Read Punu Luc 17 Bible Online

Luc 17 - Punu bible

Luc 17

¹Jesus amavosa na badukitsi bandi rie: Mbangulu tsivu, tumba ka muna maguga ma jandi oyimangingi batu olaba!

²Mbe otungu dimanyi dineni nobuagu o mubu mbe diwelimina yiri agomuerungula utsimbusu mutu ne muana ugeyi.

³Guluanu! Pa muana taji agu evayi dibi, musiembi; pa ekaluli diela mutandi.

⁴Pa eguvayili mabi yisambuali yikumbu mu yilumbu yimosi na eruyingi yisambuali yikumbu uguvega kokolu, vengu gumutanda.

⁵Bilumbi bimavonda Fumu rie: Royisa yitu yietu.

⁶Fumu amabawagula rie: Mbe duna yitu ayibagunu na tsangu jimutarada, ajivu jigeyi, mbe durungula uvosa na muiri egugu rie: Kerubula nomuevara o mubu na uonyi udivaga.

⁷Tanguji mutu va gari enu ana muvaritsi vo mukelisi migamba. Ava musalitsi eni eruyili o musiru fumu andi omunengila novosa nandi rie: Leruga, biguji bimavi?

⁸Tsatsabi! Omuruma rie: Lendambila biguji nobibega nonsalila te na nyimamana uji nonu; mbana ndeʼ wandi gurungula uji nonu.

⁹Okakisa musalitsi eni mu mbari amavaga adivu diwelimina?

¹⁰Divu munongu mosi ombu genu ava duivayili motsu amamarumu, vosanu rie: Jetu yika basalitsi tuvu, tumavaga yika adiwelimina na basalitsi.

¹¹Jesus amawenda o Jerusalem, amavioyila mu nsila jimandilu maSamarie na Galilee.

¹²Ava amapalila va dimbu dimosi digumi dibibedu binyambi bamamubengusana. Bamasikama vala

¹³na bamagamuga rie: Jesus, Mulonsi, tulasi yingeba!

¹⁴Jesus anobagengila amabaruma rie: Wendanu noyekelasa ombu bavagulitsi bapagu. Ava bawendilanga jogu botsu bamabelusu.

¹⁵Umosi va gari ogu anolaba yiri amabelusu amagabusila muna amavioyila na amadodisa Nsambi na diufi dineni.

¹⁶Amagudama va tsi va gusu Jesus na amamugabusila diboti. Amaba muisi Samarie.

¹⁷Jesus amamuwivula rie: Digumi diotsu digaabelusu? Yifu, agunyi bavu?

¹⁸Bagorungula ugabuga uyigabusila diboti ombu Nsambi? Yika muenyi egugu amaruga?

¹⁹Mbana Jesus amamutsingula rie: Relama na wendanga; yitu yiagu yimagubelusa.

²⁰BaJuif abamaba baPharisie bamawivula Jesus rie: Temu yi Durumu duNsambi dujabununu? Amabagabusila rie: Durumu duNsambi dugolabana na misu.

²¹Mutu agovosa rie: Duʼ vava vo rie: Duʼ vana. Jabanu rie: Durumu duNsambi duvu va gari enu.

²²Jesus amatsingula badukitsi rie: O gusu dugulu nsala ulaba temu jiMuana Mutu tumba dugomuejilaba.

²³Batu bovosa rie: Aji vava vo aji vana. Duyapupa, duyabaduka.

²⁴Muana Mutu osundila ulabana mu temu andi nana dusiemu duivedimini yiari na yiari.

²⁵Olelaba maguga maneni nobusu na dukula duedudu.

²⁶Adimalabana mu temu Noe diumuelabana munongu mosi mu temu Muana Mutu.

²⁷Batu bamajanganga na bamanuanganga; bamawelanga na bamawetsanga baana bogu te na yilumbu ayi Noe amakotila o dikumbi na nyidu jimabasa na batu bamafu.

²⁸Adimaba mu temu Lot diuba munongu mosi. Batu bamajanganga na bamanuanganga; bamasumbanga nosumbisanga; bamavaranga na bamarunganga

²⁹tumba yilumbu ayi Lot amagusuyila o Sodome mfula muji na fula jimanoga na jimaboka batu botsu.

³⁰Diuba munongu mosi mu yilumbu ayi Muana Mutu olabinina.

³¹Jandi aguba o julu muansa ayasunduga uyebonga bima biandi abivu o gari ndagu; jandi aguba o musiru ayagabuga o ndagu andi.

³²Rangiminanu mugatsi Lot.

³³Oyirondi ukegobula otsiemuga tumba oyikevega ogobulu.

³⁴Nyidutsinguli rie: Mukolu eni voba batu babeji va tangi mosi: umosi obongu na ususu osiala.

³⁵Bagetu babeji boroka va mosi: umosi obongu na ususu osiala. [

³⁶Babaala babeji bowenda va mosi o musiru: dimosi diubongu na disusu diusiala.]

³⁷Badukitsi bamamuwivula rie: Fumu, agunyi! Amawagula rie: Avoba mfumbi avana banyunga bobengunina.