rie: Vola sui! Dunda dibaala diedidi!

²⁶Yinyunyi yibi yimamututusa na mangolu, yimagamuga mugamu uneni na yimamudunda.

²⁷Botsu bamakambulu puela na bamawivusana rie: Diambu yi? Malongi magona vo yi? Jandi ana mangolu uruma binyunyi bibi na bimudedili?

²⁸Ubongila va diweru dieni diduma diandi dimanyava o biari biotsu biGalilee.

²⁹Banogusuga o Ndagu Yibenguna bamawenda o ndagu Simon na Andre; Jacques na Jean bamawenda nogu.

³⁰Boji buSimon amaba asilama na dibagu; yika Jesus etoli bemutsinguli maguga mandi.

³¹Kabogu amawenda ombu gandi, amamugaanga na dikaka na amamuretsiga. Vana vana dibagu dimasaguga na jandi amabasalila.

³²Wisi unotsima bamamubeyila bibedu biotsu nesi abamaba na binyunyi bibi.

³³Bisi musiengi botsu bamagukama va munu ndagu.

³⁴Jesus amabelusa batu bapuela abamaba na maali mamunongu na munongu na amapalisa binyunyi bibi bipuela wandi. Asamasingisa binyunyi bibi uvosa mu mbari bimamujaba.

³⁵Ava mavuvungi Jesus amarambuga na amawenda o kumu uyesambila.

³⁶Simon na jogu abamaba nandi bamamuduka;

³⁷ava bamamulabila bamavosa nandi rie: Botsu begurombi.

³⁸Tumba Jesus amawaka rie: Tʼwendianu o misiengi amibambana mu mbari vengu nyulonsa muna wandi; mu dionyi nyimaruyila.

³⁹Amalinganga o Galilee jiotsu na amalonsanga o Mandagu maBibenguna na amapalisanga binyunyi bibi.

⁴⁰Yibedu yinyambi amaruga ombu Jesus, anokutama amavosa nandi rie: Pa guirondi gurungula umbelusa.

⁴¹Jesus amagaangu na munyongu na amasimbula gogu; anomubemba amavosa nandi rie: Nyirondi, beluga.

⁴²Vana vana nyambi jimabeluga.

⁴³Mbana Jesus amamuganina na amamutsingula rie:

⁴⁴Gulu, guyaditsingula mutu. Tumba yekelasa ombu bavagulitsi bapagu nana gumabeluyila, vagula pagu aji Moise amaruma yiri batu botsu bolaba gumabeluga.

⁴⁵Tumba mutu eni amayenadisamunanga yiari na yiari te na Jesus asamamuerungula upala o musiengi ukelasa ombu batu. Amatsananga o kumu na batu abamaruyila yiari na yiari bamamurasuna.