Read Punu Marc 7 Bible Online

Marc 7 - Punu bible

Marc 7

¹BaJuif abamaba baPharisie na milonsi mimigaga abamarugasana o Jerusalem bamawenda umoga na Jesus.

²Bamalaba badukitsi bandi uji beji na makaka mamuinsi, diwendi rie: basamagolila mamba nana divu diwelimina na mugaga ubaPharisie.

³BaPharisie na baJuif basusu bamadedila malongi mabivunda, diwendi rie: basamajanganga te na bamagolila mamba.

⁴Nesi biotsu abi bamabeyilanga o dikasa bamalesusanga wandi. Bamaba na migaga misusu amimaruyila ombu bivunda biogu nana divu diwelimina ususa bakopa nesi matsuva nesi bisanga bikunga nesi matangi wandi.

⁵BaPharisie na milonsi mimigaga bamamuwivula rie: Mu mbari yi badukitsi bagu bagekelisi migaga mibivunda tumba beji na makaka mamuinsi?

⁶Jesus amabawaka rie: Ka muna diela di dimaba na Esaie ava amabiyila diambu dienu! Baboti bamiunu, nana amavosila rie: Nsambi amavosa rie: Batu bebaba bekitsi yika na miunu, tumba mirima miogu mivu vala nami.

⁷Yika kulini bekitsili mu mbari bekelisi migaga miogu nderi mivu miNsambi!

⁸Jesus amabuesa rie: Jenu duilensi diruma diNsambi na duidedili malongi mabatu.

⁹Jesus amabuesa disusu rie: Yifu yienu yivu ulensa maruma maNsambi nokelisa amenu.

¹⁰Moise amavosa rie: Yitsa taji agu na nguji. Va julu vana amavosa rie: Jandi oguvosila taji andi na nguji mabi aboku.

¹¹Tumba ombu genu duisingi yiri mutu ovosa rie: Abi mbe nyivega tata na mama, nyimabavagula ombu Corban (divindugulu rie: pagu ombu Nsambi).

¹²Kabogu mutu eni agomyewamusa taji na nguji.

¹³Mu dionyi duilensi Mbembu Nsambi na duisakiyi malongi menu; duivayingi mambu mapuela mamunongu egugu.

¹⁴Jesus amamuenengila batu na amabatsingula rie: Guluanu na jabanu adidi rie:

¹⁵Vagaa yima ne yimosi ayiukota o munu mutu ayiurungula umubivisa; tumba amemupalili amana memubivisi. [

¹⁶Jenu adugaa madiba guluanu!]

¹⁷Ava Jesus amaganina yinombu amakota o ndagu na badukitsi bandi bamamuwivula divindugulu dinongu eni.

¹⁸Amabawaka rie: Kabogu jenu wenu dugaa na diela! Dugegulu! Vagaa yima ne yimosi ayikoti o munu mutu ayiurungula umubivisa!

¹⁹Diwendi rie: yigekoti o murima andi tumba yikoti o moji, mbana yinyaku. (Na mambu memama amalonsa yiri biguji biotsu bivu biwelimina uligu.)

²⁰Amamuevosa rie: Amepali o munu mutu amana memubivisi.

²¹Mu mbari motsu mebandi o murima mutu ne matasa mabi ne bumbembu ne bupumbi ne bukongu ne udaga

²²ne dunyungi na bukanyi na ndunsulu ne dilensa ne ngusu ne matamba ne dunangu ne buduka;

²³motsu mana mepalili o murima mutu na memubivisi.

²⁴Jesus amagusuga vana na amawenda o yiari yiTyr. Anokota o ndagu mbe aronda yiri mutu ayadijaba tumba dimajabunu.

²⁵Vana vana mugetu agumaba na muana umugetu agumaba na yinyunyi yibi amaruga nokutama va gusu Jesus mu mbari amalegulu diduma diandi.

²⁶Mugetu amaba muenyi agumaburu o Phenicie o bulongu buSyrie. Amalenda Jesus rie: Muana ami umugetu ana yinyunyi yibi, kokolu yipalisi!

²⁷Jesus amamuwagula rie: Dundati, baana balegukuru; digaa diwelimina ubonga biguji bibaana nobibuayila bamondi.

²⁸Mugetu eni amamugabusila rie: Adi guivosi divu dingensa tumba bamondi bageji bikukuku abilagumuyi ava baana belili?

²⁹Mbana Jesus amamugabusila rie: Wenda! Mu diambu dikabusulu eni yinyunyi yibi yimapala. Muana agu aka polu.

³⁰Kabogu anogabuga o ndagu andi amarasuna muana asilama va tangi, ngensa yinyunyi yibi yimapala.

³¹Jesus amagusuga o Tyr na amawenda o Sidon mbana amagabuga o yiari yiyiliba yiGalilee te na amavioga o yiari yiDigumi Dimisiengi.

³²Bamamubeyila dibaba na bamamuwivula umusakiga miogu.

³³Jesus amamukakasana mua vala na batu. Amamusoma milembu mu matuji; amafuta mateji na amabemba dulimi dudibaala.

³⁴Mbana Jesus amabuaga misu o julu; amatsukama na amavosa na dibaba rie: Effata, diwendi rie: panduga.

³⁵Vana vana matuji mandi mamapanduga na dulimi duandi dumanyanguga; amavosa na buranga.

³⁶Jesus amabagandisa yiri bayadinyavisa; diuleba amabagandisa bamadijabisa ombu botsu.

³⁷Botsu bamakambulu puela na bamavosa rie: Jandi evayi motsu mawelimina; egulusu ne madiba novosisa mababa.