Read Punu Luc 15 Bible Online

Luc 15 - Punu bible

Luc 15

¹Babongitsi balepu bapuela na bango bikumbu bamawenda ombu Jesus uyegulu mambu mandi.

²BaJuif abamaba baPharisie na milonsi mimigaga bamanyinga rie: Mutu egugu edili bango bikumbu na eji nogu!

³Kabogu Jesus amababuayila nongu ejiji rie:

⁴Ava mutu avu na kama bindombu na yimosi yimatsiemuga yi ovaga? Oyesila magumidufu na yifu o yivanga na oromba te na olaba yindombu ayimatsiemuga.

⁵Ava eyilabili, eyinanguli na eyibeyi na nsangu o ndagu andi.

⁶Mbana enengili bambatsi bandi rie: Ruganu tusangilianu mu mbari nyimalaba yindombu yiami ayimatsiemuga.

⁷Divu munongu mosi o julu ava muvayitsi masumu umosi ekalulili diela: vavu nsangu ajiviolila nsangu ajimalabana ombu magumidufu na yifu abamagobulu kala.

⁸Ava mugetu avu na digumi didoli na otsiemusa dumosi yi ovaga? Obangisa lambi, ogombula ndagu na ogengila yiari na yiari te na odulaba.

⁹Ava edulabili enengili bambatsi bandi rie: Ruganu tusangilianu mu mbari nyimalaba doli adu nyimatsiemusa.

¹⁰Nyidutsinguli rie: Munongu mosi biansa biNsambi bisangili mu diambu dimuvayitsi umasumu umosi aguikaluli diela.

¹¹Jesus amabuela rie: Vamaba mutu agumabura baana bababaala babeji.

¹²Agu ngebi amavosa na taji andi rie: Tata, peyi dikabu dibusina buagu adiuba adiami. Kabogu taji amabagabila abiandi.

¹³Mua bilumbu binovioga muana agu ngebi amasumbisa abiandi; anodila mbongu amayenawenda. Anotola o bulongu buvala amagungisa mbongu tsiandi.

¹⁴Anonyambasana tsiotsu, dungosu duneni dunsala dumaba o bulongu bueni kabogu amalaba maguga.

¹⁵Jandi amawenda uyetsana na muisi bulongu agumamusindiga o musiru uyekelisa bangulu bandi.

¹⁶Jandi mbe aronda uji abimabuagulu bangulu tumba mutu asamamugarusu.

¹⁷Anobanda uranga maguga mandi amatasa rie: Labati basalitsi abesadi na tata bana biguji bipuela na yika ufu nyifu na nsala!

¹⁸Nyugabuga ombu tata na nyumutsingula rie: Tata nyimavaga dibi va gusu Nsambi na va gusu agu.

¹⁹Nyisaa nyiwelimina unengulu muana agu; payi nderi musalitsi agu.

²⁰Kabogu amasogama ugabuga ombu taji andi. Mbe aki vala taji andi amamulabilila na amagaangu na yingeba; amawenda mbangu umubumba na amamufifa.

²¹Muana amamutsingula rie: Tata, nyimavaga dibi va gusu agu.

²²Tumba taji amavosa na basalitsi bandi rie: Lensanu nobega yilinga ayiviolila ubueji na muduisianu; muduisianu moru na bapondu wandi.

²³Beganu muana ngombi uvonga na ubokianu. Tujianu na tulabianu ubueji!

²⁴Mu mbari labanu muana ami mbe amafu tumba amarambuga mbe amatsiemuga tumba amalabana. Botsu bamabanda usangila.

²⁵Yivunda anoruyila o musiru amabarasuna vana; usiga besiyi bisigu na uyina beyini.

²⁶Amanengila musalitsi na amamuwivula rie: Diambu yi?

²⁷Musalitsi eni amawagula rie: Muana nguji agu amagabuga, taji agu atsibokisa muana ngombi uvonga mu mbari muana nguji agu aji mbui.

²⁸Yivunda amanyoga tindi unyoga na amabusa ukota o ndagu. Taji andi amapala na amamulenda rie: Kokolu, lekotati!

²⁹Amawaka rie: Labati bilima biebibi biotsu nyimagusalila nderi muviga nyivu na nyisamaguwemina ne temu mosi. Yima yi gumapega? Gusamapega ne taba mosi yiri nyurungula usangila na bambatsi, mbe?

³⁰Tumba labati muana agu agugu amabunga busina buagu buotsu na bipumbi na ava eruyili guimubokili muana ngombi uvonga!

³¹Taji amamuwagula rie: Aa muana ami, guji nami temu tsiotsu na biotsu abivu nami abiagu!

³²Tumba divu diwelimina yiri tulamba mulambu nosangila mu mbari muana nguji agu mbe amafu na amarambuga mbe amatsiemuga tumba amamuelabana!