Read Punu Luc 23 Bible Online

Luc 23 - Punu bible

Luc 23

¹Jogu botsu bamarelama na bamabega Jesus va gusu Pilate.

²Bamabanda umufuengilila novosa rie: Tutsirasuna mutu egugu epupisi di bayafuta dumandu ombu kaga na eyosi yiri aji Christ na kaga.

³Pilate amamuwivula rie: Ndeʼ guji kaga jibaJuif? Jesus amamugabusila rie: Ndeʼ gumadivosa.

⁴Pilate amatsingula bivunda bibavagulitsi bapagu na yinombu rie: Ngelabi yiri mutu egugu ana diambu.

⁵Tumba batu bamamukambisa novosa rie: Jandi epupisi mirima mibatu na malongi mandi. Amabanda o Galilee te no Judee jiotsu na namapapa aji vava.

⁶Ava Pilate amadigululu amawivula rie: Aji muisi Galilee?

⁷Amagulu yiri amaruyila o yiari ayi Herode erumi kabogu amamusindiga ombu gandi mu mbari jandi wandi amaba o Jerusalem mu temu eni.

⁸Herode amalaba nsangu jineni udila Jesus mu mbari amagulungu adi bamamuvosila na va julu vana amaronda ulaba nana esalili bimaga.

⁹Amamuwivula puela bivu tumba Jesus asamawagula ne yimosi.

¹⁰Bivunda bibavagulitsi bapagu na milonsi mimigaga bamaba vana na bamamufuengilila mambu mapuela.

¹¹Herode na bagora bandi bamamulensanga; banomana umulensa bamamuduisa yikutu yibenga mbana bamamugabusa ombu Pilate.

¹²Diuleba Pilate na Herode bamabanganga na yikenganyi tumba muna yilumbu yieni bamanonga.

¹³Pilate anogukiga bivunda bibavagulitsi bapagu ria batu badiela na dibuli

¹⁴amabatsingula rie: Dutsimbeyila mutu egugu na duivosi yiri epupisi batu. Labanu nsimusosisa na mambu ama dumamufuengilila na ngelabi yiri ana mbela.

¹⁵Ne Herode asamamulaba na mbela la dibandu amamugabusa ombu getu.

¹⁶Agaa na diambu diwefimina uboku. Kabogu nyumudimbisa mikasa mbana opalusu. [

¹⁷Kadi feta Paque Pilate amabapalisilanga muisi tsugu.]

¹⁸Bamagamuga va mosi rie: Muboki! Tupalisili Barabbas!

¹⁹(Barabbas amakotusu o tsugu mu mbari amabangisa kindu ajimapupisa musiengi na amaboka mutu.)

²⁰Pilate amaronda upalisa Jesus kabogu amamueweliga uvosa na batu.

²¹Tumba bamagamuga rie: Mugomini va kurusu! Mugomini va kurusu!

²²Pilate amabawivula adimurieru rie: Dibi yi atsivaga? Ngaalaba diambu diwelimina yiri oboku. Kabogu nyumudimbisa mikasa mbana opalusu.

²³Bamagamuga na yindandi rie: Vengu ogomunu va kurusu! Bamamukambisa na migamu miogu te na bamalunga.

²⁴Pilate amatabulila Jesus bunsonsi nana bamarondila.

²⁵Amapalisa agu bamavondanga, agumakotsu o tsugu mu diambu dikindu na bukongu na amabavega Jesus yiri bomuvayila nana bamarondila.

²⁶Ava bamabeyila Jesus, bamabonga Simon muisi Cyrene omaruyila o musiru. Bamamusikiga na bamamunangusa kurusu aji amabega o nsima Jesus.

²⁷Batu bapuela bamamuduka na va gari ogu bamaba bagetu abamadumanga tulu tsiogu na abamalilanga.

²⁸Jesus amageluga ombu gogu novosa rie: Bagetu baJerusalem, duyandila tumba kelilanu na lilanu mu diambu dibaana benu.

²⁹Bilumbu biuruga abi bovosa rie: Ka muna yiesa yi binguma belabi!

³⁰Temu eni bovosa na mikongu rie: Tuvikianu! Na bovosa na bikundubuga rie: Tusueyianu!

³¹Pa bevayi mambu meni ombu muiri aguvu na magaji tsie bovayila na muiri agugumuga?

³²Bavayitsi bamabi babeji bamabegu uyeboku va mosi na Jesus.

³³Ava bamatolila va mbura ajinengulu rie: Dubengili, bamagomina Jesus va kurusu va mosi na bavayitsi bamabi babeji: umosi va mabaala mandi na ususu va magetu mandi.

³⁴Jesus amavosa rie: Tata batandi! Bagejabi adi bevayi. Bamabuaga mbanda ujaba anyi odila biduaru biandi.

³⁵Batu bamasikama vana ugengila adimavagu. Bivunda bibaJuif bamalensanga Jesus rie: Jandi otsigobulanga basusu akegobula pa aji Christ agusolu uNsambi!

³⁶Bagora wandi bamamulensanga, banobambana nandi bamamuvega dive dinganyi

³⁷na jogu bamavosa rie: Pa ndeju la kaga jibaJuif, kegobula!

³⁸Va kurusu andi vamasonugu mambu memama rie: Agugu la kaga jibaJuif.

³⁹Muvayitsi mabi umosi agumagomunu va kurusu amamupeji rie: Ndeʼ gugaa Christ? Kegobula nogobula jetu wetu!

⁴⁰Tumba ususu amamusiemba rie: Gugedumi Nsambi? Tsia jetu botsu tuikilusu mukilu umosi?

⁴¹Diwelimina ombu getu mu mbari tumavaga mabi tumba jandi agaavaga dibi.

⁴²Mbana amavosa na Jesus rie: Tangimini ava guruyila nana kaga.

⁴³Jesus amamuwaka rie: Dingensa namunyi guba nami o paradis.

⁴⁴Ubongila ava muangulu bulongu buotsu bumaba yika pisama na pisama te na murekumunu.

⁴⁵Wisi umapinda na dumbu duNdagu Nsambi dumapasiga va gari.

⁴⁶Jesus amagamuga na diufi dineni rie: Tata, nyiwakisi yinyunyi yiami ombu gagu. Anovosa nana amatabuga.

⁴⁷Yivunda yikama bagora anolaba adimaba amayitsa Nsambi na amavosa rie: Dingensa mutu eni abetsi mutu usungama.

⁴⁸Abamawenda uyelaba adimaba vana banolaba adimavagu bamayenagabusila nodumanga tulu tsiogu.

⁴⁹Bambatsi baJesus na bagetu abamaruyila o Galilee bamasikama vala uyegengila adimavagu.

⁵⁰Vamaba mutu diina diandi Joseph agumatsana o Arimathee, diwendi rie: dimbu dibaJuif. Amaba mutu uboti na asigama na amaviva Durumu duNsambi. Amaba yivunda yineni tumba asamaba kingu mosi na bivunda bisusu mu diambu diJesus.

⁵¹

⁵²Amawenda ombu Pilate uyewivula mfumbi Jesus.

⁵³Amajisundusa va kurusu na amajipieta va muvelu; amajisunsa mu ngila ajimapaku mu dimanyi aji mbe jisakasunsu mfumbi jisusu.

⁵⁴Yilumbu yieni yimaba vendredi, diwendi rie: samedi jikabebeli.

⁵⁵Bagetu abamaruyila o Galilee bamawenda na Joseph uyelaba mfumbi Jesus nana jimasunsulu muna ngila.

⁵⁶Bamagabuga o ndagu na bamakunsa matsi na miyombu uyegotsa mfumbi. Mbana yilumbu yisamedi bamatsana, adina dimaba diwelimina na migaga miogu.