Read Punu Marc 14 Bible Online

Marc 14 - Punu bible

Marc 14

¹Bivunda bibavagulitsi bapagu na milonsi mimigaga banojaba yiri vamasiala yika bilumbu bibeji te na feta jimapa magambu na dufunusu ajinengulu Paque, bamaronda uboka Jesus o musuega.

²Bamavosa rie: Tuyadivaga mu temu feta mu mbari batu bakevaga nguba.

³Ava Jesus amabila o Bethanie o ndagu Simon agumaba na nyambi, mugetu amabarasuna ava betsanini va tavula. Amabega muyombu udufunu duneni; amadibula yirura na amawitila muyombu va julu muru uJesus.

⁴Bamosi bamavosa na kabu rie: Dibandu yi uibungulu nana?

⁵Mbe umasumbusu mbe tumadila kama yirieru tsimbongu tsilora jivema uvega ombu bijaga. Bamasiemba mugetu eni na mangolu.

⁶Tumba Jesus amavosa rie: Mudundianu! Dibandu yi duimulasili maguga? Jandi atsipayila diambu diboti.

⁷Bijaga bivu nenu temu tsiotsu na durungula ubavayila maboti nana duirondili, tumba menu ngoba nenu temu tsiotsu.

⁸Jandi atsivaga adi atsirungulu; amakekotsila muyombu ukunsa dunyuru duami te na dutsigu.

⁹Ngensa nyidutsinguli rie: Mbura tsiotsu atsi Musamu Uboti usamunu te na malongu motsu adi mugetu egugu atsipayila diurangumunungu.

¹⁰Judas Iscariote umosi va gari digumi na badukitsi babeji amawenda ombu bivunda bibavagulitsi bapagu uyekunsa kwakusulu Jesus.

¹¹Banomana umugulu bamalaba nsangu na bamavangana umuvega mbongu. Ubongila va temu eni Judas amaketanga Jesus umuwakisa ombu gogu.

¹²Badukitsi baJesus banolaba yiri yilumbu yitega yifeta jimapa magambu na dufunusu yimatola, ayi bamabokila yindombu, bamamuwivula rie: Agunyi guirondi tuyegulambila Paque?

¹³Jesus amasindiga badukitsi bandi babeji na amabalonsa rie: Wendanu o musiengi, dubenguna na dibaala adiwendi na tsuva mamba. Mudukianu,

¹⁴ava okotila o ndagu dukavosa na odila ndagu rie: Mulonsi ewivuli rie: Jetu na badukitsi bami tugodila mbura aji tulila Paque?

¹⁵Na odulonsa yibuku yineni yiminsu ayi julu; amuna dulambila biguji biPaque.

¹⁶Banowenda bamarasuna motsu nana Jesus amavosila na bamayelamba biguji biPaque.

¹⁷Ava tsisiga Jesus amaruga na digumi na babeji.

¹⁸Ava bamatsanina va tavula uji, Jesus amavosa rie: Ngensa nyidutsinguli rie: Umosi va gari enu oyiji nami, omfunda.

¹⁹Badukitsi bamalaba munyongu na bamamu wivula umoʼ umosi rie: Je menu?

²⁰Jesus amabawaka rie: Va gari enu, digumi na babeji, voba umosi agubotiga dipa nami mu yipela. La jandi!

²¹Muana Mutu ofu nana Bisonu bisonugulu tumba ka muna maguga ma dibaala adifundi Muana Mutu olaba! Mbe diwelimina yiri dibaala dieni asamaburu.

²²Uji beji na Jesus amabonga dipa; anogabusila Nsambi diboti amadibukula na amabagabila novosa rie: Dibongianu, adudu la dunyuru duami.

²³Mbana amabonga kopa, anogabusila Nsambi diboti, amabavega jionyi, jogu botsu bamanu.

²⁴Amabaisingula rie: Amama la malungu mami amamawitulu mu diambu dibapuela; malurigu mami amedugusu pangini Nsambi.

²⁵Ngensa riyidutsinguli rie: Ngomuenu mamba mamilunda te na nyumanu ava Durumu duNsambi dujabununu.

²⁶Banomana uwimbila nyimbu tsifeta, bamawenda o julu mukongu umiOlive.

²⁷Jesus amatsingula badukitsi bandi rie: Jenu botsu dutina mu mbari Bisonu bisonugu rie: Nyuboka mubungulitsi bindombu na bindombu biupansiga yiari na yiari.

²⁸T umba ava nyurambuyila o dufu nyudureyila o Galilee.

²⁹Pierre amamutsingula rie: Menu ngogurina, via, ne pa botsu basusu bodivaga.

³⁰Jesus amamuwaka rie: Kebana Pierre! Ne koku akavosa temu beji mukolu egugu, guvosa temu yirieru rie: Ngemujabi!

³¹Tumba Pierre amamuewaka rie: Tsatsabi! Ngogugala ne pa vengu nyufu nagu! Badukitsi botsu bamavosa munongu mosi.

³²Mbana bamatola o mbura ajinengulu Gethsemane na Jesus amatsingula badukitsi bandi rie: Tsananu vava, nyuwenda o gusu uyesambila.

³³Abamawenda nandi o gusu yika Pierre na Jacques na Jean. Amalaba keri na goma

³⁴na amabalonsa rie: Nyigulu tindi munyongu. Sialanu vava duyawenda bilu.

³⁵Mbana amakakana nogu nana vava na vana na amagudama va tsi; amasambila rie: Pa divu diwelimina, nyiyalaba maguga madiweru diedidi.

³⁶Amabuesa rie: Tata motsu morungulu nagu! Pa guisingi, nyiyanu kopa ejiji jimaguga! Tumba tsiri duganu duami aduvagu, aduagu duvagu.

³⁷Mbana amagabuga ombu badukitsi beni barieru na amabarasuna bilu, amavosa na Pierre rie: Simon, yilu guiwendi! Gugaarungula umoga ne diweru dimosi!

³⁸Duyawenda bilu, sambilanu yiri dumangu dugoduviolila. Mirima mienu misingi tumba nyuru tsienu tsivu tsideda.

³⁹Amamuekakana nogu na amasambila munongu mosi.

⁴⁰Anogabuga ombu badukitsi amamuebarasuna bilu, misu yika timbila! Bamabasa na yisonyi.

⁴¹Anogabuga kumbu ajimurieru amavosa nogu rie: Sie wendianu bilu na vumanu! Vana dedi! Diweru dimatola. Labanu Muana Mutu amavegu ombu bavayitsi bamasumu.

⁴²Relamanu, tʼwendianu! Labanu oyimfundisi amaruga.

⁴³Yika uvosa evosi na Judas, umosi va gari digumi na badukitsi babeji, amaruga na batu bapuela abamaba na majenga na banguangu. Bamasindugu na bivunda bibavagulitsi bapagu na milonsi mimigaga na bivunda bisusu.

⁴⁴Judas amabavega yilimba kala rie: Agu nyubumba la jandi agu duirombi. Mugaangianu na mubeyianu o dimbu.

⁴⁵Yika Judas etoli ombu Jesus amavosa rie: Mulonsi! Mbana amamubumba.

⁴⁶Kabogu batu beni bamagaanga Jesus na bamamutunga mikudu.

⁴⁷Umosi agumaba vana, amasomuna dijenga na amatabula musalitsi uyivunda yibavagulitsi bapagu dituji.

⁴⁸Jesus amabawivula rie: Diwelimina yiri dukaangila nana begaangili yikongu na majenga na banguangu?

⁴⁹Yilumbu na yilumbu nyibetsi nenu o Ndagu Nsambi na dusamakaanga Mbukua, vagaa diambu, vengu Bisonu biudugusu.

⁵⁰Mbana badukitsi botsu bamamurina.

⁵¹Mufudu umosi amamuduka agumaduara yika tsanda. Mbe bamamugaanga

⁵²tumba amarina penyi, jogu bamasiala yika na tsanda andi.

⁵³Bamatolisa Jesus o ndagu yivunda yibavagulitsi bapagu, aguna bamarasuna bivunda bibavagulitsi bapagu na bivunda bisusu na milonsi mimigaga.

⁵⁴Pierre amayenabadukanga vagegeyi. Muji umabangusu va dulombili duyivunda yibavagulitsi bapagu; Pierre amatsana na basalitsi botsu na bamagoranga muji.

⁵⁵Bivunda bibavagulitsi bapagu na bivunda biotsu bisusu bamaronda ufunda Jesus nomuvega mbela dufu tumba basamadila ne diambu dimosi.

⁵⁶Bambeji bapuela bamamana miunu miogu tumba misamaba kingu mosi.

⁵⁷Bamosi bamafurila Jesus rie:

⁵⁸Jetu tumagulu ava amavosila rie: Nyupansa Ndagu Nsambi ejiji ajimarungu na batu. Yiotsu ayi bilumbu birieru biusukila nyukemanina jisusu ajigorungu na batu.

⁵⁹Tumba ne jogu wogu basamaba na kingu mosi.

⁶⁰Mbana yivunda yibavagulitsi bapagu amarelama va gari abamabenguna na amawivula Jesus rie: Gugewaguli? Gugegulu begufuengilili?

⁶¹Tumba Jesus amavola sui na asamawaka ne dimosi. Yivunda yibavagulitsi bapagu amamuemuwivula rie: Ndeju la Christ, Muana Nsambi?

⁶²Jesus amagabusila rie: Nyiina, o gusu dulaba Muana Mutu atsana va mabaala maNsambi na osunduyila o julu va gari mamungi.

⁶³Mbana yivunda yibavagulitsi bapagu amapasa biduaru biandi na amagamuga rie: Tugomueromba bambeji basusu!

⁶⁴Jenu dutsimugulu elensi Nsambi. Bunsonsi yi dumutabulila? Botsu bamavosa kingu mosi rie: Ana mbela, afuangingi!

⁶⁵Bamosi bamamufuta mateji, basusu bamamukubiga yinsi na banomudimba bamamuwivularie: Jabati! Anyi atsigudimba? Bakelisi batsugu banomudila bamamudimba mambata.

⁶⁶Pierre aki va dulombili ava mugetu agumaba musalitsi uyivunda yibavagulitsi bapagu amavioyila.

⁶⁷Anolaba Pierre agumagoranga muji amamugengila yisuisu novosa rie: Ndeʼ wagu gubetsi na Jesus muisi Nazareth, mbe?

⁶⁸Tumba amagala rie: Ngemujabi! Ngegulu adi guivosi. Mbana amayenalinganga va piasu. Koku yika uvosa evosi.

⁶⁹Musalitsi eni anomulabilila amavosa na jogu abamaba vana rie: Jandi guna aji mutu ogu.

⁷⁰Tumba Pierre amamuedigala. Mua pesu temu abamaba vana bamamuevosa na Pierre rie: Guyagala, guji mutu ogu mu mbari guji muisi Galilee.

⁷¹Mbana Pierre amaleva rie: Nsambi ejabi! Ngemujabi!

⁷²Vana vanakoku jimavosa temu ajimubeji. Pierre amarangimina adi Jesus amamutsingula rie: Nesi koku akavosa temu beji gukala kumbu yirieru. Anodirangimina amalilanga.