Read Punu Migaga Mimatubula 22 Bible Online

Migaga Mimatubula 22 - Punu bible

Migaga Mimatubula 22

¹Pa dulaba ngombi vo yindombu vo yinsabi yimutu nagu ayimatsiemuga duyayiliyila nsima, dukayigabusa ombu gandi.

²Pa agetsani bebeli nenu vo dugejabi agudila yionyi dukayikelisa o mandagu menu. Yiutsana guna te na mutu oyeyiromba mbana dukamugabusila yionyi.

³Dukavaga munongu mosi nesi na buru nesi na yikutu nesi na yima yiotsu ayi mutu nagu otsiemusa ayi dumalaba; dugaa na musuga uyiliyila nsima.

⁴Pa dulaba buru jimutu nagu vo ngombi andi ajimaberuga va nsila duyajiliyila nsima, dukajiwamusa usimbula.

⁵Mugetu ayaduara yiduaru yidibaala na dibaala ayaduara yiduaru yimugetu; mu mbari uotsu aguivayi mambu meni avu nsoruru va gusu Fumu Nsambi enu.

⁶Pa dulaba diuva ditsoli mu nsila adiuba mu muiri vo va tsi na diuba na baana vo makeji na nguji agudimina baana vo makeji, duyabonga nguji na baana bandi,

⁷dukawensa nguji, dukabonga yika baana yiri dulabanga nsangu na dutsinga o bulongu.

⁸Pa duirungisi mandagu magona, miansa mibi mikandu yiri pa mutu omata o julu mionyi agobonduga nofu.

⁹Duyavara bivaru bimunongu ususu o manungi mamirayisan. Pa duivayi anana digumba dimirayisan na dibivaru bisusu mbe biuwakusu ombu Fumu.

¹⁰Duyasalisa ngombi na buru va mosi ava duifutsili.

¹¹Duyaduara biduaru abimabuangu na minongu mibanyongi mibeji.

¹²Dukavaga matsatsa mana mu mafubu mabikutu abi duiduaringi.

¹³Diurungula uba dibaala amawela mugatsi na anofubana yitsiga nandi, agemuemuronda.

¹⁴Pa emuveyi mbela na ebivisi diina diandi ava evosili rie: Nyimawela mugetu egugu, nyinofubana yitsiga nandi nyimamurasuna amajaba babaala kala,

¹⁵mbana taji na nguji mugetu eni bobonga bilimba bibutsiemi buandi na boyebilasa ombu bivunda bimusiengi va dikotulu dimusiengi.

¹⁶Taji muana mugetu otsingula bivunda rie: Nyimawetsa muana ami ombu dibaala dieni na agemurondi;

¹⁷emuveyi mbela ava evosili rie: Ngaarasuna muana agu yiri avu tsiemi. Kabogu labanu bilimba bibutsiemi bumuana ami abibi. Mbana bowala tsanda jibutsiemi va gusu bivunda bimusiengi.

¹⁸Kabogu bivunda bimusiengi bogaanga dibaala dieni na bomukilisa

¹⁹mu mbari amabivisa diina ditsiemi jibaIsrael, bomufutisa kama mbongu tsilora jivema atsi bovega ombu taji muana mugetu. Jandi oba mugatsi andi na mulumi agorungula umugusula te na dufu duandi.

²⁰Tumba pa diambu divu dingensa yiri muana mugetu asamaba tsiemi,

²¹bopalisa muana mugetu va gusu kana undagu taji andi; bisi musiengi bomutindila mamanyi te na ofu mu mbari amavaga buvuyisa o Israel ava amabila o ndagu taji andi.

²²Adina diutsiemusa dibi va gari enu.

²³Pa muana mugetu amakumumunu na dibaala obenguna nandi o musiengi na ofubana yitsiga nandi,

²⁴dukababega botsu babeji va dikotulu dimusiengi, dukabatindila mamanyi te na bofu; muana mugetu, mu mbari asamagamuga na dibaala mu mbari amabivisa mugatsi umutu nandi. Adina diutsiemusa dibi va gari enu.

²⁵Pa o musiru dibaala obenguna na muana mugetu agumakumumunu, na omulasa bukanyi nofubana yitsiga nandi, dibaala dieni aboku wandi pinsa.

²⁶Guyavaga muana mugetu diambu; agaa na mbela jidibi dieni ajiumurombisa dufu, (mu mbari diurungula uba nderi mutu agu mutu nandi amagaanga nomuboka.)

²⁷Muana mugetu agumakumumunu agumabenguna na dibaala dieni o musiru amagamuga tumba asamadila mutu umuwamusa.

²⁸Pa dibaala obenguna na muana mugetu aguvu tsiemi na asakakumumunu na omulasa bukanyi nofubana yitsiga nandi na bobatsukiga,

²⁹dibaala afuti magumaranu mambongu ombu taji jimuana mugetu mu mbari amamubivisa, jandi oba mugatsi andi na agorungula umugusula te na dufu duandi.