Read Punu Migaga Mimatubula 24 Bible Online

Migaga Mimatubula 24 - Punu bible

Migaga Mimatubula 24

¹Diurungula uba dibaala owela mugetu mbana yilumbu yimosi mugetu olabana na diambu diyisonyi na agomuelaba ubueji nandi; omusonina muganda uboka diwela na anomuwakisa uonyi omupalisa o ndagu andi.

²Mugetu opala o ndagu dibaala na oyenawenda, orungula uwelu na dibaala disusu.

³Pa dibaala dieni dimubeji diumubusa wandi omusonina muganda uboka diwela na anomuwakisa uonyi omupalisa o ndagu andi: vo pa dibaala dieni adimubeji ofu,

⁴mulumi andi utega agumamubinga agomuerungula umuwela mu mbari mugetu aka muinsi na dionyi divu nsoruru va gusu Fumu. Duyabasa bulongu mabi, abu Fumu Nsambi enu oduvega disiala.

⁵Dibaala abanokota diwela ayawenda o utoga divita na bayamuvega yisalu yiotsu yisusu. Te na yilima yimfuimbila ojegusu utsana ulasanga ubueji ombu mugetu agu abanowela.

⁶Bayavega mikuati tuga; mu mbari mionyi mivu tsongu mutu.

⁷Pa borasuna muisi Israel agumadaga mutu nandi na amamuvaga muviga andi vo amamusumbisa, mudayitsi eni aboku. Adina diutsiemusa dibi va gari enu.

⁸Kebananu na mapura manyambi tsiminongu na minongu novaganga motsu ama bisi Levi abavu bavagulitsi bapagu bodulonsanga;

⁹rangiminanu adi Fumu Nsambi enu amavayila Miriam mu nsila dunopala o Egypte.

¹⁰Pa dusombisa batu nenu yima yika la yima, jaʼ beni oduwakisa tuga, duyakota o ndagu andi uyegaanga koli;

¹¹dukaba o gusu kana, jogu aba duisombisi boyiduvega tuga va gusu kana.

¹²Pa dibaala dieni avu yijaga na oduvega yijungi yiandi tuga, duyayilatsa ne yilumbu yimosi;

¹³dukamugabusila yionyi ava tsisiga yiri obundama na yionyi. Jandi odugabusila diboti; na Fumu Nsambi enu olaba dusungugu duenu.

¹⁴Duyakambisa basalitsi abavu bijaga ne pa bavu bamosi va gari batu nenu nesi benyi abetsani o bulongu buenu.

¹⁵Dukabavega futa tsiyilumbu yiogu nesi wisi ukatsima; bavu bijaga na bavu liyiyi utsiviva. Pa tsiri nana bodugamuyila Nsambi na duba na mbela.

¹⁶Bagobokisa bataji mu diambu dimabi mabaana, na bagobokisa baana mu diambu dimabi mabataji; bobokisa mutu mutu mu dibi dijaʼ beni.

¹⁷Duyalasa benyi na bisiana maguga na duyabonga biduaru bibakuili tuga,

¹⁸dukarangimina yiri jenu wenu dumaleba baviga o Egypte na Fumu Nsambi enu amadupalisa; la dibandu nyiduveyili migaga miemimi yiri dumikipanga.

¹⁹Ava dutsonsiyila manungi menu pa dulibana mikundu mimosi o manungi duyagabuga uyemibonga: mionyi miuba mibenyi nesi mibisiana nesi mibakuili yiri Fumu Nsambi enu odugabilanga miula mu bienu biotsu.

²⁰Ava dubinsila mioliva mienu duyamuedukilila mioliva amiusiala mu bitayi: mionyi miuba mibenyi nesi mibisiana nesi mibakuili.

²¹Ava duidokulili milunda mimfuga tsienu duyamuedukilila bisaga abiusialulu muna: bionyi biuba bibenyi nesi bibisianu nesi bibakuili.

²²Dukarangimina yiri jenu wenu dumaleba baviga o Egypte; la dibandu nyiduveyili migaga miemimi, dukamikipanga.