Read Punu Luc 18 Bible Online

Luc 18 - Punu bible

Luc 18

¹Jesus amababuayila nongu ulonsa yiri mutu asambilingi temu tsiotsu; ayalabanga murima utsira.

²Amavosa rie: Vamaba nsonsi va musiengi ajisamaduma Nsambi na asamayitsa batu.

³Va musiengi eni vamaba mukuili wandi agumamutsoyisanga nomuwivulanga rie: Payili bunsonsi buyimbambila.

⁴Amalebusanga. Mbana amavosa rie: Diuleba ngedumi Nsambi na ngeyitsi batu

⁵ne nana mu mbari mukuili eni ensoyisi nyumutabulila bunsonsi yiri agomueruganga na yindandi umbulisa muru.

⁶Fumu amabuela rie: Guluanu adimavosu na nsonsi jibi!

⁷Je Nsambi agotabulila abandi bunsonsi, jogu abamasoluga abemugamuyili nyangu na mukolu! Je jandi otsikadana mu diambu diogu?

⁸Nyidutsinguli rie: Obatabulila bunsonsi buyimbambila na bisuasu. Tsienyi, Muana Mutu orasuna abavu na yitu ava oruyila?

⁹Temu jisusu Jesus amalaba batu abamaba na dunangu mu diambu dimaboti mogu tumba bamalensa maboti mabatu basusu. Kabogu amababuayila nongu ejiji rie:

¹⁰Babaala babeji bamawenda o Ndagu Nsambi uyesambila: umosi amaba muJuif agumaba muPharisie na ususu amaba mubongitsi lepu.

¹¹MuPharisie amarelama na amasambila rie: Aa Nsambi, nyigugabusili diboti mu mbari ngaa nana batu basusu: ngedayi, ngevayi mabi, ngevayi bumbembu na va julu vana nyigabusi diboti mu mbari ngaa nana mubongitsi lepu egugu.

¹²Nyibusi uji bilumbu bibeji tsona tsiotsu na nyiveyi yimosi mu digumi mu biotsu abi nyidili.

¹³Mubongitsi lepu amakakana mua vala, asamanangula ne misu o julu tumba amaduma tulu andi. Mbana amasambila rie: Aa Nsambi, nyiji muvayitsi masumu! Ka ndasi yingeba!

¹⁴Jesus amabuela rie: Yiotsu ayi dibaala diedidi amawendila o ndagu andi amatandu na Nsambi tsiri muPharisie. Mu mbari uotsu aguikematisa osundusu na aguikesundusa omatusu.

¹⁵Batu bamabega baana bageyi ombu Jesus yiri obasakiga miogu. Badukitsi banolaba yiri bevayi nana bamabasiemba.

¹⁶Jesus amanengila baana na amavosa rie: Baana baruyi ombu gami! Duyabagandisa mu mbari ombu munongu egugu Durumu duNsambi duvu.

¹⁷Jabanu yiri uotsu agugosinga Durumu duNsambi nana muana ugeyi agaa muna.

¹⁸Yivunda yibaJuif yimosi amawivula Jesus rie: Mulonsi uboti, yi nyuvaga udila monyu umutubu?

¹⁹Jesus amamugabusila rie: Mu mbari yi guindengili muboti? Vagaa muboti yika Nsambi buandi.

²⁰Guijabi maruma memama: guyavaga bumbembu, guyaboka, guyadaga, guyafura, yitsa taji agu na nguji.

²¹Dibaala amamuwagula rie: Ubongila va bungebi buami nyimakelisa maruma memama motsu.

²²Jesus anodigulu amavosa rie: Vaki diambu dimosi! Weʼ yesumbisa biotsu abivu nagu novega mbongu ombu bijaga na guba na busina o julu. Va julu vana ruga, nduki!

²³Dibaala anodigulu amatunga dusisi mu mbari amaba yisina yineni.

²⁴Jesus anolaba yiri amanyonga amavosa rie: Divu divura ombu yisina ujaba Durumu duNsambi!

²⁵Nyiina, divu divura yiri tsungu ovioga va digola ditsongi tumba divu diviolila uvura yiri yisina ojaba Durumu duNsambi.

²⁶Batu abamamugulu bamawivula rie: Kabogu anyi orungula ugobulu?

²⁷Jesus amabagabusila rie: Adivu divura ombu batu digaa divura ombu Nsambi.

²⁸Mbana Pierre amavosa rie: Jetu tumabusa biotsu na tumaguduka.

²⁹Jesus amamuwagula rie: Nyiina! Nyidutsinguli rie: Ojivu na murima ubusa ndagu andi nesi mugatsi andi nesi baana banguji bandi nesi bataji na banguji bandi nesi baana bandi mu diambu diDurumu duNsambi

³⁰okelusu ne uviolila mu temu ejiji na odila monyu umutubu ogusu.

³¹Jesus amanengila digumi na badukitsi babeji na amabatsingula rie: O Jerusalem tuiweʼ. Motsu ama babiyitsi bamasona mu diambu diMuana Mutu moyedugusu.

³²Ovegu ombu abageduki Nsambi. Jogu bomudesa na bomufuengilila na bomufuta mateji.

³³Bomudimba mikasa na bomuboka. Mu yilumbu ayimurieru orambuga o dufu.

³⁴Tumba badukitsi basamagulu ama Jesus amavosa mu mbari motsu amamavosu nandi mamabasuegu, basamatsiyisa ne dimosi.

³⁵Jesus amatola bebeli na Jericho. Va mugula nsila vamaba yidunga ayimavondanga.

³⁶Anogulu batu bapuela bevioyi amawivula rie: Yina yi?

³⁷Bamamutsingula rie: Jesus muisi Nazareth evioyi.

³⁸Kabogu amagamuga rie: Jesus muana David, ndasi yingeba!

³⁹Batu abamaba o gusu bamamusiemba na bamavosa nandi rie: Vola sui! Amabuela ugamuga na mangolu rie: Muana David, ndasi yingeba!

⁴⁰Kabogu Jesus anosikama amaruma yiri bamubeyili yidunga. Yidunga anokueka, Jesus amamuwivula rie:

⁴¹Yi guirondi yiri nyuguvayila? Jandi amawagula rie: Mulonsi, nyirondi ulaba.

⁴²Jesus amamutsingula rie: Tiemuna, yitu yiagu yimagutiemusa.

⁴³Muna diweru dieni jandi amalaba na amaduka Jesus na amagabusila diboti ombu Nsambi. Batu botsu banodilaba bamayitsa Nsambi.