Read Punu Marc 4 Bible Online

Marc 4 - Punu bible

Marc 4

¹Jesus amamuebanda ulonsa va disimu diyiliba yiGalilee. Batu bapuela bamagukama vana kabogu amanangama o bota na amatsana. Yinombu yiotsu yimasiala va disimu.

²Jandi amababuayila banongu bapuela ubalonsa. Amavosa rie:

³Guluanu! Mukukitsi amawenda ukuka tsangu tsiandi.

⁴Ava amakukilanga tsangu tsimosi tsimabonduga va nsila. Batsoli bamayetsidoda.

⁵Tsimosi tsimabonduga va yilala yimamanyi, tsimasundila ubenda.

⁶Tumba nyangu jinobala tsimanyensa na tsimagumuga mu mbari ngansi mbe tsisakafuna.

⁷Tsimosi tsimabonduga va gari ngansi tsimatsiendi: ngansi tsieni tsimabenda na tsimatutsa bivaru la dibandu bisamamuebura.

⁸Tsimosi tsimabonduga va butamba buboti: tsimabendisa bivaru bipuela abimabura milunda: bimosi magumarie-marieru, bisusu magumasia-masiamunu na bisusu kama kama.

⁹Mbana Jesus amavosa rie: Jenu adugaa madiba guluanu!

¹⁰Jesus yika utsana etsani na batu bamosi abamagulu banongu, bamagabuga va mosi na digumi na babeji yiri obavindiyila banongu.

¹¹Amabagabusila rie: Ombu genu dumatsingulu diambu adisakajabunu diDurumu duNsambi tumba ombu jogu abasakakota mu muyitsa egugu motsu mevosulu na banongu.

¹²Diwendi rie: Begengila yika ugengila tumba bagelabi, begulu yika ugulu tumba bagetsiyisi, mbe bobatsiyisa mbe bokalula diela na Nsambi mbe obatanda masumu mogu.

¹³Amamuebawivula rie: Jenu dugejabi divindugulu dinongu ejiji? Kabogu tsie dujabila divindugulu dibanongu basusu?

¹⁴Mukukitsi la jandi oyisamuni Mambu maNsambi.

¹⁵Bamosi bavu nana atsimabonduga va nsila; belegulu Mambu maNsambi mbana Satan ebagungisi yiri amamalonsu motsiemuga.

¹⁶Basusu bavu nana tsangu atsimabonduga va yilala yimamanyi; ava begululu malongi belemadila na nsangu.

¹⁷Tumba mbe masakakota viri kabogu bededi. Diwendi rie: ava belabili maguga vo dikuana mu diambu dimalongi besundili udeda.

¹⁸Basusu bavu nana atsimabonduga va ngansi tsimatsiendi. Jogu begulu malongi

¹⁹tumba mitatu mitemu ejiji na durondu dumbongu na dunyungi bitutsi malongi na bagefuningi.

²⁰Basusu bavu nana atsimabonduga va butamba buboti. Begulu malongi, bemadili na befuningi: bamosi magumarie-marieru, basusu magumasia-masiamunu na basusu kama kama.

²¹Amamuebawivula rie: Batu bebangisi paga ujisuega o tsi ponsi vo o tsi tangi? Tsia uyivakiga va dingasa?

²²Vagaa diambu adimasuegu adigojabunu na vagaa fundu ajigowansulu muansu.

²³Jenu adugaa madiba guluanu!

²⁴Jesus amabuesarie: Lubuganu! Migaga ami duitabulili basusu bunsonsi amina Nsambi odutabulila bunsonsi wandi; jandi agaa na yimbambila.

²⁵Kabogu ona yima obuesu yisusu tumba ogaa na yima opatulu ne ayi etasi ayivu nandi.

²⁶Jesus amabuesa uvosa rie: Durumu duNsambi duvu nana rie: Mutu etsoki putu o nungi andi.

²⁷Ewendi yilu, emoyi, nyangu jibali, wisi uitsimi na yiotsu yina bivaru bibendi. Mutu eni agejabi nana bibendili.

²⁸Yika butamba buibendisi bivaru na buibiveyi mangolu ubura: tetega yirongula, mbana muiri, mbana bisuli.

²⁹Ava putu tsimawelila mutu ebandi utsidokula mu mbari diweru diudokula dimatola.

³⁰Jesus amamuewivula rie: Na yi tubagusunu Durumu duNsambi? Nongu yi tubuaga ulasa nana dubila?

³¹Duibagunu na tsangu jimutarada ajivu jigeyi uviolila tsangu tsiotsu.

³²Mutu ojikuka na jiubenda nonega uviolila bivaru biotsu na bitayi biuwala te na biveyi yivosi na batsoli borungula urunga muva muna.

³³Jesus amabuayila batu banongu bamunongu na munongu ubalonsa malongi mandi; asamarangisa mambu uviolila diela diogu.

³⁴Ava amabila va mosi na batu basusu amalonsanga yika na banongu tumba anokakana nogu amabavindiyila badukitsi bandi.

³⁵Vana tsisiga eni Jesus amatsingula badukitsi bandi rie: Tʼwendianu o disimu dina.

³⁶Banoganina batu bamanangama mu bota va mosi na Jesus. Vamaba bota tsisusu atsimafubana konga nogu.

³⁷Mungudi uneni umagumba na mingiba mimabubasa bota.

³⁸Jesus amaba yilu o matina mabota. Badukitsi bamamurambusa na bamagamuga rie: Fumu, rambuga yika ufu tukafuanu!

³⁹Jesus anorambuga amaruma punga rie: Vola sui! Punga jimavola na duvotsu dumaba duneni.

⁴⁰Mbana Jesus amabawivula rie: Dibandu yi duilabili goma? Dibandu yi dugaa na yitu?

⁴¹Bamagaangu na goma na bamawivusana rie: Munongu mutu yi avu? Nesi punga na mingiba bimudedili?