Read Punu Migaga Mimatubula 25 Bible Online

Migaga Mimatubula 25 - Punu bible

Migaga Mimatubula 25

¹Diurungula uba baIsrael babeji bowenda ombu nsonsi uyetabululu bunsonsi: nsonsi owarisa ndunga jimungo ndunga, aguvu na diambu omuvega mbela.

²Pa mbela andi jilasi yiri adimbu, nsonsi omugudiga va tsi nomudimbusu va misu mandi, odimbu dutalu dutsilu aduba dedi na dibi diandi.

³Bayamudimba uviolila magumana matsilu mu mbari pa boviosulila umudimba duilasi yiri amalensu nenu.

⁴Duyagandisa ngombi uji ava erokili tsangu.

⁵Ava baana bataji botsaninanga va mosi na umosi va gari ogu ofu tsiri usila baana, mugatsi umfumbi ayawelana na basusu nesi muenyi tumba nsaji andi omuwela, oba mugatsi andi mu mbari avu nsaji andi.

⁶Tsomi ogu olugu diina dimfumbi taji andi yiri diina diandi digotsiemuga va gari baIsrael.

⁷Pa dibaala dieni agerondi uwela nsaji andi mugetu owenda o dikotulu dimusiengi ombu bivunda uyevosa rie: Nsaji andi, agerondi ubialila diina dimuana nguji andi o Israel, agerondi ukwela na musuga ubunsaji.

⁸Bivunda bimusiengi bomunengila na bovosa nandi. Pa ewarisi kingu andi na evosi rie: Ngerondi umuwela,

⁹mbana nsaji andi okueka bebeli nandi va misu mabivunda omuvula duvondu duandi na omufuta mateji o yinsi. Mbana ovosa rie: Anana dibaala adiubusa ukelisa ndagu muana nguji andi olabila.

¹⁰O Israel ndagu andi jiunengulungu agumavula duvondu.

¹¹Diurungula uba yiri babaala bodimbasana na mugatsi udibaala dimosi owamusa mulumi andi nomupatula oyimudimbi. Pa ogaanga dibaala dieni mu bilema biyisonyi,

¹²dukatabula mugetu dikaka, duyamuiasa yingeba ne pesu.

¹³Duyaba na minongu mibeji mibipitsulu o komi tsienu, diwendi rie: ayivu yitsira na ayivu yilenga.

¹⁴Duyaba na minongu mibeji mibietsu o mandagu menu, diwendi rie: Ayivu yineni na ayivu yigeyi.

¹⁵Duba na bipitsulu na bietsu abivu bisungama. Mbana dubuesu bilumbu o bulongu abu Fumu Nsambi enu oduvega.

¹⁶Mutu uotsu oyikelisi bietsu biminongu na minongu evayi dibi na mutu eni avu nsoruru va gusu Fumu Nsambi enu.

¹⁷Rangiminanu adi Amalec amaduvayila ava dumabila mu nsila ava dumapalila o Egypte.

¹⁸Asamaduma Nsambi, amayedutumuna mu nsila jiotsu, amadusutusu o nsima ava amagaangila botsu abesiti o nsima.

¹⁹Kabogu ava Fumu Nsambi enu odu wakila kalala ombu bavinitsi benu na oduvega duvotsu o bulongu abu oduvega disiala abuba abuenu, dukatsiemusa diina diAmalec. Duyadilibana!