Read Punu Luc 22 Bible Online

Luc 22 - Punu bible

Luc 22

¹Temu jifeta jimapa magambu na dufunusu, ajimanengulu Paque jimatola.

²Bivunda bibavagulitsi bapagu na milonsi mimigaga bamaronda uboka Jesus tumba bamaduma batu.

³Mbana Satan amakota ombu Judas ajimalugu Iscariote, jandi amaba umosi va gari digumi na badukitsi babeji.

⁴Judas amawenda uyekunsa kwakusulu Jesus na bivunda bibavagulitsi bapagu na bibagora.

⁵Bamalaba nsangu na bamavangana umuvega mbongu.

⁶Judas anotunga fundu nogu amabanda ukunsa motsu ubawakisa Jesus o musuega.

⁷Feta tsiotsu tsimapamagambunadufunusu vamaba yilumbu ayi bamabokila bindombu bimulambu uPaque.

⁸Yilumbu yieni yinotola Jesus amaretsiga Pierre na Jean nobatsingula rie: Wendanu utulambila biguji biPaque yiri tubijianu.

⁹Bamamuwagula rie: Agunyi guirondi yiri tubilambila?

¹⁰Amabagabusila rie: Guluanu ava dutolila o musiengi jenu dubenguna na dibaala adiwendi na tsuva mamba. Mudukianu, ava okotila o ndagu

¹¹dukavosa na odila ndagu rie: Mulonsi ewivuli rie: Jetu na badukitsi bami tugodila mbura aji tulila Paque?

¹²Odulonsa yibuku yineni yiminsu ayivu o julu, amuna dulambila biguji biPaque.

¹³Banowenda bamarasuna motsu nana Jesus amavosila; bamayelamba biguji biPaque.

¹⁴Diweru dinotola, Jesus amatsana va tavula nabilumbi biandi.

¹⁵Amabatsingula rie: Nsisinsa uronda uviosa Paque ejiji nenu ne ngalasu maguga.

¹⁶Nyidutsinguli rie: Ngomuebiji te na motsu modugu ava Durumu duNsambi dujabununu.

¹⁷Mbana anobonga kopa amagabusila Nsambi diboti na amavosa rie: Bonganu kopa ejiji na jigabinianu.

¹⁸Mu mbari menu ngomuenu mamba mamilunda te na Durumu duNsambi dujabunu.

¹⁹Mbana amabonga dipa na anomana ugabusila Nsambi diboti amadibukula. Amabagabila novosa rie: Adudu la dunyuru duami [adimavegu mu diambu dienu. Vaganganu nana mutangimina.

²⁰Banomana uji amavaga munongu mosi na kopa, amajibonga novosa rie: Kopa ejiji la yirangumunu yimalungu mami amamadekanga mu diambu dienu.]

²¹Labanu oyimufundi aji nami va tavula ejiji.

²²Muana Mutu ofu nana amaditabula. Ka muna maguga ma mutu agumamufunda olaba!

²³Bamabanda uwivusana rie: Anyi orungula udivaga?

²⁴Badukitsi bamaba na mutsundu mu mbari bamagalana buneni.

²⁵Jesus amabatsingula rie: Nyiina, bakaga belasi batu maguga na jogu abavu na musuga benengulungu rie: Bavayitsi bamaboti.

²⁶Diyaba nana va gari enu. Tumba aguviolila muneni va gari enu abi nana mutu ugeyi na oyirumi abi nana musalitsi.

²⁷Anyi aji muneni, jandi oyitsani va tavula vo oyijikunsi? Ojivu va tavula, mbeyianu? Yimaga! Menu nyiji va gari enu nana musalitsi.

²⁸Jenu dumawarilanga mbangulu tsiotsu va mosi nami.

²⁹Kabogu nana Tata amapeyila musuga uruma nyivangini nenu munongu mosi rie:

³⁰Duji nonu nami ava Durumu duNsambi dujabununu na dutabulila digumi na bifumba bibeji biIsrael bunsonsi.

³¹Fumu amavosa rie: Simon, Simon! Gulu, Satan amadila musuga uduweliga, jenu botsu: nana mutu oyisayi uresi esayili uresi ugusula bipupu, adina oduvayila.

³²Tumba Pierre, nyimasambila yiri yitu yiagu yigodeda. Ava gukalulila diela gukawarisa baana bataji bagu.

³³Pierre amamuwaka rie: Fumu nyiji ukunsama uwenda nagu nesi o tsugu nesi o dufu.

³⁴Jesus amamuwagula rie: Pierre, namunyi ne koku akavosa ukala kumbu yirieru.

³⁵Jesus amabawivula rie: Ava nyimaledugandisila rie: Duyalinga na mbongu nesi bakomi nesi bapondu, dumagambu na yima? Bamamugabusila rie: Ne yimosi!

³⁶Amabatsingula rie: Namunyi disaa nana. Jandi ona mbongu abeyingi; ogaa na dijenga asumbisi yikutu yiandi nosumba dijenga.

³⁷Nyidutsinguli rie: Diambu adimasonu mu diambu diami vengu diudugusu. Diwendi rie: amatalu va mosi na bavayitsi bamabi. Adimasonu mu diambu diami diulabana namapapa.

³⁸Badukitsi bamavosa rie: Fumu, labati majenga mabeji. Amabawaka rie: Vana dedi.

³⁹Jesus anopala amawenda o mukongu umiOlive nana yifu yiandi yimabila na badukitsi bandi bamafubana nsila nandi.

⁴⁰Ava amatolila va mbura eni amabatsingula rie: Sambilanu yiri dumangu dugoduviolila.

⁴¹Mbana amakakana nogu nana vava na vana na anokutama amasambila rie:

⁴²Tata, pa guisingi, nyiyanu kopa ejiji jimaguga. Tumba tsiri duganu duami duvagu, aduagu duvagu. [

⁴³Mbana yiansa yimalabana nandi umuwarisa.

⁴⁴Na munyongu uneni amawarisa usambila te na amarugama dirugama adimaba yika malungu amamabonduga va tsi.]

⁴⁵Jesus anomana usambila amagabuga ombu badukitsi na amabarasuna bilu mu diambu dimunyongu.

⁴⁶Amabawivula rie: Mu mbari yi duiwendili bilu? Relamanu na sambilanu yiri dumangu dugoduviolila.

⁴⁷Yika uvosa evosi na batu bapuela bamabarasuna, Judas, umosi va gari digumi na badukitsi babeji, amaba yibegandonga, amakueka ombu Jesus na amamubumba.

⁴⁸Jesus amamuwivula rie: Judas yi guivayi? Guifundi Muana Mutu nana?

⁴⁹Ava badukitsi baJesus bamalabila adimaba bamamuwivula rie: Fumu, tutoga nogu na majenga?

⁵⁰Umosi amanemisa musalitsi uyivunda yibavagulitsi bapagu ava amamutabulila dituji dimabaala.

⁵¹Tumba Jesus amavosa rie: Vana dedi! Amabemba dituji didibaala dieni na amamubelusa.

⁵²Mbana Jesus amavosa na bivunda bibavagulitsi bapagu na bivunda bibagora na bivunda bisusu rie: Kabogu dutsiruga na majenga na banguangu nana ombu yikongu?

⁵³Bilumbu biotsu nyibetsi nenu o Ndagu Nsambi na dugaakaanganga. Mbukua, diweru diedidi divu adienu na dijogu aberumi yiliyili.

⁵⁴Banogaanga Jesus, bamamubega o ndagu yivunda yibavagulitsi bapagu. Pierre amayenabadukanga va gegeyi.

⁵⁵Muji umabangusu va dulombili na Pierre amatsana na botsu abamaba vana.

⁵⁶Musalitsi umugetu amamulaba ugora egori muji; amamugengila yisuisu mbana amavosa rie: Dibaala diedidi abetsi nandi wandi.

⁵⁷Tumba Pierre amamugala rie: Ngemujabi.

⁵⁸Mua pesu temu dibaala amamulaba na amavosa nandi rie: Ndeʼ wagu guji nogu, mbe? Pierre amavosa rie: Ngaa muna.

⁵⁹Banomuetsana diweru, dibaala disusu amamukambisa novosa rie: Dingensa dibaala diedidi abetsi nandi mu mbari jandi wandi aji muisi Galilee.

⁶⁰Pierre amamuwaka rie: Ngejabi adi guivosi. Yika uvosa evosi na koku jimakokarana.

⁶¹Fumu anogeluga amagengila Pierre. Pierre amarangimina adi Fumu amavosa nandi rie: Namunyi ne koku akavosa gukala kumbu yirieru.

⁶²Pierre anopala, amalila na munyongu.

⁶³Babaala abamagaanga Jesus bamamudesanga na bamamudimbanga

⁶⁴na banomukubiga yinsi bamamuwivula rie: Anyi atsigudimba? Tubula!

⁶⁵Va julu vana bamamusienganga na bamamupejanga.

⁶⁶Wisi unotebuga, dibuli dibivunda bibaJuif na bivunda bibavagulitsi bapagu na milonsi mimigaga bamagukama na bamabega Jesus o yibenguna yiogu.

⁶⁷Bamamuwivula rie: Ndeju la Christ? Ka tutubulili! Jesus amabagabusila rie: Pa nyudivosa dugopayila yitu;

⁶⁸pa nyuduwivula yivu dugogaru ukwagula.

⁶⁹Dibi nana, namapapa Muana Mutu otsana va mabaala maNsambi Mangolu.

⁷⁰Botsu bamawivula rie: Kabogu guji Muana Nsambi? Amabagabusila rie: Nyiina, nana duivosili, nyiji Muana Nsambi.

⁷¹Mbana bamavosa rie: Tugomueromba bambeji. Jetu beni na jetu beni tsia tusamamugulu?