Read Punu Marc 11 Bible Online

Marc 11 - Punu bible

Marc 11

¹Banobambana o Jerusalem mbe basakatola o Bethpage na Bethanie bamatola o yiari yimukongu umiOlive. Jesus amaruma badukitsi babeji rie:

²Wendanu o dimbu adivu o gusu. Aguna durasuna muana buru utungu agu mutu asakatsanina na kala. Munyangulianu na mubeyianu.

³Pa mutu oduwivula rie: Yi duivayi? Mugabusilianu rie: Fumu ana nsala uonyi, omugabusa namapapa.

⁴Kabogu bamawenda na va mugula nsila bamarasuna muana buru utungu bebeli na munu ndagu, bamamunyangula.

⁵Batu bamosi abamaba vana bamabawivula rie: Yi duivayi? Dibandu yi duimunyangulili?

⁶Bamabawaka nana Jesus amavosila. Kabogu bamabasingisa uwenda.

⁷Banobega muana buru ombu Jesus bamasakiga buru biduaru biogu mbana Jesus amanangama.

⁸Batu bapuela bamayenawalanga biduaru biogu na metu muna nsila.

⁹Batu abamawenda va gusu Jesus na abamamuduka bamayenagamuganga rie: Diboti ombu Nsambi!

¹⁰Miula mibi mu durumu aduiruyi, durumu dutaji etu David! Diboti ombuNsambi!

¹¹Jesus amakota o Jerusalem na amawenda o Ndagu Nsambi. Tumba anolaba yiri wisi umaketsimina amawenda o Bethanie na digumi na badukitsi bandi babeji.

¹²Vana kedi ava bamaruyila o Bethanie Jesus amagulu nsala.

¹³Amalabilila mumanga agumaba na magaji maboti, amawenda uyelaba yiri tanguji orasuna mimanga muna. Anotsuna amalaba yika magaji na magaji mu mbari temu mimanga mbe jimavioga.

¹⁴Mbana amavosa na mumanga rie: Mutu agomueji mimanga miagu, via! Badukitsi bandi bamadigulu.

¹⁵Banotola o Jerusalem Jesus amakota o Ndagu Nsambi na amasansa jogu abamasumbisanga na abamasumbanga bima biogu muna. Amagudiga batavula babasansitsi bambongu na bivika bibasumbisitsi bamabembi

¹⁶na asamagaru yiri mutu okota na mufuna o gari Ndagu Nsambi.

¹⁷Mbana amalonsa batu rie: Bisonu bimasonugu rie: Ndagu ami jiunengulungu Ndagu jiDusambu. Tumba jenu dumajivaga yisuemunu yibadayitsi.

¹⁸Bivunda bibavagulitsi bapagu na milonsi mimigaga banodigulu bamaromba uboka Jesus. Bamalaba keri udivaga mu mbari batu botsu bamaba liyiyi ugulu malongi mandi.

¹⁹Wisi unotsima Jesus na badukitsi bandi bamagusuga vana musiengi.

²⁰Va kedi ava bamavioyila badukitsi bamalaba mumanga umagumuga te no ngansi.

²¹Pierre anorangimina adimavagu amavosa na Jesus rie: Mulonsi, gengilati mumanga agu gutsiloga, umafu.

²²Jesus amavosa nogu rie: Dingensa nyidutsinguli rie: Pa duvayila Nsambi yitu

²³durungula uvosa na mukongu egugu rie: Gusuga vana na kebuaga o mubu. Pa dugotumuna paga, diwendi rie: pa duivayi yitu yiri adi dutsivosa diuvagu dudilaba.

²⁴La dibandu nyidutsinguli rie: Ava duisambilili novonda yima, vaganu yitu yiri dumayidila na yionyi yiuduvegu.

²⁵Ava duisambilili pa duna diambu na mutu nenu mutandianu yiri Taji enu ajivu o julu odutanda masumu menu wandi. [

²⁶Tumba pa dugetandi basusu, Taji enu ajivu o julu agodutanda masumu menu.]

²⁷Bamamuegabuga o Jerusalem. Ava Jesus amalingila o Ndagu Nsambi bivunda bamaruga ombu gandi.

²⁸Bamamuwivula rie: Agunyi guidilili musuga uvaga mambu memama? Anyi amaguvega musuga egugu?

²⁹Jesus amabagabusila rie: Menu wami nyunduwivula yivu pa dukwagula nyundutsingula agunyi musuga ami uiruyili.

³⁰Nsingulianu, anyi amasindiga Jean ubatisa? Nsambi vo batu?

³¹Tumba bamavosa joʼ beni na joʼ beni rie: Pa tuwagula rie: Nsambi amamusindiga owivula rie: Dibandu yi dusamamuvayila yitu?

³²Pa tuwagula rie: Batu ba mamusindiga… (Jogu bamaduma batu mu mbari botsu bamatasa Jean amaba tindi mubiyitsi.)

³³Kabogu bamawagula Jesus rie: Tugejabi. Jesus amabawaka rie: Kabogu menu wami ngodutsingula agunyi nyidilili musuga uvaga mambu memama.