Read Punu Migaga Mimatubula 17 Bible Online

Migaga Mimatubula 17 - Punu bible

Migaga Mimatubula 17

¹Duyavagulila Fumu Nsambi enu nesi ngombi nesi yindombu nesi yinsabi ayivu na bifu bimunongu na munongu; mu mbari yivu nsoruru va gusu Fumu Nsambi enu.

²Diurungula uba yilumbu yimosi voba mutu o musiengi umosi va gari misiengi ami Fumu Nsambi enu oduvega, nesi dibaala nesi mugetu aguvaga adigaa diwelimina na Fumu Nsambi enu nokubula pangini andi;

³pa mutu eni oyitsa bansambi bangana uyebasalila nobakutimina, nesi wisi nesi tsungi nesi bambuelili; abi Fumu amagandisa

⁴yika duidijabi vo yika duidigulu dukamuketanga na buranga. Pa divu ngensa yiri dimavagu, diwendi rie: Nsoruru tsieni tsimalabana o Israel,

⁵mbana dukabega yeri dibaala yeri mugetu agumavaga dibi dieni te no dikotulu dimusiengi, dukamutindisa mamanyi te na dibaala dieni vo mugetu eni ofu.

⁶Bambeji babeji nesi barieru banomana miunu, agumavegu mbela aboku, ayaboku na bumbeji bumutu mosi.

⁷Bambeji boreyila umutindili mamanyi ava obokulu mbana batu basusu bomutindila mamanyi. Adina diutsiemusa dibi va gari enu.

⁸Pa volabana diambu diranga adi dugorungula utabulu bunsonsi, pa divu diambu dibukongu nesi paga jimatumunu, nesi pura jimanemusu, dukawenda o mbura aji Fumu Nsambi enu amasola.

⁹Dukawenda ombu bisi Levi abavu bavagulitsi bapagu, nombu jandi agusala yisalu yibunsonsi; dukayelabana nogu na bodulonsa.

¹⁰Dukakelula adi bodulonsa o Mbura Nsambi; mbana dukabikipanga.

¹¹Duyabusa ne mugaga umosi ne dilongi dimosi abi bodulonsa.

¹²Mungo dunangu oyibusi ugululu muvagulitsi upagu aguvu na yisalu yiFumu Nsambi enu vo nsonsi aguna aboku. Adina diutsiemusa dibi va gari baIsrael,

¹³mbana batu bogulu na bolaba goma na dunangu dutsiemuga.

¹⁴Ava dutolila o bulongu abu Fumu Nsambi enu oduvega na ava dubudilila, dunomana urunga mandagu menu duvosa rie: Tuirondi usola kaga nana divu o malongu amavu yiari na yiari.

¹⁵Kaga eni abi yika mutu agu Fumu Nsambi enu odusolila. Oba umosi va gari baana bataji benu; duyasola muenyi uba kaga enu.

¹⁶Ayakelisa bakabala bapuela na ayagabusa batu o Egypte uyesumba bakabala bapuela; mu mbari Fumu amadutsingula rie: Duyagabuyila muna nsila eni.

¹⁷Ayawela bagetu bapuela abomupembusa nsila: ayagukiga lora jivema na lora tsipuela tsipuela.

¹⁸Ava kaga odilila yitsiga yibufumu asoni migaga miemimi mu dibuku, omiwiji ombu bisi Levi abavu bavagulitsi bapagu.

¹⁹Diubanganga nandi na odiranganga te na dufu duandi mbana owiji uduma Fumu Nsambi andi nokelisanga nokipanga mambu motsu amamasonu mu dionyi.

²⁰Adina diumugandisa ukematisa nolensa baana bataji bandi. Ayabusa udedila migaga mieni miotsu, mbana jogu na bategula bandi bababaala bobanganga bakaga baIsrael te na mutubu.