Read Punu Luc 1 Bible Online

Luc 1 - Punu bible

Luc 1

¹Ombu Theophile! Bapuela bamasona miganda mu diambu dimambu amamalabana va gari etu.

²Bamasona nana jogu abamaba basalitsi baMambu maNsambi ubanda va dibandu nana bamamalabila na nana bamavosila.

³Kabogu Theophile menu wami nyilabi ubueji ugusonina mambu meni nana mamabila ubanda va dibandu.

⁴Nyimamakelula, kabogu jaba yiri ama guranga mavu mangensa.

⁵Motsu mamabanda mu temu Herode amaba kagao Judee. Vamaba muvagulitsi upagu, diina diandi Zacharie agumaba mu yinombu yibavagulitsi bapagu baAbia. Mugatsi andi Elisabeth amaba mutegula uAaron agumaba muvagulitsi upagu utega.

⁶Jogu botsu babeji bamaba basungama va gusu Nsambi, bamadedila migaga miotsu na maruma motsu maFumu.

⁷Basamaba na baana mu mbari Elisabeth amaba yinguma; va julu vana botsu babeji bamakenunina.

⁸Kabogu yilumbu yimosi Zacharie amavagula pagu ombu Nsambi mu mbari yimaba yilumbu yiandi.

⁹Mu temu eni bavagulitsi bapagu bamabuaga mbanda Ujaba yilumbu ayi mutu mutu ovagula pagu.

¹⁰Kabogu jandi amakota uyevagula pagu ombu Fumu ava batu bamamukelila va gusu kana.

¹¹Mbana yiansa yiFumu yimalabana ombu Zacharie; yimarelama va mabaala mayinyensulu yipagu.

¹²Zacharie anoyilaba amaregama na goma jimamugaanga.

¹³Tumba yiansa yimamutsingula rie: Zacharie guyalaba goma! Nsambi amagulu tsambu tsiagu na mugatsi agu Elisabeth oguburila muana udibaala. Diina diandi diuba Jean.

¹⁴Guba na nsangu jineni na batu bapuela bosangila mu diambu diduburu duandi.

¹⁵Jandi oba muneni va gusu Fumu. Agonu malamu ne minongu miotsu amilansi. Obasu na Yinyunyi yiNsambi ne akaburu.

¹⁶Ogabusa baIsrael bapuela ombu Fumu Nsambi ogu.

¹⁷Oba yilumbi yiNsambi na mangolu mandi moba dedi na maElie. Ogusula yikenganyi va gari bataji na baana; olonsa abelensi migaga miNsambi yiri bomuebanganga basungama; olubusa batu baFumu yiri obarasuna bakunsama.

¹⁸Zacharie amawivula yiansa rie: Tsie nyujabila yiri dingensa guivosi? Gugelabi yiri nyimanuna na mugatsi ami aji yinunu wandi?

¹⁹Yiansa yimamugabusa rie: Menu la Gabriel oyitsani va gusu Nsambi. Jandi amansindiga uvosa nagu nogutsingula musamu egugu uboti.

²⁰Guitumini paga na mambu amamatabulu kala na gugemavayili yitu kabogu guba dibaba. Ngensa te na yilumbu ayi mambu memama molabana gugobakula ne diambu dimosi.

²¹Yiotsu yina batu bamavivanga Zacharie na bamakambulu mu mbari amatsinga o uvagula pagu.

²²Ava amapalila asamamuerungula uvosa kabogu bamajaba yiri amalaba yiriariamu o Ndagu Nsambi; amavosanga nogu yika na milembu mu mbari amaba dibaba.

²³Anomana temu andi uvagula pagu amagabuga o dimbu diandi.

²⁴Mua temu jinovioga mugatsi andi Elisabeth amadila dimi na amakesuega te na tsungi yiranu; amavosa rie:

²⁵Laba adi Fumu amapayila. Ngensa amakusula yisonyi va misu mabatu.

²⁶Mu tsungi jimusiamunu jidimi diElisabeth, Nsambi amasindiga yiansa Gabriel o Nazareth o Galilee.

²⁷Yimawenda na bulumbi ombu tsiemi ajimakumu na dibaala diina diandi Joseph agumaba mu yifumba yiDavid. Tsiemi eni diina diandi Marie.

²⁸Yiansa yimalabana nandi novosa rie: Buega, Fumu aji nagu! Amagugabila miula!

²⁹Marie amaregama na amakambulu mu diambu dibuega eni.

³⁰Yiansa yimamutsingula rie: Guyalaba goma mu mbari Nsambi amagugabila miula.

³¹Gulu, gudila dimi na gubura muana dibaala, diina diandi diuba Jesus.

³²Oba muneni na onengulungu Muana Nsambi aguvu uneni. Fumu Nsambi omuvega durumu dutaji andi David.

³³Orumanga batu baIsrael mutubu na durumu duandi dugovioga.

³⁴Marie amawivula yiansa rie: Tsie diurungulila uba vana nyisakajaba dibaala?

³⁵Yiansa yimamugabusila rie: Yinyunyi YiNsambi oruga ombu gagu na mangolu maNsambi aguvu uneni mogukelisanga. La dibandu muana onengulungu Muana Nsambi.

³⁶Legulu disusu: muana nguji agu Elisabeth, diuleba bamamunengilanga yinguma aka na dimi ditsungi yisiamunu nesi mu bununu buandi.

³⁷Vagaa diambu divura ombu Nsambi.

³⁸Kabogu Marie amavosa rie: Menu nyiji musalitsi uFumu, apayili nana guivosili. Mbana yiansa yimamusila.

³⁹Vana vana Marie amasundila uwenda o yiari yimikongu o Judee.

⁴⁰Amakota o ndagu Zacharie; jogu na Elisabeth bamabumbasana.

⁴¹Ava Elisabeth amagululu diufi diMarie, muana andi amakunga o gari moji. Vana vana Elisabeth amabasu na Yinyunyi yiNsambi

⁴²na amagamuga na diufi dineni rie: Nsambi amagugabila miula uviolila bagetu botsu na muana agu gubura oba na miula miNsambi wandi.

⁴³Ka muna ubueji gu nyilabi, laba nguji Fumu ami eruyi ombu gami!

⁴⁴Yika nyigulu diufi diagu muana atsikunga na nsangu o gari moji ami.

⁴⁵Ka muna ubueji gu gulaba mu mbari diambu diFumu adi gumatsingulu diudugusu!

⁴⁶Marie amavosa rie: Nyiyitsi Fumu na murima ami uotsu,

⁴⁷Nyilabi ubueji na Nsambi, Mugobutsi ami.

⁴⁸Amarangimina mua musalitsi andi nana menu. Ubongila namunyi botsu bondengilanga mungo miula,

⁴⁹mu mbari aguvu na mangolu uvaga motsu amapayila diboti dineni. Ngensa diina diandi divu Nsambi.

⁵⁰Elasi yingeba ombu botsu abemudumi.

⁵¹Amalasa mangolu mandi ava amapansila bango dunangu.

⁵²Amasundusa bakaga na amamatisa mavolambombu.

⁵³Amagukurusu jogu abamaguiu nsala na amagabusa bisina yika miogu na miogu.

⁵⁴Amakelisa pangini atsi amavangana na batu baIsrael, asamalibana ubalasa maboti mandi.

⁵⁵Amalasa Abraham na bategula bandi botsu maboti nana amavanginina na bivunda bietu.

⁵⁶Marie amamana tsungi yirieru ombu Elisabeth mbana amagabusila o dimbu diandi.

⁵⁷Diweru diElisabeth dimatola na amabura muana udibaala.

⁵⁸Bambatsi baElisabeth na biburu biandi banogulu nana Fumu amamulasila mangolu mandi bamasangila va mosi nandi.

⁵⁹Bamamureba mu yilumbu yimunana. Mbe baronda umuluga Zacharie, diina ditaji andi.

⁶⁰Tumba nguji andi amabusa, amavosa rie: Diina diandi diuba Jean.

⁶¹Bamawaka rie: Vagaa mutu mu biburu biagu aguvu na diina dieni.

⁶²Kabogu bamavosa na taji andi na milembu ujaba nana omuluyila.

⁶³Zacharie amavonda miganda na amasona rie: Diina diandi diuba Jean. Botsu bamakambulu puela.

⁶⁴Vana vana Zacharie amabanda uvosa na amagabusa diboti ombu Nsambi na diufi dineni.

⁶⁵Bambatsi botsu bamagaangu na goma na misamu mieni mimanyava te no mikongu miotsu miJudee.

⁶⁶Botsu abamamugulungu bamakambulu na bamavosa rie: Tsie muana eni obila? Dimajabunu yiri tindi mangolu maFumu mamamubasa.

⁶⁷Taji andi Zacharie anobasu na Yinyunyi YiNsambi amabiga mambu memama rie:

⁶⁸Diboti ombu Fumu Nsambi Israel mu mbari amalingula nogobula batu bandi.

⁶⁹Amatuvega Mugobutsi aguvu na mangolu agumapalila o ndagu musalitsi andi David.

⁷⁰Va kala babiyitsi bandi bamabiga rie:

⁷¹Jandi amavangana utuwamusa na jogu abetulasi maguga nodetsa batu abetuvini

⁷²nolasa bataji betu yingeba nokelisanga pangini andi.

⁷³Nsambi amavangana na taji etu Abraham

⁷⁴yiri otuwamusa na batu abetuvini notugusula goma yiri tumusalila na mirima misunda

⁷⁵nobanganga basigama na bawelimina va gusu andi te na mutubu.

⁷⁶Na ndeʼ muana ami, gunengulungu mubiyitsi uNsambi aguvu uneni mu mbari gurela Fumu uyenabala nsila andi

⁷⁷na guyenatsingulanga batu bandi yiri obagobula nobatandila masumu mogu.

⁷⁸Nsambi etu ana yingeba na murima udeda. Obatsa yijalala yijulu mu mirima mietu ayiubagunu na yijalala yiwisi.

⁷⁹Ombu jogu abavu o tsi pisama jimasumu na dufu yijalala yimamonutsu ayiutuvotsa mirima.

⁸⁰Muana amabanguganga na amajabanga ukekelisa. Amatsananga o kumu te na yilumbu ayi amalabana ombu batu baIsrael.