Read Punu Luc 24 Bible Online

Luc 24 - Punu bible

Luc 24

¹Muna kedi yilumbu yitsona, bagetu bamagabuga o ngila. Bamabega matsi na miyombu abi bamakunsa.

²Bamarasuna dimanyi dimagusulu va munu ungila.

³Kabogu bamakota tumba basamalaba mfumbi Jesus.

⁴Ava bamaditasilanga, laba babaala babeji abamaduara biduaru abimaba vedi vedi bamalabana nogu.

⁵Bamagaangu na goma na bamagudama va tsi; babaala beni bamabawivula rie: Mu mbari yi duirombili ojivu monyu va gari abafu?

⁶Jandi agatsi, amarambuga o dufu.

⁷Rangiminanu ava amabila o Galilee amavosa nenu rie: Muana Mutu owakusu ombu batu babi; ogomunu va kurusu na orambuga o dufu mu yilumbu ayimurieru.

⁸Mbana bagetu bamarangimina mambu mandi.

⁹Ava bamaruyila o ngila bamatsingula mambu meni motsu ombu digumi na mudukitsi umosi nombu batu basusu.

¹⁰Marie, muisi Magdala na Jeanne na Marie nguji Jacques na basusu abamaba nogu bamatsingula mambu meni ombu bilumbi.

¹¹Bilumbi bimatasa yiri bagetu bamavosa yika kulini na bisamabavayila yitu.

¹²Tumba Pierre amarelama na amawenda mbangu o ngila. Anobandama, amalaba yika matsanda na matsanda. Adimalabana dimamukambisa puela kabogu amagabuga o ndagu andi.

¹³Muna yilumbu yieni badukitsi babeji bamawenda o Emmaus, dimbu adisamaba vala na Jerusalem.

¹⁴Bamayenavosanga mambu amamalabana.

¹⁵Utsunda betsundi muna nsila na Jesus amafubana nsila nogu

¹⁶tumba basamamujaba.

¹⁷Amabawivula rie: Diambu yi duitsundili? Bamasikama na mu diambu dimunyongu

¹⁸umosi, diina diandi Cleopas amawivula Jesus rie: Yika ndeʼ buandi aguitsani o Jerusalem agugejabi adimalabana guna bilumbu biebibi?

¹⁹Amabawivula rie: Diambu yi? Bamamuwaka rie: Mambu amamalasu ombu Jesus muisi Nazareth. Dibaala diedina amaba mubiyitsi nesi mambu na bisalu biandi bimayitsu na Nsambi na batu wandi.

²⁰Bivunda bibavagulitsi bapagu na barumitsi bamamuvega mbela dufu na bamamugomina va kurusu.

²¹Jetu tumaletasa yiri jandi ogobula Israel. Motsu mana malabininanga tuka bilumbu birieru.

²²Bagetu bamosi abamaba netu bamatusutusu; muna kedi bamawenda o ngila

²³tumba basamalaba mfumbi andi. Banogabuga bamatutsingula yiri bamalaba yiriariamu na biansa bimabatsingula rie: Aji monyu.

²⁴Basusu abamaba netu bamawenda o ngila na bamalaba motsu nana bagetu bamavosila; tumba basamamulaba.

²⁵Mbana Jesus amavosa nogu rie: Aa, jenu biduka, dugevavayili amamavosu na babiyitsi yitu, mbeyianu?

²⁶Dugejabi divu diwelimina yiri Christ olelaba maguga ne akalaba bundumba buandi?

²⁷Mbana amabavindiyila motsu amamasonu mu diambu diandi ubongila na mambu maMoise te na mambu mababiyitsi botsu.

²⁸Banobambana na dimbu jandi amaronda uvioga o gusu tumba bamamugoma novosa rie:

²⁹Silama vava, wisi yika utsima etsimi. Kabogu amakota nogu.

³⁰Ava bamabila va tavula amabonga dipa na anomana ugabusila Nsambi diboti amadibukula na amabavega dionyi.

³¹Vana vana misu mogu mamadibuga na bamamujaba tumba amatsiemuga va gari ogu.

³²Bamavosasana rie: La dibandu tumagululu yinoru ava amatuvindiyila Bisonu mu nsila!

³³Bamarelama muna diweru dieni na bamagabusila o Jerusalem. Bamarasuna digumi na mudukitsi umosi na basusu bagukama.

³⁴Abamaba vana bamavosa na jogu abamaruyila o Emmaus rie: Dingensa, Fumu amarambuga na amalabana na Simon!

³⁵Mbana jogu wogu bamabatsingula adi bamalaba mu nsila na nana bamamujabila mu diweru adi amabagabila dipa.

³⁶Ava bamavosila mambu meni Jesus jaʼ beni amalabana va gari ogu na amavosa rie: Sunsanu mirima!

³⁷Bamagaangu na keri na yomumu; bamatasa yiri bamalaba ditengu.

³⁸Tumba Jesus amabawivula rie: Dibandu yi duireyimini? Dibandu yi duna matasa makulini?

³⁹Gengilanu makaka mami na makulu mami nojaba la menu. Mbembianu na jabanu yiri ditengu digaa na musonyi vo bivisi nana duilabili nami.

⁴⁰Ava avosilanga nana amabalasa makaka mandi na makulu mandi.

⁴¹Bamakambulu puela te na basamarungula umuvayila yitu, kabogu amabawivula rie: Duna mua biguji?

⁴²Bamamuvega mua nyama tsigoku.

⁴³Amatsibonga na amaji va gusu ogu.

⁴⁴Mbana amavosa rie: Mambu memama nyimadulonsa ava nyimatsanina nenu: diwendi rie: Motsu ama Moise na babiyitsi na nyimbu beposili vengu molabana.

⁴⁵Mbana amabadibulila matasa yiri bobitsiyisa.

⁴⁶Jandi rie: Adimasonu adidi rie: Christ olelaba maguga mbana orambuga o dufu mu yilumbu yimurieru.

⁴⁷Dukalulu dudiela na dutandulu dumasumu biulonsu mu diina diandi ubandila o Jerusalem te no malongu motsu.

⁴⁸Jenu duji bambeji bamambu meni.

⁴⁹Meʼ beni nyudutindila agu Tata amavangana nenu. Tumba letsananu o dimbu te na dudila mangolu ameruyili o julu.

⁵⁰Mbana Jesus amababega te no Bethanie avana amanangula miogu na amabagabila miula.

⁵¹Mima diweru dieni amakakana nogu na amamatusu o julu.

⁵²Bamamuyitsa mbana bamagabusila o Jerusalem na nsangu jineni.

⁵³Bamabanganga o Ndagu Nsambi uyitsanga nogabusilanga Nsambi diboti.