Read Punu Marc 6 Bible Online

Marc 6 - Punu bible

Marc 6

¹Jesus amagusuga vana na amagabuga o yiari ayi amabanguyila; badukitsi bandi bamawenda nandi.

²Yilumbu yitsona amalonsa o Ndagu Yibenguna. Batu bapuela bamaba guna. Banomugulu bamakambulu na bamawivula rie: Diela yi divu nandi? Tsie evayili bimaga biebibi?

³Jandi tsia muvalitsi, muana uMarie, muana nguji Jacques na Joses na Jude na Simon? Bibusi biandi bigaa netu vava? Kabogu bamamulensa.

⁴Jesus amabawaka rie: Dingensa mubiyitsi eyitsu o biari biotsu bisusu, yika o yiari yiandi nombu biburu biandi elensu.

⁵Kabogu asamarungula uvaga bimaga vana, ne nana amabelusa bibedu bimosi abi amasakiga miogu.

⁶Amakambulu mu mbari basamamuvayila yitu. Mbana Jesus amawenda o mimbu amamaba yiari na yiari uyelonsa batu.

⁷Amanengila digumi na babeji na amabagabila mangolu upalisa binyunyi bibi mbana bamayenalinganga babeʼ babeji.

⁸Amabatsingula rie: Ava duilingili, beganu yika duvengu, duyabega nesi biguji nesi komi nesi mbongu.

⁹Duaranu bapondu na duyamuebega bikutu bibeʼ bibeji.

¹⁰Mbana amabatsingula rie: Mu mandagu ama dukota, tsananu muna na amuna durambiyila wandi.

¹¹Pa batu bagedudili, gusuganu mu musiengi eni na bagandilianu rie: Tugomueruga gimu: dionyi diubalubusa.

¹²Kabogu bamayenawendanga na bamalonsanga yiri batu bakaluli diela.

¹³Bamapalisa binyunyi bibi bipuela, bamasinga bidedu bipuela matsi na bamababelusa.

¹⁴Kaga Herode amagulu motsu mu mbari diduma diJesus dimanyavanga. Bamosi bamavosa rie: Kabogu Jean Baptiste amarambuga o dufu, la dibandu mangolu mavu nandi.

¹⁵Basusu bamawaka rie: Aguna Elie. Na basusu bamavosa rie: Aguna mubiyitsi nana babiyitsi abamarela.

¹⁶Tumba Herode anodigulu amavosa rie: Aguna Jean Baptiste! Nyimamutabusa muru, kabogu amarambuga!

¹⁷Diwendi rie: Jaʼ beni Herode amalegaanga Jean mbana amamukotisa o tsugu. Amadivaga mu diambu diHerodiade jimugatsi Philippe aji muana taji andi. Amamubonga mujeba

¹⁸kabogu Jean amamusiemba rie: Muana taji agu aki monyu kabogu gugaa na musuga ubonga mugatsi andi.

¹⁹Herodiade amanyoyila Jean na amaronda umubokisa tumba asamarungula mu diambu diHerode.

²⁰Herode amadumanga Jean agumaba mutu usungama na uwelimina na amamukelisanga na buranga. Diuleba amaregamanga amagulungu malongi mandi.

²¹Yilumbu ayi Herode amanengila barumitsi na bivunda bibagora na baneni baGalilee uyeji feta jiduburu duandi, Herodiade amadugusu kaka andi.

²²Muana uHerodiade amayina na dionyi dimalasa ubueji ombu Herode nombu bambatsi bandi. Kaga amavosa na numba eni rie: Kwivuli ayi guirondi na nyuguvega yionyi.

²³Amadiwarisa na pesi rie: Ayi gukwivula nyuguvega yionyi ne yiasi yibufumu buami.

²⁴Anopala amawivula nguji andi rie: Yi nyuvonda? Na nguji amamugabusila rie: Muru Jean Baptiste.

²⁵Vana vana jandi amagabuga ombu kaga na amamutsingula rie: Peyi muru Jean Baptiste mu yipela.

²⁶Adina dimatsirisa murima kaga tumba asamarungula umuebusa mu diambu dipesi aji amamulevila va gusu batu.

²⁷Kabogu amasindiga gora uyetabula Jean muru. Gora anotabula Jean muru

²⁸amagubega mu yipela. Amavega muru ombu numba na numba amavega uonyi ombu nguji andi.

²⁹Badukitsi baJean banogulu mfuanga bamawenda uyebonga mfumbi na bamajitsiga.

³⁰Bilumbi bamagabuga ombu Jesus na bamamutsingula motsu ama bamavaga na ama bamalonsa.

³¹Batu bapuela bamaruganga ombu gogu te na basamamuedila ne diweru uji. Kabogu Jesus amavosa nogu rie: Tʼwendianu o kumu uleyevuma.

³²Kabogu bamanangama o bota uwenda o mbura eni.

³³Batu bapuela abamabalaba diwendulu bamarambuyila o misiengi miogu na bamawenda mambangu; bamareyila Jesus na badukitsi bandi.

³⁴Jesus anosunduga mu bota amarasuna yinombu yineni. Amagaangu na yingeba mu mbari amabalaba nderi bindombu abigaa na mubungulitsi. Kabogu amabanda ubalonsa mambu mapuela.

³⁵Ava tsisiga badukitsi bamavosa nandi rie: Wisi umawenda na tuji vala.

³⁶Baganini, bayenawenda o masaku no mimbu amavu bebeli uyesumba biguji.

³⁷Jesus amabagabusila rie: Jenu beni dukabavega biguji. Tumba bamamuwivula rie: Guirondi yiri tunyambasana kama beji tsimbongu tsilora tsivema ubalisila?

³⁸Kabogu amabawivula rie: Mapa kwe mavu nenu? Yelabanu. Banotsuna na buranga bamamugabusila rie: Mapa maranu na nyama tsimamba beji.

³⁹Mbana Jesus amatsingula badukitsi rie: Batsanisianu, maguki maguki mu tsi.

⁴⁰Kabogu bamabatsanisa, masusu kama kama na mamosi magumara-maranu.

⁴¹Mbana Jesus amabonga mapa meni maranu na nyama tsimamba beji na anonangula misu o julu amagabusila Nsambi diboti. Mbana amabukula mapa na amabavega yiri badukitsi bomagabila yinombu. Mbana amagaba nyama tsimamba beji wandi ombu botsu.

⁴²Botsu bamaji na bamagukuru.

⁴³Bamabola bibuku bimapa na banyama; biotsu abimasialulu bimaba biwelimina ubasa digumi na ponsi beji.

⁴⁴Bamaba tosini yiranu tsibabaala abamaji.

⁴⁵Banomana uji Jesus amasindiga badukitsi bandi unangama o bota urela o disimu dimosi o yiari yiBethsaida mbana amaganina batu.

⁴⁶Anobaganina amamata o julu mukongu uyesambila.

⁴⁷Pisama jinosunda bota jimaba o gari yiliba na Jesus aki va disimu.

⁴⁸Amalaba yiri belabi uvura mu diambu dipunga kabogu ava mavuvungi Jesus amalinga va julu mamba, mbe aronda ubavioga.

⁴⁹Banomulaba evioyi va julu mamba bamagamuga rie: Lanu ditengu!

⁵⁰Goma jimabagaanga. Vana vana Jesus amavosa nogu rie: Warisanu mirima! Agu menua! Duyalaba goma!

⁵¹Mbana amanangama o bota nogu na punga jimavola. Badukitsi bamasutu na goma; bamakambulu puela.

⁵²Diwendi rie: diambu diyimaga yimapa disamababemba mirima, dujabu duogu dumaba dugeyi.

⁵³Banosabuga yiliba bamawenda o bulongu buGenesareth na bamayetunga bota.

⁵⁴Yiotsu ayi Jesus esunduyili batu bamamujaba.

⁵⁵Kabogu bamarugasana biari biotsu na bamamubeyilanga bibedu.

⁵⁶Mu mbura tsiotsu atsi Jesus amatolanga, nesi o mimbu nesi o mavula nesi o masaku bamabeganga bibedu yiri borungula ubemba difubu diyiduaru yiandi. Botsu abamadibemba bamabeluga.