Read Punu Luc 3 Bible Online

Luc 3 - Punu bible

Luc 3

¹Muna yilima yidigumi nabiranu bidurumu dukaga Tibere, Ponce Pilate amaba yivunda yibulongu buJudee na Herode amaruma o Galilee na muana nguji andi Philippe amaruma o Ituree na mu bulongu bubaTrachonie na Lysanias amaruma o Abilene;

²Anne na Caiphe bamaba bivunda bibavagulitsi bapagu. Va temu eni Mbembu Nsambi jimatsingulu ombu Jean muana uZacharie agumaba o kumu.

³Jean amalinganga mu mbanda tsi jiotsu jiJourdain uyenalubusanga batu rie: Kalulanu diela na batusuanu; Nsambi odutandila masumu menu.

⁴Nesi mubiyitsi Esaie amadivosa rie: Adidi la diufi dimutu oyigamuyi o kumu rie: Solanu nsila Fumu futsanu mansila mandi.

⁵Bibususu biotsu biubasu mikongu miotsu miusiepulu na bikundubuga biudiamusu; amavu marekama mosungama na mansila amavu biduna mofutsu.

⁶Batu botsu bolaba nana Nsambi otugobulila.

⁷Bapuela bapuela bamawendanga ombu Jean uyebatusu. Amabanyangila rie: Bijolu bijenu, anyi amadulubusa urina kabu Nsambi?

⁸Salanu bisalu biwelimina abiulasa yiri dumakalula diela! Duyakematisa novosa rie: Tuji baana baAbraham! Ngensa nyidutsinguli rie: Ne na mamanyi memama Nsambi orungula ukitusila Abraham baana!

⁹Diumbi dimakesingulu va ngansi tsimuiri; kabogu muiri uotsu agugeburi milunda miboti uwangu nobuagu o muji.

¹⁰Botsu bamamuwivula rie: Kabogu yika tsie tuvayila?

¹¹Jandi amabagabusila rie: Jandi ona bikutu bibeji aveyi yimosi ombu agugaa na yikutu na ojivu na biguji agabi na basusu.

¹²Babongitsi balepu wandi bamawenda uyebatusu na bamawivula Jean rie: Mulonsi, tsie tuvayila?

¹³Amabagabusila rie: Ava dubongila lepu duyaviosulila adimaduvegu musuga.

¹⁴Bagora wandi bamamuwivula rie: Jetu tsie tuvayila? Amabagabusila rie: Duyamuepatula batu mbongu nesi na mangolu nesi na mapemi tumba labanu ubueji na futa aji duidili.

¹⁵Batu botsu bamaba nsunsaba: mutu mutu amatasa tanguji Jean la Christ.

¹⁶Kabogu Jean amabatsingula rie: Menu nyidubatisi na mamba tumba oyiruyi epiolili mangolu na nyisaawelimina ne unyangula mikudu mibapondu bandi. Odubatisa na Yinyunyi yiNsambi na muji.

¹⁷Aji ukunsama na yisagulu yiandi usayila uresi. Osuega uresi o yisuegulu yiandi tumba onyensa bipupu o muji agugetsimi.

¹⁸Jean amalubusa batu na mambu memama na masusu mapuela na amabasamunina Musamu Uboti.

¹⁹Na amasiemba Herode yivunda yibulongu wandi; diwendi rie: Herode amabonga Herodiade mugatsi umuana taji andi mujeba na amavaganga puela mabi masusu.

²⁰Va julu motsu mana amabuesa disusu: amakotisa Jean o tsugu.

²¹Batu botsu banobatusu Jesus wandi amabatusu. Ava amasambilila julu jimadibuga

²²na Yinyunyi yiNsambi amasuduga mu yibagunu yidibembi na dimamubetama; diufi dimagulunu o julu rie: Guji muana ami udurondu, nyilabi nsangu jineni nagu.

²³Ava Jesus amabandila yisalu yiandi amaba na magumarieru mabilima.

²⁴Batu bamamulaba nana muana uJoseph muana uHeli muana uMatthat muana uLevi muana uMelchi muana uJannai muana uJoseph,

²⁵muana uMatthatias muana uAmos muana uNahum muana uEsli muana uNaggai,

²⁶muana uMaath muana uMatthatias muana uSemein muana uJosech muana uJoda

²⁷muana uJoanan muana uRhesa muana uZorobabel muana uSalathiel muana uNeri,

²⁸muana uMelchi muana uAddi muana uKosam muana uElmadam muana uEr

²⁹muana uJesus muana uEliezer muana uJorim muana uMatthat muana uLevi,

³⁰muana uSimeon muana uJuda muana uJoseph muana uJonam muana uEliakim,

³¹muana uMelea muana uMenna muana uMatthata muana uNathan muana uDavid,

³²muana uJesse muana uJobed muana uBooz muana uSala muana uNaasson

³³muana uAminadab muana uAdmin muana uAmi muana uEsrom muana uPhares muana uJuda,

³⁴muana uJacob muana uIsaac muana uAbraham muana uThara muana uNachor,

³⁵muana uSeruch muana uRagau muana uPhalek muana uEber muana uSala,

³⁶muana uKainam muana uArphaxad muana uSem muana uNoe muana uLamek,

³⁷muana uMathusala muana uHenok muana uJared muana uMaleleel muana uKainan,

³⁸muana uEnos muana uSeth muana uAdam muana uNsambi.