Read Punu Luc 14 Bible Online

Luc 14 - Punu bible

Luc 14

¹Yilumbu yitsona Jesus amawenda ombu yivunda yimosi yimuJuif agumaba muPharisie uyeji. Botsu abamaba vana bamaba liyiyi ulaba adi Jesus ovaga.

²Mutu agumaba na buali burandanga amabegu ombu gandi.

³Jesus amawivula milonsi mimigaga na baPharisie rie: Mugaga etu uiveyi musuga ubelusa mutu yilumbu yitsona?

⁴Bamabusa uwagula ne dimosi kabogu Jesus anobemba mutu eni amamubelusa mbana amamuganina.

⁵Anomana udivaga amabawivula rie: Je pa muana agu obonduga o yiduna yilumbu yitsona gugomupalisa? Je pa ngombi agu jiubonduga o yiduna yilumbu yitsona gugojipalisa?

⁶Na jogu basamamuerungula uwagula.

⁷Jesus anolaba nana abamanengulu bamasolila bitsiga biboti bibatu baneni amababuayila nongu ejiji rie:

⁸Ava mutu ogunengilila o mulambu udiwela guyasundila utsana va yitsiga yimutu muneni. Tanguji aguvu muneni uviolila ndeʼ amanengulu wandi.

⁹Mbana omagunengila oruga novosa nagu rie: Muveyi yitsiga yiagu. Mbana gulaba yisonyi uyetsana va yitsiga yimutu ugeyi.

¹⁰Kabogu ava gunengululu letsana va yitsiga yimutu ugeyi mbana otsigunengila ovosa nagu rie: Dibandu yi guitsanini vana? Vioga va yitsiga ayina. Adina diulasa duyitsu duagu ombu botsu abamanengulu.

¹¹Mu mbari uotsu oyikematisa osundusu na uotsu oyikesundusa omatusu.

¹²Mbana Jesus amalonsa omamunengila rie: Ava guilambili mulambu umuangulu vo utsisiga, guyanengila bambatsi bagu vo baana banguji bagu ne taji agu na nguji ne bisina nagu. Jogu boba na mangolu ugunengila munongu mosi.

¹³Kabogu ava guilambili mulambu nengila bijaga na bibomfi na bitsondu na bidunga.

¹⁴Mbana Nsambi ogugabila miula mu mbari bagorungula ugunengila. Nsambi ogugabusila motsu ava durambugu duabafu.

¹⁵Mutu umosi agumaba va tavula nandi anogulu dionyi amavosa na Jesus rie: Ka muna ubueji gu jogu bolaba aboji va mosi na Nsambi ava Durumu duandi dujabununu!

¹⁶Jesus amamugabusila rie: Vamaba mutu agumalamba mulambu uneni; amanengila puela batu.

¹⁷Ava diweru diuji, amasindiga musalitsi andi utsingula abamanengulu rie: Wagulanu, biotsu bimakunsama.

¹⁸Mutu mutu amavega kokolu tsiandi. Mutu utega amavosa na musalitsi rie: Nyimasumba nungi kabogu nyuwenda uyejilaba, kokolu ngaa na temu.

¹⁹Ususu amavosa rie: Nyimasumba digumi dibangombi kabogu nyirondi ulaba nana besalili, kokolu ngaa na temu.

²⁰Ususu amavosa rie: Nyibanowela la dibandu ngorungula uruga.

²¹Musalitsi anogabuga amatolisa misamu miotsu ombu fumu andi. Mbana fumu ndagu amanyoga na amaruma musalitsi rie: Lensa noyenanengila ne bijaga ne bibomfi ne bidunga ne bitsondu, diwendi rie: botsu abavu o dulombili.

²²Mua temu jinovioga musalitsi amaruga novosa rie: Fumu adi gutsiruma dimavagu tumba vaki mbura.

²³Kabogu fumu amalonsa musalitsi rie: Wenda ne vala nogoma botsu aba gulaba uruga yiri ndagu ami jiubasa.

²⁴Nyidutsinguli rie: Vagoba ne umosi va gari jogu abamanengulu aguji biguji biami.

²⁵Batu bapuela bamafubana nsila na Jesus, anobagengila amavosa nogu rie:

²⁶Oyirondi uba mudukitsi ami alevina taji andi na nguji andi nesi mugatsi andi nesi baana bandi nesi baana banguji bandi na vengu okevina wandi.

²⁷Uotsu ogenanguli kurusu andi unduka agorungula uba mudukitsi ami.

²⁸Pa mutu ana ditasa urunga oleranga motsu mbana ojaba yeri ana mbongu tsiwelimina umanisila yisalu.

²⁹Pa tsi nana obanda yisalu ayi agorungula umana mbana botsu bomureka

³⁰novosa rie: Labatianu mutu egugu amabanda urunga tumba agaa na mbongu umanisila yisalu!

³¹Pa kaga ana digumi ditosini tsibatu agowenda ubengusana kaga aguvu na magumabeji matosini pa asakalewiji motsu ujaba yeri ana mangolu utoga na kaga eni.

³²Pa elabi yiri mangolu magaa mawelimina ava kaga jisusu akivu o vala omutindila yilumbi umuwivula rie: Yi ngavaga uvotsa nguba?

³³Jesus amabuesa rie: Munongu mosi mutu uotsu oyirondi uba mudukitsi ami alesila biotsu abivu nandi.

³⁴Musayi la yima yiboti tumba pa musayi umasambuga mutu orungula ugugabusila dueyi?

³⁵Uisaa na yisalu yisusu yika ubuaga. Jandi oyigulu alubuyi.