Read Punu Marc 12 Bible Online

Marc 12 - Punu bible

Marc 12

¹Mbana Jesus amamuebabuayila nongu. Jandi rie: Dibaala amavara nungi. Amajitsiengisa yivaga; amakunsa yigamunu na amarunga mua yikumbulu yimfula. Amajisila ombu basalitsi na amawenda o ulinga.

²Mu temu dutsonsugu amasindiga musalitsi ombu basalitsi beni uyebonga dikabu diandi.

³Bamamugaanga nomudimba na bamamugabusa miogu na miogu.

⁴Amamuesindiga musalitsi ususu; bamamudimba nomunemisa muru na bamamusienga.

⁵Fumu nungi amamuesindiga musalitsi ususu na bamamuboka; va julu vana bamalasa basalitsi bapuela maguga: bamosi bamadimbu na basusu bamaboku.

⁶Vamasiala yika muana andi udurondu. Kabogu amamusindiga ombu basalitsi beni. Amavosa rie: Boyitsa muana ami.

⁷Tumba basalitsi beni bamavosa joʼ beni na joʼ beni rie: Labanu mubongitsi disiala! Ruganu tumubokianu yiri disiala diuba adietu.

⁸Kabogu bamagaanga muana na bamamuboka mbana bamasila mfumbi o pari.

⁹Mbana Jesus amawivula rie: Fumu nungi yi ovaga? Adidi rie: Oruga na oboka basalitsi beni novega nungi ombu basusu.

¹⁰Dusakaranga Bisonu abisonugu rie: Dimanyi adimabuagu na barungitsi divu tindi adiviolila ubueji

¹¹Adudu la duganu duFumu na duitulasi ubueji.

¹²Bivunda bibaJuif bamaronda ugaanga Jesus mu mbari nongu andi jimabatsokila tumba basamamuedivaga mu mbari bamadumanga batu.

¹³BaJuif bamosi abamaba baPharisie na bambatsi baHerode bamawenda ombu Jesus uyemulega na posulu tsiandi.

¹⁴Bamavosa nandi rie: Fumu tuijabi yiri ama guivosi na ama guilonsi mavu mangensa. Tuijabi yiri gugegengili buneni bumutu nana mutu mutu eketasila. Tumba guilonsi duganu aduvu na Nsambi ombu mutu uotsu. Letutsingulati, divu diwelimina yiri jetu tufuta dumandu ombu kaga?

¹⁵Jesus anojaba yiri diela besoyi amawaka rie: Mu mbari yi duimbangili? Ndasianu dubongu dumosi.

¹⁶Bamabega dumosi na Jesus amabawivula rie: Yigolini yinyi na bisonu binyi bivu muna? Bamamuwaka rie: Kaga.

¹⁷Mbana amabatsingula rie: Kabogu veganu abi kaga ombu kaga na abi Nsambi ombu Nsambi. Kabusulu tsiandi tsimabakambisa.

¹⁸BaJuif bamosi abamaba baSadducee bamawenda ombu Jesus. (Jogu abevosi yiri abamafu bagorambuga.) Bamavosa nandi rie:

¹⁹Mulonsi, Moise amatusila diruma diedidi rie: Pa mutu amafu nosila mugatsi agusakabura baana, muana nguji andi amuweli yiri baburili mutu agumafu baana.

²⁰Vamaba yisambuali yibaana banguji. Agutega amawela mukuili eni na amafu tsiri ubura baana.

²¹Agumubeji amabialila mukuili, aguna anofu agumurieru amamubialila.

²²Dimaba munongu mosi te na yisambuali yiotsu bamafu tsiri ubura baana. Mbana mugetu wandi amafu.

²³Kabogu ava durambugu duabafu mugatsi nyi oba? Jandi asamaba mugatsi uyisambuali yiotsu?

²⁴Jesus amabagabusila rie: Duna mbela mu mbari dugetsiyisi Bisonu na dusakajaba mangolu maNsambi.

²⁵Mu mbari ava durambugu duabafu babaala bagomuewela bagatsi na bagetu bagomueba na balumi tumba boba nana biansa.

²⁶Mu diambu didurambugu duabafu jenu mbe dusakaranga mu dibuku diMoise ava amabila o yivala? Nsambi amavosa na Moise rie: Menu la Nsambi Abraham na Nsambi Isaac na Nsambi Jacob.

²⁷Jesus amabuesa rie: Nsambi agaa Nsambi jibatu abafu tumba jibatu abavu monyu. Jenu dumatsimbu puela!

²⁸Mulonsi umigaga umosi amagulu ava betsundili. Anogulu yiri Jesus amawagula baSadducee buranga amamuwivula rie: Va gari maruma motsu diruma yi diviolili motsu?

²⁹Jesus amamugabusila rie: Diruma adiviolili motsu adidi rie: Guluanu Israel! Fumu Nsambi etu avu Fumu mosi buandi.

³⁰Ronda Fumu Nsambi agu na murima agu uotsu na matasa magu motsu na mangolu magu motsu.

³¹Adimubeji adidi rie: Ronda mutu nagu iiana guikerondila. Vagaa diruma disusu adiviolili mana mabeji.

³²Mulonsi eni amavosa na Jesus rie: Nyiina, anana Mulonsi! Ngensa gutsivosa rie: Fumu Nsambi avu umosi buandi na vagaa Nsambi jisusu, yika jandi.

³³Kabogu mutu arondi Nsambi na murima andi uotsu na matasa mandi motsu na mangolu mandi motsu na arondi mutu nandi nana ekerondila. Uviolila ubueji udedila maruma memama mabeji tsiri ubeganga bibulu biunyensa pagu ombu Nsambi nesi umuvagulilanga pagu tsiotsu tsisusu.

³⁴Jesus anogulu yiri mutu eni amawagula na diela amamutsingula rie: Gugaa vala ujaba Durumu duNsambi. Banogulu dionyi bamagaangu leli.

³⁵Ava Jesus amalonsila o Ndagu Nsambi amawivula rie: Dibandu yi milonsi mimigaga belonsili rie: Christ aji Muana David.

³⁶Jaʼ beni David ava amagaangulu na mangolu maYinyunyi ayiruyili ombu Nsambi amavosa rie: Fumu amavosa na Fumu ami rie: Ndeʼ tsana va mabaala mami te na nyusunsa batu abeguvini o tsi durumu duagu.

³⁷Jaʼ beni David emunengili Fumu kabogu tsie abila muana andi? Batu bapuela bamagulungu Jesus na nsangu.

³⁸Ava Jesus amabalonsila amavosa rie: Lubuganu mu diambu dimilonsi mimigaga abelingi na bilinga bisakama uyenavegu mambolu mu migungi.

³⁹Berondi bitsiga bibatu baneni o Mandagu maBibenguna, nesi o milambu.

⁴⁰Ne bediongi bakuili adina digebakambisi usambila tsambu tsiogu tsisakama. Ka muna mukilu gu bokilusu!

⁴¹Mbana Jesus amatsana va gusu yisuegulu yimbongu na amagengila nana batu bamapodulila mbongu. Bisina bipuela bimapodula mbongu tsipuela.

⁴²Vamaruga yijaga yimukuili wandi, amapodula mikuti mibeji muna.

⁴³Mbana Jesus amanengila badukitsi bandi na amabatsingula rie: Ngensa nyidutsinguli rie: Yijaga yieni yimukuili atsipodula uviolila botsu basusu.

⁴⁴Botsu bana batsivega atsitsisialulu banomana nsala tsiogu tumba jandi atsivega tsiotsu atsibetsi nandi.