Read Punu Migaga Mimatubula 18 Bible Online

Migaga Mimatubula 18 - Punu bible

Migaga Mimatubula 18

¹Bisi Levi abavu bavagulitsi bapagu na yifumba yiotsu yiLevi bagodila nesi dikabu nesi disiala va mosi na baIsrael basusu: bokusuyila mu pagu tsiunyensa tsiuyitsila Fumu na mu disiala diFumu.

²Bagodila disiala va mosi na baana bataji bogu: Fumu oba disiala diogu nana jaʼ beni amabatsingulila.

³Guluanu musuga ubavagulitsi bapagu, jogu abovagula pagu tsiunyensa, nesi ngombi nesi yindombu nesi yinsabi: bovega muvagulitsi upagu keri na ndaga na yifundu.

⁴Dukamuvega biumanga bitsangu tsible na bimalamu na bimatsi na bitega bimionyi mibindombu.

⁵Fumu Nsambi enu amasola bisi Levi va gari bifumba biotsu yiri bosala bisalu biandi, jogu na baana bandi bababaala te na mutubu.

⁶Pa muisi Levi ogusuga va musiengi umosi mu misiengi mienu, diwendi rie: mbura yika la mbura aji amatsanina o Israel nowenda o mbura aji erondi aji Fumu amamusolila,

⁷na osala yisalu yiFumu Nsambi andi dedi mosi na bisi Levi abavu baana bataji bandi, abesali o Mbura Nsambi

⁸odila dikabu diandi dibiguji adiuba dedi na adiogu na olaba nsangu: va julu vana oba na musuga usumbisa bibataji bandi.

⁹Ava dutolila o bulongu abu Fumu Nsambi enu oduvega, duyagukiyila bisi malongu meni nowiji nsoruru tsiogu.

¹⁰Vayaba ne mutu mosi o mandagu menu agunyensa muana andi udibaala nesi umugetu na vayaba ne mutu mosi agukotisa banganga bamunongu na munongu o mandagu menu,

¹¹vayaba ne mutu mosi oyifuami abeyitsi bayisi nesi aberesi nesi abevandi nesi abekelisi matengu.

¹²Mu mbari botsu abevayi mambu meni bevayi nsoruru va gusu Fumu na mu diambu dinsoruru tsieni Fumu Nsambi enu obingila bisi malongu yiri dumadila.

¹³Duba aba Fumu Nsambi enu.

¹⁴Mu mbari batu beni aba dubinganga bepingi baresitsi na bavanditsi; tumba Fumu Nsambi enu edugandisi motsu mana.

¹⁵Fumu Nsambi enu odupalisila mubiyitsi va gari baana bataji benu aguba nana menu: dukamugululu.

¹⁶Adi dumawivula Fumu o mukongu uHoreb yilumbu yiyibenguna ava dumavosila rie: Tuyamuegulu diufi diFumu Nsambi etu na tuyamuelaba muji eni uneni yiri tukefu.

¹⁷Fumu amansingula rie: Adi batsivosa diwelimina.

¹⁸Nyubapalisila mubiyitsi va gari baana bataji bogu aguba nana ndeju, jandi oposilanga na obatsingulanga motsu ama nyumurumanga.

¹⁹Pa mutu agogulu mambu mami ama oposilanga, meʼ beni nyumukilisa.

²⁰Tumba mubiyitsi aguba na bukidi uposila adi nyisamamuruma uvosa vo aguvosila bansambi bangana, jandi oboku.

²¹Tanguji gukewivula rie: Tsie tujabila diambu diFumu?

²²Ava mubiyitsi obiyila diambu adigolabana adina diuba diambu adi Fumu asamaruma. Mubiyitsi amadivosa na bukidi bujaʼ beni: duyamuduma.