Read Punu Luc 5 Bible Online

Luc 5 - Punu bible

Luc 5

¹Yilumbu yisusu Jesus amaba va disimu diyiiiba yiGenesareth na batii bamasindasana uyegulu Mambu maNsambi.

²Amalaba bota beji va dibungu atsi bavubitsi bamasila ava bamawendila uyesusa mbusa tsiogu.

³Amanangama mu bota jiSimon na amamuwivula usindila bota mua pesu. Mbana amatsana muna uyelonsa batu.

⁴Ava amamanina ulonsa amavosa na Simon rie: Wendanu avavu ndonga, jenu na bambatsi bagu uyebuaga mbusa tsienu.

⁵Simon amamugabusila rie: Mulonsi, tutsivuba mukolu uotsu na tugaadila banyama tumba mu diambu diagu nyuleweliga.

⁶Banotsibuaga, bamadila banyama bapuela te na mbusa tsimabupasiga.

⁷Kabogu bamagebula bambatsi bogu abamaba mu bota jisusu uyebawamusa. Bamawagula na bamabasa bota tsiotsu tsibeji te na tsimabudiama.

⁸Simon Pierre anodilaba amakutama va gusu Jesus na amavosa rie: Kokolu Fumu, lekakana nami, nyiji mungo masumu.

⁹Diwendi rie: Simon, jogu na bambatsi bandi bamagaangu na goma ulaba banyama bapuela aba babanodila.

¹⁰Munongu mosi bambatsi bandi Jacques na Jean baana baZebedee bamakambulu wandi. Tumba Jesus amavosa na Simon rie: Guyalaba goma! Ubongila namunyi gudila batu tsiri yika banyama.

¹¹Banobega bota tsiogu va dibungu bamasila biotsu na bamaduka Jesus.

¹²Yilumbu yisusu Jesus amaba o musiengi na vamaruga yibedu yinyambi ombu gandi. Anolaba Jesus amakutama va gusu andi na amamutsingula rie: Fumu, pa guirondi gurungula umbelusa.

¹³Jesus amasimbula gogu na amamubemba na amavosa rie: Nyirondi, beluga. Vana vana nyambi jimabeluga. Mbana amamutsingula rie: Guyatsingula mutu.

¹⁴Tumba yekelasa ombu bavagulitsi bapagu nana gumabeluyila; vagula pagu aji Moise amaruma yiri batu botsu bolaba yiri gumabeluga.

¹⁵Tumba diduma diJesus dimanyavanga uviolila; batu bapuela bapuelabamaruga umugulu nobelusu.

¹⁶Temu na temu Jesus amagusuga va gari ogu uwenda o kumu uyesambila.

¹⁷Yilumbu yisusu Jesus amalonsa. BaJuif abamaba baPharisie na milonsi mimigaga bamaba batsana bebeli nandi, bamarugasana o misiengi miotsu miGalilee no Judee no Jerusalem wandi.

¹⁸Batu bamabega yibomfi va tangi na bamaronda umukotisa o ndagu nomusunsa va gusu Jesus.

¹⁹Tumba vasamaba mbura umukotisa mu diambu diyinombu. Kabogu bamamunangiga va julu muansa na banotoba muansa mbana bamamusundusa na tangi andi va gusu Jesus va gari dibuli.

²⁰Jesus anolaba yitu yiogu amavosa na yibedu rie: Mbatsi ami masumu magu mamagutandu!

²¹Milonsi mimigaga na baPharisie bamabanda uvosa nowivula rie: Jandi gugu la nyi oyilensi Nsambi? Anyi orungula utanda mutu masumu, tsia yika Nsambi buandi?

²²Jesus anojaba matasa mogu amabawivula rie: Dibandu yi matasa meni mavunemi?

²³Diambu yi diwelimina uvosa: Masumu magu mamatandu? Vo rie: Relama nowendanga?

²⁴Tumba nyudulasa yiri Muana Mutu ana musuga uyetanda batu masumu. Kabogu amavosa na yibomfi rie: Relama, bonga tangi agu nogabuga o ndagu agu!

²⁵Vana vana yibomfi amarelama va misu mogu; amabonga tangi eni na amayenawenda o ndagu andi uyenadodisanga Nsambi.

²⁶Botsu bamakambulu puela, diuleba goma jimabagaanga bamadodisa Nsambi na bamavosa rie: Adi tutsilaba namunyi tusakadilaba na kala.

²⁷Mbana Jesus amagusuga va musiengi eni na amarasuna Levi, mubongitsi lepu, atsana va mbura aji bamabongilanga lepu. Jesus amamunengila rie: Nduki!

²⁸Levi amarelama; amasila biotsu na amamuduka.

²⁹Levi amamulambila mulambu uneni o ndagu andi na babongitsi balepu bapuela na batu basusu bamatsana nogu va tavula.

³⁰BaJuif abamaba baPharisie na milonsi mimigaga bamanyinganga na bamawivula badukitsi bandi rie: Dibandu yi duilili nonuanganga na babongitsi balepu na bango bikumbu?

³¹Jesus amawagula rie: Batu abavu polu bagaa na nsala nganga, yika bibedu.

³²Nyisamaruga ukalusa basungama diela tumba nyimaruga yiri bango bikumbu bokalula diela.

³³Batu bamavosa na Jesus rie: Badukitsi baJean bebusingi uji temu na temu na besambilingi; badukitsi babaJuif abamaba baPharisie bevayingi munongu mosi tumba badukitsi bagu bejangingi na benuangingi.

³⁴Jesus amabawivula rie: Jenu durungula ubusisa bambatsi bayiwela-mugetu uji mu temu yiwela-mugetu aki nogu? Tsatsabi!

³⁵Diweru diuruga adi yiwela-mugetu obapatulu mbana bobusa uji.

³⁶Jesus amababuayila nongu ejiji rie: Mutu agepasi yikutu yigona ulonda yikutu yigulu. Paevayi nana obivisa yikutu yigona na yirendi yigona yigesoyini na yikutu yigulu.

³⁷Na mutu agewitili malamu mamienga mu mambuta mamikata magulu. Pa evayi nana mbe mopansa mambuta mamikata na malamu mopumuga.

³⁸Kabogu owitila malamu mamienga mu mambuta mamikata magona!

³⁹Mutu agerondi malamu mamienga pa amanu malamu magala. Evosi rie: Ngomuenu mienga!