Read Punu Luc 19 Bible Online

Luc 19 - Punu bible

Luc 19

¹Jesus anotola o Jericho amananga musiengi.

²Vamaba yivunda yibabongitsi balepu, diina diandi Zachee, omaba yisina.

³Amaronda ulaba Jesus nana avu tumba mu diambu diyinombu asamanmgula umulaba mu mbari amaba na yirela yigufi.

⁴Amawenda mbangu o gusu na amamata o julu muiri ulaba Jesus ava evioyili.

⁵Jesus amatola va mbura eni, anobuaga misu o julu amalaba Zachee na amamutsingula rie: Zachee, lensa nosunduga, nyirondi usilama o ndagu agu namunyi.

⁶Zachee amalensa nosunduga na amamudila na nsangu.

⁷Ava batu bamalabila adi amavaga bamanyinga rie: Kabogu ewendi uyesilama ombu muvayitsi umasumu.

⁸Zachee amarelama va gusu Fumu na amavosa rie: Mulonsi, laba, nyuvega yiasi yibusina buami ombu bijaga na pa nyimadionga mutu nyumugabusila kumbu jina.

⁹Jesus amavosa rie: Namunyi dugobutsu duvu o ndagu ejiji mu mbari agugu wandi aji mutegula uAbraham.

¹⁰Muana Mutu amaruga uyiromba nogobula abamatsiemuga.

¹¹Jesus amamuebuayila bagulutsu bamambu meni nongu mu mbari anokueka bebeli na Jerusalem amajaba yiri batu betasi yiri Durumu duNsambi duka bebeli.

¹²Kabogu amavosa rie: Dibaala adimaburu na buenyi amawenda o bulongu buvala; amabiatsu kaga mbana amayenagabusila.

¹³Ne akawenda amanengila digumi dibasalitsi bandi. Amabavega mutu mutu mbongu mosi jilora na amabatsingula rie: Tsisalisianu te na nyumueruga.

¹⁴Bisi bulongu buandi bamamuvina. Bamatinda yilumbi uyevosa rie: Jetu tugerondi yiri mutu eni oturuma.

¹⁵Anobiatsu kaga amagabusila o bulongu buandi. Mbana amanengila basalitsi abamasiala na mbongu tsiandi na amawivula mutu mutu ulasa nana amafunisila tsiandi.

¹⁶Agutega amaruga novosa rie: Fumu, mbongu agu jitsifuna yigumi yimbongu tsilora.

¹⁷Kaga amamutsingula rie: Guji musalitsi uboti! Gubetsi usigama mu abigeyi kabogu ruma digumi dimisiengi.

¹⁸Agumubeji amaruga novosa rie: Fumu, mbongu agu jitsifuna mbongu yiranu yilora.

¹⁹Kaga amamutsingula rie: Kabogu guruma misiengi miranu.

²⁰Ususu amaruga novosa rie: Fumu, laba mbongu agu jilora; nyimajipieta va tsanda.

²¹Nyimagulaba goma mu mbari guji mutu uranga. Guibongi ayigaa yiagu na guitsonsiyi ne abi gusamavara.

²²Kaga amavosa nandi rie: Guji musalitsi ubi! Ndeʼ beni gumakevega mbela na mambu magu! Gumajaba yiri nyiji mutu uranga, diwendi rie: nyibongi ayigaa yiami na nyitsonsiyi ne abi nyisamavara.

²³Kabogu dibandu yi gusamaveyila mbongu tsiami ombu jogu abejabi ukelisa mbongu? Mbe nana mbe nyimadila mua mbika.

²⁴Mbana amaruma abamaba vana rie: Mupatulianu mbongu eni na jiveyianu ombu ojivu na yigumi yimbongu.

²⁵Bamamutsingula rie: Fumu, jandi ana yigumi yimbongu.

²⁶Amawagula rie: Ona yima obuesu tumba ogaa na yima opatulu ne ayi etasi yivu nandi.

²⁷Beganu bavinitsi bami, jogu abasamaronda yiri nyubaruma; babokianu va misu mami.

²⁸Jesus anomana uvosa nana amabarela o Jerusalem

²⁹Ava Jesus amabambinina o Bethfage na Bethanie o yiari yimukongu umiOlive amaruma badukitsi bandi rie:

³⁰Wendanu o dimbu adivu o gusu. Avana durasuna muana buru utungu agu mutu asakatsanina na kala. Munyangulianu na mubeyianu.

³¹Pa mutu oduwivula rie: Yi duivayi? Mugabusilianu rie: Fumu ana nsala uonyi.

³²Bamawenda na bamarasuna motsu nana Jesus amabatsingulila.

³³Ava bamanyangulila muana buru, abadila buru bamabawivula rie: Dibandu yi duimunyangulili?

³⁴Bamabagabusila rie: Fumu ana nsala uonyi.

³⁵Banobega muana buru ombu Jesus bamakunsa yitsiga na biduaru biogu umutsanisa mbana bamamatisa Jesus va julu yionyi.

³⁶Ava amawendila batu bamayenawala biduaru o gusu andi.

³⁷Ava amavindimina o Jerusalem bebeli na mukongu umiOlive, badukitsi bamabasa na nsangu ava bamarangiminina bimaga biotsu abi bamalabanga na bamabanda uyitsa Fumu na mufi maneni.

³⁸Bamagamuga rie: Nsambi agabili miula ombu kaga oyiruyi mu diina diFumu! Duvotsu o julu na bundumba ombu Nsambi!

³⁹BaJuif bamosi abamaba baPharisie bamavosa na Jesus rie: Mulonsi, votsa badukitsi bagu!

⁴⁰Jesus amabawaka rie: Ne pa jogu bovola, mamanyi mokitsa.

⁴¹Banokueka bebeli na dimbu Jesus amabuaga misu na amabanda ulila

⁴²novosa rie: Aa, Jerusalem, mbe gumajaba adivu diwelimina uvotsa nguba namunyi! Tumba dionyi dimagusuegu!

⁴³Bilumbu biuruga abi bavinitsi bagu bogukandila, bogudibiga na bogubandasana.

⁴⁴Bogupansa na bobunga batu bagu; vagosiala ne dimanyi dimosi mu musiengi uotsu mu mbari gusamagaru ava Nsambi amarondila uguwamusa.

⁴⁵Jesus anokota o Ndagu Nsambi amabinga abamasumbisa bima biogu na

⁴⁶amabatsingula rie: Bisonu bimasonugu rie: Ndagu ami jiunengulungu ndagu dusambu. Tumba jenu dumajivaga yisuemunu yibadayitsi.

⁴⁷Yilumbu na yilumbu Jesus amalonsanga o Ndagu Nsambi. Bivunda bibavagulitsi bapagu na milonsi mimigaga na bivunda bisusu bamaronda umuboka.

⁴⁸Basamajaba nana bodivayila mu mbari botsu bamaba liyiyi ugulu malongi.