Read Punu Luc 12 Bible Online

Luc 12 - Punu bible

Luc 12

¹Mu temu eni batosini batosini babatu bamagungana vana te na bamatsiarasana. Tumba Jesus amalelubusa badukitsi bandi rie: Kebananu na dufunusu dubaJuif abavu baPharisie, diwendi rie: buboti buogu bumunu.

²Vagaa diambu adimasuegu adigojabunu na vagaa fundu ajigovosu va misu mabatu.

³La dibandu motsu ama jenu duvosa mukolu mogulunu va nyangu na ama duvosa o tsi fundu mowansulu muansu.

⁴Bambatsi bami nyidutsinguli rie: Vavu abebuboka buandi; duyabaduma.

⁵Nyudulonsa aguvu uwelimina uduma. Dumanu Nsambi mu mbari pa ebokisi ana musuga ubuaga o bulungi bumuji. Nyiina, divu diwelimina: mudumianu.

⁶Nsambi agelibini ne nsuengi mosi. Tsia tsisumbusu yiranu fura beji, mbeyianu?

⁷Ne jenu, nesi nanga tsimiuru mienu tsimatalu. Kabogu duyalaba goma, jenu batu dugeviolili bansuengi?

⁸Nyidutsinguli rie: Uotsu aguvosa va misu mabatu yiri amafubana murima nami, Muana Mutu omusingisila va gusu biansa rie: Tuji muiima umosi.

⁹Tumba uotsu agukala va misu mabatu, Muana Mutu omugala va gusu biansa biNsambi.

¹⁰Uotsu agulensa Muana Mutu otandu tumba agulensa Yinyunyi yiNsambi agotandu.

¹¹Pa bodusosisa o Mandagu maBibenguna va misu mabatu badiela na barumitsi duyakambulu mu ama duvaga ukekagula vo ama duvosa;

¹²Yinyunyi yiNsambi odulonsa mawelimina uvosa muna diweru dieni.

¹³Mutu umosi va gari ogu amavosa na Jesus rie: Mulonsi, vosa na muana taji ami yiri ogaba disiala ditata etu nami.

¹⁴Jesus amamuwaka rie: Anyi amapega musuga uba nsonsi enu udugabila disiala dienu?

¹⁵Mbana amatsingula botsu rie: Kebananu duyanyiganga mu mbari anyi esumbi muvumu, ne pa ana busina buneni!

¹⁶Mbana amababuayila nongu ejiji rie: Yisina amaba na nungi ajimaba na digumba dineni.

¹⁷Amakewivula o tsi murima rie: Yi nyuvaga? Ngaa na mbura jiwelimina usueyila digumba diami.

¹⁸Kabogu adi nyuvaga adidi rie: Nyupansa bisuegulu biami mbana nyurunga abineni na nyugukiga uresi uami muna nesi busina buami buotsu.

¹⁹Mbana nyuvosa o tsi murima ami rie: Ka muna ubueji gu nyulaba mu mbari nyina biwelimina udugusu nsala tsiotsu te na bilima bipuela. Ka tsana, ji, nu, nolaba ubueji.

²⁰Tumba Nsambi amamutsingula rie: Ka muna yiduka yi! Na mukolu egugu gufu. Kabogu biotsu abi gumakelundilanga yika binyi biuba?

²¹Jesus amabuela rie: Anana divu ombu uotsu aguikelundila busina. Kabogu ombu Nsambi agaa yisina.

²²Mbana Jesus amavosa na badukitsi bandi rie: La dibandu nyidutsingulili rie: Duyaketsoyisa nesi mu diambu dibiguji nesi mu diambu dibiduaru.

²³Muvumu uiviolili biguji na dunyuru duiviolili biduaru.

²⁴Labatianu bavanga! Bagevari vo utsonsiga na bagaa na bitala vo bisuegulu ne nana Nsambi ebabunguli. Tsia jenu duiviolili batsoli buneni?

²⁵Anyi va gari enu orungula ubuesa bilima mu nsanunu tsiandi mu mbari amaketsoyisa?

²⁶Pa dugorungula mua diambu digeyi nana dibandu yi duiketsoyisila na masusu?

²⁷Gengilatianu nana bafelera bebendili: bagesali vo ubuanga. Tumba nyidutsinguli yiri Salomon na busina buandi asamarungula uduara nana bonyi.

²⁸Kabogu pa Nsambi ekipi bafelera abavu na kembu yilumbu yimosi na yilumbu yisusu bamagumuga, agorungula ukipa diambu dibiduaru bienu? Ka muna yitu ugeyi yi!

²⁹Kabogu duyaketsoyisa mu abi duji vo abi dunu.

³⁰Tsiri abageduki Nsambi abebirombingi? Taji enu aguvu o julu ejabi nsala tsienu.

³¹Leveganu mirima mienu ombu Fumu na jabanu dusungugu duandi mbana Nsambi jaʼ beni oduvega motsu mana.

³²Baana bageyi duyalaba keri! Taji enu elabi ubueji udujabisa Durumu duandi.

³³Sumbisanu abivu nenu na veganu bijaga mbongu atsi dudila; anana duikerungila komi atsigefu na duba na busina buneni o julu abugobembu na badayitsi nesi batsielili bagobubunga.

³⁴Mu mbari muna mbura aji busina buvu avana murima uvu wandi.

³⁵Warisanu tsanda tsienu na bangisanu balambi benu, diwendi rie: banu dukunsama.

³⁶Pa fumu ewendi o mulambu udiwela basalitsi bagemuvivi yiri ava edukisili bomudibulila vana vana?

³⁷Ka muna ubueji gu basalitsi beni bolaba mu mbari fumu ogu amabarasuna bakunsama! Dingensa nyidutsinguli rie: Jandi owarisa tsanda andi na obatsanisa va tavula na jaʼ beni obavega biguji.

³⁸Pa obarasuna bakunsama nesi va gari mukolu nesi va matebugulu, basalitsi bebaba bolasu ubueji uneni.

³⁹Guluanu buranga! Mbe fumu ndagu amajaba yiri mudayitsi oruga mbe amawarisa ndagu yiri mudayitsi agokota.

⁴⁰Jenu wenu banu dukunsama mu mbari Muana Mutu oruga mutsoga.

⁴¹Pierre amamuwivula rie: Guitubuayili nongu ejiji vo basusu guijibuayili?

⁴²Fumu amawaka rie: Kabogu musalitsi usigama aguvu na diela anyi? La jandi agu Fumu ovega musuga ukelisa ndagu nogabila basalitsi basusu biguji.

⁴³Ka muna ubueji gu musalitsi eni olaba ava fumu ndagu oruyila nomurasuna yika usala esali!

⁴⁴La dibandu fumu andi omuveyila musuga uruma biandi biotsu.

⁴⁵Tumba tanguji musalitsi eni ovosa o tsi murima rie: Fumu ami etsingi, agomueruga namapapa. Kabogu obanda udimba basalitsi botsu nodibula mulugu andi nolanganga.

⁴⁶Muna yilumbu ayi jandi agemuemuviva fumu andi oruga. Ka muna musosi gu musalitsi eni olaba!

⁴⁷Fumu andi omulasa maguga va mosi na jogu abagemudedili. Musalitsi oyijabi adi fumu andi erondi tumba agedivayi odimbu kuba jineni.

⁴⁸Tumba musalitsi agutsimbu mu mbari agaajaba adivu diwelimina ombu fumu andi okilusu yika na mua kuba jigeyi. Munongu mosi na pegulu; agumavegu tsipuela otsundusu puela na tsionyi tumba agumavegu tsipuela tsipuela otsimdusu puela puela.

⁴⁹Nyimaruga uyibangisa muji mbe umabangusu kala mbe nyimalaba ubueji!

⁵⁰Vengu nyubatusu tumba ka muna munyongu gu nyulaba te na temu eni!

⁵¹Duitasi yiri nyimaruga gunu udubeyila duvotsu? Nesi, tsiri duvotsu, nyimaruga ukakasana batu.

⁵²Ubongila namunyi mukuta ubatu baranu bokegaba, barieru bovina babeji na babeji bovina barieru;

⁵³taji ovina muana andi na muana ovina taji andi, boji na boji bovinasana.

⁵⁴Jesus amamuevosa na batu rie: Ava duilabili dimungi dimati o yiari ayi wisi epalili duivosi vana vana rie: Mfula jiunoga na ngensa jinoyi.

⁵⁵Ava duigululu punga ajiruyili o tandu duivosi rie: Mungudi ugumba na ngensa uigumbi.

⁵⁶Ka muna bijaku bi! Pa duirunguli ugengila nesi butamba na julu nojaba adiuba kabogu dibandu yi dugorungulila ujaba adivu netu temu ejiji?

⁵⁷Dibandu yi jenu beni dugorungula utabusana bunsonsi buwelimina?

⁵⁸Pa guna diambu na mutu ava egubeyili o mufundu ditabuli nandi mu nsila mbe dusakatola ombu nsonsi mu mbari akeguwakisa ombu nsonsi na nsonsi akeguwakisa ombu bagora na bagora bakegukotisa o tsugu.

⁵⁹Nyigutsinguli rie: Gugopala o tsugu te na gumamana ufuta muganu uotsu.