Read Punu Marc 15 Bible Online

Marc 15 - Punu bible

Marc 15

¹Muna kedi bivunda bibavagulitsi bapagu na bivunda bisusu na milonsi mimigaga na bivunda bineni biotsu bamabenguna va mosi uyemugelila yinsima. Banomana utunga Jesus bapanga bamamubega ombu Pilate.

²Pilate amamuwivula rie: Ndeju la kaga jibaJuif? Jesus amamugabusila rie: Ndeʼ beni gumadivosa.

³Bivunda bibavagulitsi bapagu bamamufuengilila mambu mapuela.

⁴Pilate amamuemuwivula rie: Gugewaguli ne dimosi? Gugegulu begufuengilili?

⁵Tumba Jesus amamuebusa uwagula; Pilate amakambulu mu dionyi.

⁶Kadi feta Paque, Pilate amabapalisilanga muisi tsugu agu batu bamarondanga.

⁷O tsugu vamaba mutu, diina diandi Barabbas, jogu na bambatsi bandi bamaboka mutu mu nguba.

⁸Batu bamabenguna ombu Pilate na bamamuwivula uvaga ama amabavayilanga na kala.

⁹Pilate amabawivula rie: Duirondi yiri nyudupalisila kaga jibaJuif?

¹⁰Amajaba yiri bivunda bibavagulitsi bapagu bamafunda Jesus mu diambu didiwavi.

¹¹Tumba bivunda bibavagulitsi bapagu bamatsagumusa yinombu yiri bowivula Pilate ubapalisila Barabbas.

¹²Pilate amamuewivulayinombu rie: Kabogu yi duirondi yiriiiyuvaga na jandi agu duinengili kaga jibaJuif?

¹³Bamamuegamuga rie: Mugomini va kurusu!

¹⁴Pilate amabawivula rie: Dibi yi atsivaga? Tumba bamaviolila ugamuga rie: Mugomini va kurusu!

¹⁵Pilate amaronda ulasa batu ubueji kabogu amabapalisila Barabbas. Amadimbisa Jesus mikasa mbana amamuwakisa ugomunu va kurusu.

¹⁶Bagora bamabega Jesus o gari ndagu (diwendi rie: o ndagu yivunda yibulongu) aguna dibuli diotsu dimabenguna va mosi.

¹⁷Bamamuduisa yijungi yibenga na bamavasa dugaba dumatsiendi adu bamamuduisa.

¹⁸Mbana bamamuvega mbolu rie: Mbolua kaga jibaJuif!

¹⁹Bamamudimba na nguangu va muru na bamamufuta mateji, bamakutama na bamagudama va gusu andi.

²⁰Banomana umudesanga bamamuvula yijungi yibenga na bamamuemuduisa biduaru biandi mbana bamamubega uyegomunu va kurusu.

²¹Ava bamabila mu nsila bamabenguna na mutu diina diandi Simon agumaruyila o musiru. Bagora bamamutsotsa ubega kurusu Jesus. Simon eni amaba muisi Cyrene taji andi Alexandre, muana nguji andi Rufus.

²²Mbana bamabega Jesus o Golgotha, divindugulu rie: mbura dubengili.

²³Jogu bamamuvega dive dinganyi tumba amadibusa.

²⁴Mbana bamamugomina va kurusu na banobuaga mbanda ujaba banyi bodila biduaru biandi, bamabigabana.

²⁵Dimaba kedi mbe wisi usakamata puela ava bamamugominina va kurusu.

²⁶Mambu memama mamasonu va kurusu rie: Kaga jibaJuif.

²⁷Yiari na yiari bamagomina bikongu va bakurusu; umosi va mabaala mandi na ususu va magetu mandi. [

²⁸Anana Bisonu bimadugusulu rie: Amarangu va mosi na batu babi.]

²⁹Ava batu bamavioyilanga bamamusienga na bamamuangisa miuru na bamagamuga rie: Ndeʼ aguvu na mangolu upansa Ndagu Nsambi nomuejirunga mu bilumbu birieru,

³⁰kegobula, sunduga!

³¹Bivunda bibavagulitsi bapagu na milonsi mimigaga wandi bamamudesanga rie: Jandi agumagobula basusu agorungula ukegobula?

³²Tsie tulabatianu Christ, kaga jiIsrael, nana esunduyili va kurusu mbana tumuvayila yitu! Jogu abamagomunu nandi bamamusienga wandi.

³³Ava muangulu bulongu buotsu bumaba yika pisama na pisama te na murekumunu.

³⁴Ava murekumunu Jesus amagamuga rie: Eloi, Eloi, lema sabachthani? Divindugulu rie: Nsambi ami, Nsambi ami, mu mbari yi gumambuayila?

³⁵Bamosi abamaba vana banomugulu bamavosa rie: Guluanu enengili Elie!

³⁶Umosi amawenda mbangu ubasa mutsabu dive dinganyi, amaguvakiga va nguangu. Amagubambasana na munu Jesus mbana amavosa rie: Lekelati tanguji Elie oruga umusundusa.

³⁷Tumba Jesus anogamuga mugamu uneni, amatabuga.

³⁸Dumbu duNdagu Nsambi dumapasiga biasi bibeji, ubandila o julu te no tsi.

³⁹Yivunda yikama bagora ayimaba va nsungisini na Jesus anolaba nana amatabuyila amavosa rie: Dingensa mutu eni abetsi Muana Nsambi.

⁴⁰Vamaba bagetu bamosi abamamukelisa. Va gari ogu vamaba Marie Magdala na Salome na Marie nguji Jacques (aji ngebi) na Joses.

⁴¹Bamadukanga Jesus ava amabila o Galilee na bamamusalilanga. Bagetu basusu bamaba vana abamaruga nandi o Jerusalem.

⁴²Ava tsisiga eni Joseph muisi Arimathee amatola vana. Amaba umosi va gari bivunda bineni. Amavivanga ujaba Durumu duNsambi. Yimaba yilumbu ayi bekunsi Paque (diwendi rie: vendredi). Kabogu amawenda ombu Pilate uyevonda mfumbi.

⁴³

⁴⁴Pilate amakambulu ugulu yiri Jesus amaketabuyila. Kabogu amanengila yivunda yikama bagora na amamuwivula rie: Dingensa amatabuga?

⁴⁵Anogulu munu uyivunda yikama bagora amasingisa Joseph ubonga mfumbi.

⁴⁶Joseph anosumba tsanda amasundusa mfumbi na amajigumba tsanda. Amajitsiga o ngila ajimatobu mu dimanyi mbana amajidibiga na dimanyi dineni.

⁴⁷Marie Magdala na Marie jinguji Joses bamamukelisa kabogu bamalaba ava Jesus amatsigulu.