Read Punu Migaga Mimatubula 26 Bible Online

Migaga Mimatubula 26 - Punu bible

Migaga Mimatubula 26

¹Ava dutolila o bulongu abu Fumu Nsambi enu oduvega disiala, ava dubudilila noyetsana guna,

²dukabonga biumanga bimilunda miotsu ami dudilila o bulongu abu Fumu Nsambi oduvega. Dukamipodula mu yievi mbana dukawenda o mbura aji Fumu Nsambi enu osola ukelasa ombu genu.

³Dukakelasa ombu muvagulitsi upagu agusala vana temu eni na dukamutsingula rie: Namunyi tuitubuli ombu Fumu Nsambi etu yiri tumatola o bulongu abu Fumu amavangana uvega bataji betu.

⁴Muvagulitsi upagu owaka yievi na oyisunsa va gusu yinyensulu yipagu yiFumu Nsambi enu.

⁵Dukamuevosa va gusu Fumu Nsambi enu rie: Taji etu amaba muisi Aram na yilayilayi; amawenda o Egypte na mua pesu batu na amayetsana guna. Aguna amakaluyila bulongu buneni abumaba na mangolu maneni na amafuna tindi ufuna.

⁶Bisi Egypte bamatukuananga na bamatutsoyisanga na bamatukotisa o buviga.

⁷Tumagamuyila Fumu Nsambi bataji betu. Fumu amagulu mufi metu na amalaba purulu tsietu na mukilu etu na maguga metu.

⁸Tsia Fumu amatupalisa o Egypte na mangolu mandi ava amaiasila bimaga bigoma na bilimba na tindi bimaga.

⁹Amatuwendisa te na mbura eni na amatuvega bulongu buebubu, diwendi rie: Bulongu abuvu na tindi digumba.

¹⁰Fumu, namunyi tuibeyi biumanga bimilunda ami gumatuvega! Dukabiviosa va gusu Fumu Nsambi enu nomukutimina.

¹¹Mbana dulaba nsangu va mosi na bisi Levi na benyi aboba va gari enu wandi mu diambu dimaboti motsu ama Fumu Nsambi enu amaduvega na bisi ndagu enu.

¹²Yilima ayimurieru yiuba yilima yiyimosi mu digumi. Kabogu dunomana ugusula yimosi mu digumi abina duvega ombu bisi Levi na benyi na bisiana na bakuili abetsani nenu, bojanganga te na bogukurungu.

¹³Dukavosa va gusu Fumu Nsambi enu rie: Tumagusula abimavagulu pagu o mandagu metu na tumabivega ombu bisi Levi na benyi na bisiana na bakuili nana gumaturumina. Tusamasumuna nesi ulibana ne dirumadiagu dimosi.

¹⁴Tusamaji bima bieni ava tumalabila munyongu, tusamatsiemusa ne dimosi usalisa adivu nsoruru na tusamavega ne yimosi uyitsa bakosi; tumadedila diufi diNsambi etu, tumavaga nana gumaturumina.

¹⁵Tugengili ava guvu va yitsiga yiagu yibunsambi o julu, gabila batu bagu baIsrael miula na bulongu abu gumatuvega wandi nana gumavanginina na bataji betu, bulongu abuvu na tindi digumba.

¹⁶Namunyi Fumu Nsambi enu edurumi ukipanga migaga na maruma; dukamakelisanga na mirima mienu miotsu na matasa menu motsu.

¹⁷Namunyi dumavanganga pangini na Fumu yiri obanganga Nsambi enu pa dudedila diufi diandi, nokelisanga migaga miandi na maruma mandi na malongi mandi.

¹⁸Dumavangana na Fumu yiri duba batu bandi, abandi badurondu, na dukelisanga maruma mandi motsu.

¹⁹Dingensa Fumu Nsambi erondi yiri duba dilongu ditega va gari malongu motsu ama amasunda. Erondi uduvega buneni na diduma na bundumba jenu duba bulongu abumawakusu ombu Fumu Nsambi enu nana amaledutsingulila.