Read Punu Migaga Mimatubula 23 Bible Online

Migaga Mimatubula 23 - Punu bible

Migaga Mimatubula 23

¹Ne mutu mosi ayafubana yitsiga na mugatsi utaji andi mu mbari ulensa elensi taji andi.

²Dibaala adimakaluga muvangu vo adimanemusu ayasingu o yibenguna yiFumu.

³Muana agumaburu mu butsuari, jaʼ wandi ayasingu o yibenguna yiFumu: nesi te na dukula dumugumi, bayasingu guna.

⁴Bisi Ammon na bisi Moab bayasingu o yibenguna yiFumu, nesi te na dukula dumugumi bayasingu guna,

⁵mu mbari basamayedubengusana na biguji na mamba ava dumabila muna nsila temu aji dumapalila o Egypte. Va julu vana bamafuta Balaam muana uBeor, muisi Petor o Mesopotamie uduloga.

⁶Tumba Fumu Nsambi enu amabusa diufi diBalaam. Amadukalusila mulogu eni miula mu mbari Fumu Nsambi enu edurondi.

⁷Te na dufu duenu duyabawamusa na mambu maminongu na minongu.

⁸Duyagengila bisi Edom nderi bavu nsoruru; jogu bavu baana babataji benu; duyagengila bisi Egypte nderi bavu nsoruru mu mbari jenu wenu dumaleba benyi o bulongu buogu:

⁹baana bogu badukula dumurieru bosingu o yibenguna yiFumu.

¹⁰Ava dutoyila divita na bavinitsi benu dunovaga milaku kekelisanu yiri dugonamu muinsi umambu mabi.

¹¹Pa va gari enu vavu gora ajivu na muinsi mu mbari amapalisa tsangu tsiandi, jaʼ beni ogusuga va gari enu na ayagabuga nyangu o mulaku.

¹²Ava tsisiga obuila mbana wisi unotsima orungula ugabuga o mulaku.

¹³Jenu duba va jenu mbura ajiuba jikakana na mulaku, avana duwenda tsomu.

¹⁴Duba na bapelu mu mifuna aba dutimina yiduna nomuebidibiga pa dumamana tsomu.

¹⁵Fumu Nsambi enu elingi va mulaku enu udukelisa nowakisa bavinitsi benu ombu genu; kabogu diwelimina yiri mulaku enu uba ulioma yiri Fumu agolaba nsoruru jiotsu va mulaku enu na yiri agoduliyila nsima.

¹⁶Duyagabusa muviga ombu fumu andi agumayesuema ombu genu.

¹⁷Otsananga nenu va mbura aji jaʼ beni osola o misiengi mienu, mbura yika la mbura ajiumulasa ubueji; duyamukambisa.

¹⁸Vayaba yimbembu va gari baana babagetu baIsrael.

¹⁹Duyabega futa jiyimbembu nesi futa jibabaala abevayi dijamba na babaala nogu o ndagu Fumu Nsambi enu ayidugusu pangini yika la pangini; mu mbari botsu babeji bavu nsoruru va gusu Fumu Nsambi enu.

²⁰Duyaromba udila mbika ombu mutu nenu: nesi mbongu nesi biguji nesi yima yiotsu ayiwelimina ufuta na mbika.

²¹Durungula udila mbika ombu muenyi tumba dugojidilila ombu batu nenu yiri Fumu Nsambi enu odugabila miula mu bienu biotsu.

²²Pa duivangini pangini na Fumu Nsambi enu duyatsikadana ujidugusu mu mbari Fumu Nsambi enu oduwivula jionyi, adina diuba dibi dienu.

²³Pa dubusa uvangana pangini dugevayi dibi.

²⁴Tumba dukakipanga nodugusungu pangini tsitondini atsi dumavangana na Fumu Nsambi enu.

²⁵Pa dukota o gari manungi mabatu nenu durungula uji mirayisan te na dugukuru; tumba duyalongila maponsi menu.

²⁶Pa dukota o gari manungi mable durungula utsidokula na makaka tumba duyasalisa mikuati utabula ble tsibatu nenu.