Read Punu Migaga Mimatubula 31 Bible Online

Migaga Mimatubula 31 - Punu bible

Migaga Mimatubula 31

¹Moise amamuetsingula baIsrael mambu memama rie:

²Namunyi nyina kama na magumabeji mabilima, nyisaa na mitogu na va julu vana Fumu amansingula rie: Ndeʼ gugosabuga Jourdain.

³Fumu Nsambi enu owendanga jaʼ beni va gusu enu na odubokila abetsani o disimu dina yiri dudila malongu mogu. Josue owendanga va gusu enu nana Fumu amavosila.

⁴Fumu ovayila malongu meni dedi mosi nana amavayila Sihon na Og, bakaga baAmor aba amabunga na malongu mogu wandi.

⁵Fumu obawakisa ombu genu dukabavayila dedi mosi nana nyimadurumina.

⁶Duyaregama na duyakambulu! Duyalaba goma, sunsanu mirima; mu mbari Fumu Nsambi enu owendanga nenu agodulibana via, na agodusila pinsa.

⁷Moise amanengila Josue na amamutsingula va misu mabaIsrael botsu rie: Guyaregama na guyakambulu mu mbari gutolisa batu bebaba o bulongu abu Fumu amavangana uvega bataji bogu. La ndeju agubadilisa buonyi.

⁸Fumu jaʼ beni owendanga va gusu agu, jaʼ beni obanganga nagu na agogulibana via, na agogusila pinsa, guyalaba keri, sunsa murima.

⁹Moise amasona migaga miemimi na amamiwakisa bisi Levi abamaba bavagulitsi bapagu, abamanangulanga yigara yipangini yiFumu nesi ombu bivunda biotsu biIsrael.

¹⁰Moise amabavega diruma diedidi rie: Kadi yilima yimusambuali va temu jidujegusu na jiduyitsu diwendi rie: feta masamba,

¹¹ava baIsrael botsu bokelasila va gusu Fumu Nsambi enu va mbura aji osola, ndeʼ gukaranga migaga miemimi va gusu baIsrael botsu.

¹²Gukagukiga batu, diwendi rie: nesi babaala nesi bagetu nesi bangebi nesi benyi aboba nenu yiri jogu botsu bogulu na bowiji uduma Fumu Nsambi enu ukelisanga nodedilanga mambu motsu mamigaga mieni.

¹³Baana bogu abagomijaba bomigulu na bowiji uduma Fumu Nsambi enu, temu jiotsu aji dutsaninanga o bulongu abuba abuenu o disimu dina diJourdain.

¹⁴Fumu amatsingula Moise rie: Gtilu temu aji gufuila jika bebeli. Nengila Josue, wendanu o Ndagu Yibenguna. Nyumuvega maruma mami. Moise na Josue bamawenda o Ndagu Yibenguna.

¹⁵Fumu amalabana o ndagu va gari dimungi; dimungi dieni dimasikama va dikotulu diNdagu.

¹⁶Fumu amatsingula Moise rie: Gulu namapapa gufu. Batu bebaba bokebivisa nokota o muyitsa ubansambi bangana babulongu abu bewendi. Bondiyila nsima na bokubula pangini ami aji nyimavangana nogu.

¹⁷Muna yilumbu yieni nyubanyoyila tindi kabu. Nyubaliyila nsima te na ngomuebakipa. Bolabanga tindi maguga maminongu na minongu te na bokewivula rie: Mbe Nsambi aji netu mbe tulaba maguga mamunongu egugu?

¹⁸Ngomuebakipa muna yilumbu yieni mu diambu dimabi ama bamavaga ava bamayitsila bansambi bangana.

¹⁹Tsie sonianu duimbu duedudu. Dulonsianu baIsrael yiri boduwimbilanga na duonyi duba bumbeji buami va gari ogu.

²⁰Mu mbari nyubega batu bebaba o bulongu abu nyimavangana uvega bataji bogu abuvu na tindi digumba; bojanganga te na bogukurungu nesi uvonga; mbana boyitsanga bansambi bangana nobasalilanga bondensanga nobunsanga pangini ami:

²¹mbana ava bolabila maguga mamunongu na munongu, duimbu duedudu adugorungula ulibunu adu bowimbilanga duba nderi mbeji jibatu bebaba. Nyijabi nana batu bebaba bavu ne mbe basakakota o bulongu abu nyimavangana pangini ubavega.

²²Muna yilumbu yieni Moise amasona duimbu duFumu na amadulonsa baIsrael.

²³Fumu amavega maruma memama ombu Josue muana dibaala uNoun. Amavosa rie: Guyaregama na guyakambulu, la ndeju agutolisa baIsrael o bulongu abu nyimavangana ubavega; meʼ beni nyubanganga nagu.

²⁴Moise anomana usona mambu mamigaga mieni mu dibuku,

²⁵amavega bisi Levi abamanangulanga yigara yipangini yiFumu diruma diedidi rie:

²⁶Bonganu dibuku diedidi dimigaga miNsambi nodisunsa va mugula uyigara yipangini yiFumu Nsambi enu, dionyi diuba vana nderi mbeji enu.

²⁷Nyijabi bumbini buenu na ugala umirima mienu. Pa duilasi Fumu bumbini buenu ava nyikivu nenu, tsie dubila ava nyufuila?

²⁸Bengusananu bivunda biotsu bibifumba bienu na bibagora va gusu ami; nyuvosa mambu maduimbu duFumu va misu mogu nesi va misu mabisi julu nesi mabisi butamba.

²⁹Nyijabi yiri nyinofu dukebivisa na dupembuga nsila aji nyimadulonsa: te na dibi diududala ava duvayila amagaa mawelimina va gusu Fumu umunyoyisa na bisalu bienu.

³⁰Moise amatubula mambu motsu maduimbu duedudu va misu madibuli diotsu dibaIsrael.