Read Punu Migaga Mimatubula 3 Bible Online

Migaga Mimatubula 3 - Punu bible

Migaga Mimatubula 3

¹Tumageluga na tumavioyila mu nsila jiBachan. Og, kaga jiBachan amatubengusana na bagora bandi botsu uyetutoyisa o Edrei.

²Fumu amansingula rie: Duyamulaba goma; nyimamuwakisa ombu genu, jandi na bagora bandi botsu, na bulongu buandi: dukamuvayila nana dumavayila Sihon, kaga jiAmor agumatsananga o Hechebon.

³Fumu Nsambi etu amatuwakisa Og, kaga jiBachan na bagora bandi botsu, tumababelisa na tusamapatusa ne mutu andi mosi.

⁴Kabogu tumabonga misiengi miandi miotsu; vasamaba ne umosi agusamabetsu: magumasiamunu mamisiengi miyiari yiArgob ayivu bufumu buOg o Bachan.

⁵Misiengi mieni miotsu mimaba mikandu bivaga bisakama abimaba na biabutsu abimagomunu mandilu.

⁶Va julu vana bamaba misiengi misusu mipuela amisamakandu. Tumamibunga tindi ubunga nana tumavayila miSihon, kaga jiHechebon; tumabungatindi ubunga misiengi miotsu nesi babaala nesi bagetu nesi baana.

⁷Tumakinda yika biruitsi na bisusu abi tumabola o misiengi.

⁸Anana dimabila va temu eni tumakinda bakaga botsu babeji baAmor bulongu abuvu o disimu dina diJourdain ubandila o mujamba ugeyi aguinengulungu Amon te no mukongu uHermon.

⁹(Bisi Sidon bamaluga mukongu eni Sirion na bisi Amor bamaguluga Senir.)

¹⁰Tumakinda misiengi miotsu mikumu na Galaad na Bachan te na Salka na Edrei misiengi mibufumu buOg o Bachan.

¹¹(Og, kaga jiBachan amasiala pinsa mu mukuta uRefaim. Tangi andi, tangi jibudilu, jigaa o Rabba o musiengi ubaAmmon? Usakama ujionyi umaba metera jina na yibuku na uroga ujionyi umaba metera beji, jimawetsugu na yietsu yitemu eni.)

¹²Kabogu tumabonga bulongu bueni. Nyimavega baRuben na baGad bulongu ubandila o Aroer o mujamba ugeyi uAmon na yiasi yimukongu uGalaad na misiengi miandi.

¹³Nyimavega yiari yimosi yiyifumba yiManasse yiasi yisusu yiGalaad na Bachan, diwendi rie: bufumu bugulu buOg. (Diina disusu diyiari yiotsu yiArgob na Bachan jiotsu dimaba bulongu buRefaim.

¹⁴Yair muana dibaala uManasse amabonga yiari yiotsu yiArgob te no mandilu maGuechourie na Maakatie na amaluga misiengi miBachan diina diandi; te na namunyi minengulungu misiengi miYair.)

¹⁵Nyimavega Makir muana dibaala uManasse Galaad.

¹⁶Ombu baRuben na baGad nyimabavega ubandila va mugula uGalaad te no mujamba ugeyi aguinengulungu Amon agumaba mandilu te no mujamba ugeyi aguinengulungu Yabboc, amana la mandilu mabaAmmon.

¹⁷Nyimamuebavega kumu ajitoli te no mujamba uJourdain ubandila o yiliba yiGenesareth te no Mubu uKali o banda mukongu uPisga o yiari ayi wisi epalili.

¹⁸Vana temu eni nyimaduveyila diruma diedidi rie: Fumu Nsambi enu amaduvega bulongu buebubu yiri buba abuenu. Jenu bagora botsu durela na bitogulu usabuga mujamba uJourdain va gusu baIsrael basusu.

¹⁹Bagatsi benu buandi na baana benu na migamba mienu (nyijabi yiri duna migamba mineni) biusiala o misiengi ami nyimaduvega.

²⁰Ava Fumu oveyila baana bataji benu yivumu nana amaduveyila na jogu wogu bodila bulongu abu Fumu Nsambi enu obavega o disimu dina diJourdain, mbana dugabuga mutu mutu o disiala adi nyimaduvega.

²¹Vana temu eni nyimaveyila maruma ombu Josue na nyimavosa nandi rie: Gumalaba motsu ama Fumu Nsambi enu amavayila bakaga babeji baAmmon. Anana Fumu ovayila bakaga babufumu buotsu abu ndeʼ gutoyisa.

²²Duyabaduma mu mbari Fumu Nsambi, jaʼ beni odutoyila.

²³Va temu eni nyimasambilila Fumu dusambu duedudu rie:

²⁴Fumu Nsambi ami gundasa buneni buagu na mangolu magu. Vagaa Nsambi aguvu dedi nagu o julu nesi va butamba agurungula usala bisalu abivu dedi na abi guisalingi.

²⁵Kokolu tsiagu, nsingisi uvioga o disimu dina diJourdain uyelaba bulongu bueni buboti noyelaba mikongu mieni miboti na miLiban.

²⁶Mu diambu dienu Fumu amandioyila tindi kabu te na asamagaru tumba amandiangila rie: Vana dedi! Guyamuevosa diambu diedina nami.

²⁷Mata o julu mukongu uPisga, buaga misu o yiari ayi wisi ewendisini, nobanda, notandu no yiari ayi wisi epalili, nolabilila na misu magu: jaba rie: Gugosabuga Jourdain!

²⁸Lonsa Josue nomuwarisa tindi umuwarisa. Jandi osabuga mujamba uJourdain va gusu batu bebaba nobadilisa bulongu abu gulabilila.

²⁹Kabogu tumatsana o yibususu va nsungisini na Bet-Peor.