Read Punu Migaga Mimatubula 28 Bible Online

Migaga Mimatubula 28 - Punu bible

Migaga Mimatubula 28

¹Pa duidedili diufi diFumu Nsambi enu ava duikelisili nokipanga migaga miotsu ami nyiduveyi namunyi, Fumu Nsambi enu oduvaga batu baneni va gari bisi malongu motsu.

²Guluanu miula miotsu ami dudila ava dudedilanga diufi diFumu Nsambi enu:

³Dugabulu miula o misiengi na dugabulu miula o musiru.

⁴Nesi baana benu nesi bivaru bienu nesi bangombi nesi bindombu nesi binsabi; bima bienu biotsu biugabulu miula.

⁵Ponsi tsienu na bidu bienu na miusu mienu biugabulu miula.

⁶Dugabulu miula ava duitolili na dugabulu miula ava duisoyimini.

⁷Fumu oduvega ndunga ava dutoyila na bavinitsi benu; jogu bopala nsila jimosi uyidutoyisa tumba bopansiga mu yisambuali yimansila udurina.

⁸Fumu odufunisila bisuegulu bienu na obuejisa bisalu bienu: odugabila miula o bulongu abu Fumu Nsambi enu oduvega.

⁹Va gusu Fumu duba tindi aba Nsambi nana amavanginina nenu, ava dukelisilanga maruma maFumu Nsambi enu nodedilanga duganu duandi.

¹⁰Batu botsu bolaba yiri dumakevega usalila Fumu Nsambi enu mbana boduduma.

¹¹Fumu oduviosulila biotsu ava ofunisila nesi baana nesi migamba nesi biguji o bulongu abu Fumu amavangana na baiaji benu uduvega.

¹²Fumu odudibulila bungunu buandi buboti abuvu o julu nonoyisila bulongu buenu mfula va temu tsiwelimina nofunisa bisalu bienu biotsu. Gusombisa bisi malongu mapuela tumba jenu dugosomba.

¹³Fumu oduvayila yinama yigusu tsiri yinsima; dubanganga aberumi tsiri aberumu, ava dudedilanga maruma maFumu Nsambi enu ama nyiduveyi namunyi na ava dumakelisilanga nomakipanga,

¹⁴na duyasumuna nesi dimosi nesi disusu dimaruma motsu ama nyiduveyi namunyi ukota o muyitsa ubansambi bangana nobayitsanga.

¹⁵Tumba pa dugodedila diufi diFumu Nsambi enu na pa dugokelisa nokipanga maruma mandi motsu na migaga miandi miotsu abi nyiduveyi namunyi kabogu milogu miotsu ami dulogu amimi:

¹⁶Dulogu o misiengi na dulogu o musiru.

¹⁷Ponsi tsienu na bidu bienu na miusu biulogu. Bima bieni biotsu biulogu.

¹⁸Nesi baana nesi bivaru nesi bangombi nesi bindombu nesi binsabi.

¹⁹Dulogu ava dutolila na dulogu ava dusoyimina.

²⁰Fumu odusingisa milogu na maguga na kindu na bisalu biotsu abi dusalanga te na dubungu nesi te na dugotamba nofu mu diambu dimbivulu tsienu atsimadurombisa ubusa Fumu.

²¹Fumu odunamusu yivunga te na yiudusielasana o bulongu abuba abuenu.

²²Fumu odunamusu mivita na mabagu na masieyi na mbabisila na dungosu dunsala na yikuna na unengana na bivunga bieni biotsu biudunama te na dutsiemuga.

²³Julu jiuba nderi kunga na butamba buba nderi budilu.

²⁴Fumu odunoyisila mfula o bulongu bueni jidifufundu na fula; jiudunogulu te na dufu.

²⁵Fumu osingisa bavinitsi benu udubokisa; duvioyila nsila jimosi uyebatoyisa tumba dupansiyila yisambuali yimansila ubarina; duba yisanunu yibisi butamba buotsu.

²⁶Mfumbi tsienu tsiuligu na batsoli na bibulu; vagoba mutu ubabinga.

²⁷Fumu odunamusa masieyi maEgypte na muvugu na yigasa na magoga abigorungula ubeluga.

²⁸Fumu oduvaga malagu na bidunga na batumbalagu;

²⁹nesi muangulu duyenabembatananga ava duiwendili nderi yidunga o tsi pisama. Bisalu bienu biotsu biugabuganga mansinsima. Dubusungu bilumbu biotsu na dukindungu na vagoba mutu uduwamusa.

³⁰Dukuma bagetu na babaala basusu bofubana bitsiga nogu. Durunga mandagu na jenu beni dugomatsanina. Duvarisa manungi na dugodokula milunda.

³¹Bangombi benu boboku va misu menu na jenu beni dugobaji; baburu benu bogaangu va misu menu na bagodugabusila bonyi; bindombu bienu biuvegu ombu bavinitsi benu na vagoruga mutu uyiduwamusa.

³²Baana benu bababaala na babagetu bokotusu o buviga; dubalabilila. Bilumbu biotsu duba na tindi nsala ogu tumba dugorungula ubalaba.

³³Batu aba dusamalejaba bojanganga biguji bienu nesi bienu biotsu na yilumbu na yilumbu dukambusungu nadulasungu maguga.

³⁴Dukaluga malagu ava dulabila puela mambu memama.

³⁵Fumu odunamusu masieyi mu makotulu na mu mabelu amagorungula ubeluga, odunamusu monyi ubandila o tsi ditambi te no julu muru.

³⁶Fumu odubega, jenu na kaga enu aji dusola o bulongu abusakajabunu nesi nenu nesi na bataji benu. Aguna duyeyitsa bansambi bangana bamuiri nesi bamamanyi.

³⁷Mbura tsiotsu atsi Fumu odubega durangumunu kwaku na dudesungu na dupejungu.

³⁸Dubeganga bivaru bipuela o manungi menu tumba dudilanga yika mua pesu digumba mu mbari makokoku modijanganga.

³⁹Duvaranga mamfuga na dumatsonsiganga tumba dugonu malamu na dugodokula milunda mimonyi mu mbari batsiega bomaji.

⁴⁰Dudila mioliva mu bulongu buenu buotsu; tumba dugogama matsi mu mbari mioliva miugoluga.

⁴¹Duburanga baana bababaala na babagetu tumba bagoba abenu mu mbari bobegu baviga.

⁴²Bibungi biubunga miri mienu miotsu na milunda mienu miotsu.

⁴³Benyi abotsananga nenu bodurumanga na jenu duba tindi basalitsi bogu.

⁴⁴Jogu bodusomba tumba bagodusombisa. Jogu boba va gusu, jenu duba va nsima.

⁴⁵Maguga mamilogu mieni miotsu modubemba na modudukanga te na dufu mu mbari dusamadedila diufi diFumu Nsambi enu na dusamadedila maruma mandi na migaga miandi abi amaduvega.

⁴⁶Maguga memama modugolulu jenu na bategula benu te na mutubu.

⁴⁷Dusamasalila Fumu Nsambi enu na nsangu na mirima misunda ava dumabila na tindi digumba dibima biotsu,

⁴⁸kabogu Fumu odusingisa usalila bavinitsi benu na nsala nesi puila nesi penyi nesi digambu dibima biotsu. Bodunangusa yilala yibudilu te na bodubokisa.

⁴⁹Fumu oruma bisi bulongu aborambuyila tindi vala uyitoga nenu; borambuyila tindi o masuka mabulongu, bodusutisa nana mbira esutisili.

⁵⁰Bavu batu aba dugogulusunu, bavu na bukanyi abagoyitsa nesi yinunu na bagolasa baana yingeba.

⁵¹Bojanganga mivogulu mienu mibangombi na digumba dienu te na jenu botsu duboku; bagodusila nesi tsangu tsible nesi malamu mamienga nesi matsi nesi bangombi nesi bindombu nesi binsabi: jenu botsu dutsiemuga.

⁵²Bodukanda o misiengi mienu miotsu te na bivaga bienu biuberuga nesi bisakama na biwara abi dumavayilanga yitu yiari na yiari; bodukanda yiari na yiari o bulongu abu Fumu Nsambi enu oduvega.

⁵³Va temu aji bavinitsi benu bodutsoyisanga dujanganga musonyi ubaana benu bababaala na babagetu aba Fumu Nsambi enu amaduvega.

⁵⁴Dibaala adimaleba na tindi yingeba na murima udeda ovina muana taji andi nesi mugatsi andi nesi baana bandi;

⁵⁵agogabila ne umosi musonyi ubaana bandi agu ojanganga; agoba na biguji bisusu, temu eni jiuba jimaguga na jimunyongu; bavinitsi benu bodutsoyisanga o misiengi mienu.

⁵⁶Mugetu aguvu na tindi yingeba nesi murima udeda nesi yisagumunu ovina mulumi andi nesi muana andi udibaala nesi umugetu;

⁵⁷agogabila kueba andi nesi muana agu abanobura abi ojanganga o musuega; va temu eni aji bavinitsi benu bodutsoyisanga.

⁵⁸Kelisanganu na kipanganu mambu motsu mamigaga amimasonugu mu dibuku diedidi; dumanu Fumu Nsambi enu aguvu na diina diduyitsu na diduma.

⁵⁹Pa dugovaga motsu mana Fumu odudimbisa jenu na bategula benu na odunamusu mapura maranga nodubokisanga na maali maranga na mayibenda.

⁶⁰Odubeyila bivunga biotsu biEgypte, bionyi biudulasa goma te na duregama; na biudunama.

⁶¹Munongu mosi Fumu odutindila minongu na minongu mimaali na mapura amasamarangunu mu dibuku dimigaga te na dubungu.

⁶²Diuleba dumafunanga ne uviolila bambuelili dusiala yika mua dutalu dugeyi mu mbari dusamadedila diufi diFumu Nsambi enu.

⁶³Diuleba Fumu amalaba ubueji uduvayilanga maboti nodufunisanga, jabanu dedi mosi olaba ubueji nodubokisa nodubunga; dugomuekota o bulongu bueni abu mbe dudila.

⁶⁴Fumu odupansa yiari na yiari o malongu motsu te na masuka mabutamba. Aguna duyitsilanga bansambi bangana aba jenu na bataji benu dusamalejaba, diwendi rie: bakosi bamiri na bamamanyi.

⁶⁵Dugoba sui o malongu meni na dugoba na mbura jiuvumina. Fumu obukisa mirima mienu na misu menu moba timbila na otsirisa mirima mienu.

⁶⁶Duba na mirima o julu mu nsanunu tsienu tsiotsu; nyangu na mukolu dubanganga na goma na dugoba na mirima misunda.

⁶⁷Mu diambu digoma ajiubasa mirima mienu na motsu ama dulaba, kedi duvosa rie: Aa mbe tuvu tsisiga! Ava tsisiga duvosa rie: Aa mbe tuvu kedi!

⁶⁸Fumu odugabusa o Egypte mu makumbi mamamba oduviosila mu nsila aji nyimadutsingula rie: Dugomuejilaba. Aguna dubila na nsala ukesumbisa baviga ombu bavinitsi benu nesi bagetu nesi babaala; tumba vagoba mutu udusumba.

⁶⁹Guluanu nana Moise amarumunu na Fumu uwarisa pangini andi na baIsrael o bulongu buMoab. (Pangini ejiji jigaa jimosi na ajimavangunu o mukongu uHoreb.)