Read Punu Migaga Mimatubula 33 Bible Online

Migaga Mimatubula 33 - Punu bible

Migaga Mimatubula 33

¹Guluanu miula ami Moise, mutu Nsambi amagabila baIsrael ne akafu. Amavosa rie:

²Fumu amarambuyila o Sinai Amakelasa o Seir bundumba buandi bumalulila o mukongu uParan. Bivevi biandi bibiansa bimalabana wandi, gogu andi umabaala umalabana nderi muji agumalula.

³Nyiina, Fumu erondi batu bandi; ekelisi abandi botsu abetsani va makulu mandi ugulu malongi mandi.

⁴Moise amatuvega migaga amivu disiala dibategula baJacob!

⁵Fumu amasolu uba kaga jiIsrael, ava bivunda bamabengunina na bifumba biIsrael.

⁶Mbana Moise amabuela rie: Ruben abangingi monyu, batu bandi bafuningi!

⁷Mu diambu dibategula baJuda Moise amavosa rie: Fumu! Guluati diufi diJuda bagabusi ombu batu bandi. Babi na tindi mangolu; ndeʼ beni gukabawamusa na bavinitsi bogu.

⁸Mu diambu dibategula baLevi Moise amavosa rie: Thummim na Urim bimawakusu ombu bisi Levi, batu bagu aba gumaweliga o Massa aba gumatabulila bunsonsi o Meriba.

⁹Bisi Levi bamaguronda tindi uronda uviolila bataji na banguji bogu, nesi baana banguji bogu nesi baana bogu la dibandu bamadedila diruma diagu; anana bamalasila duyitsu du pangini agu.

¹⁰Bisi Levi balonsi baIsrael maruma magu na migaga miagu. Bavaguli bima bimbunga jiboti va gusu agu; na pagu tsiunyensa va yinyensulu yiagu yipagu.

¹¹Fumu bagabili mangolu magona na gabila bisalu biogu miula! Tsiemusa mangolu mabavinitsi bogu yiri magomuelabana!

¹²Mu diambu dibategula baBenjamin Moise amavosa rie: Yifumba yimurima uFumu abetsaningi sui bebeli na Nsambi ogu; ebabambingi yilumbu na yilumbu, etsaningi va gari ogu.

¹³Mu diambu dibategula baJoseph Moise amavosa rie: Bulongu buogu bugabulu miula miFumu; bubi na disala na mamba mabileka;

¹⁴nyangu jibendisi bivaru, tsungi na tsungi digumba digona;

¹⁵adiviolili magumba motsu mamikongu na mabikundubuga.

¹⁶Maboti mabutamba na biotsu abivu muna mabi nogu. Maboti maNsambi agumalabana mu yivala mabi na baJoseph mu mbari jandi amaba sefu jibaana bataji bandi.

¹⁷Bundumba ombu Joseph! Mangoiu mandi mavu nderi mamulumi ngombi! Nderi mangolu mapasa! Ana masiyi mabeji unonga batu botsu nobasindila te no masuka mabutamba! Adina divu bivevi biEfraim, na disusu divu bivevi biManasse.

¹⁸Mu diambu dibategula baIssakar na baZabulon Moise amavosa rie: Jenu baZabulon, labanu nsangu ava duilingili na muteti enu. Jenu baIssakar, banu sui o mandagu menu mamatsanda!

¹⁹Dugegengilanga batu o julu mukongu uvagulilanga pagu tsiunyensa. Dubanganga na busina bumiubu busina abumasuegu mu yisieyi.

²⁰Mu diambu dibategula baGad Moise amavosa rie: Miula mibi na jandi oyiveyi baGad bulongu buneni! Yifumba yiGad yivu nderi yimbungu ayimanisili nyama jiotsu.

²¹Gad amakesolila bulongu buboti, nesi dikabu diwelimina na sefu. Amabanganga murumitsi ubasefu; amadugusulu baIsrael duganu duFumu na maruma mandi.

²²Mu diambu dibategula baDan Moise amavosa rie: Yifumba yiDan yivu nderi mumfumfu yimbungu ayipalili o Bachan.

²³Mu diambu dibategula baNeftali Moise amavosa rie: BaNeftali batopulu maboti, miula miotsu miFumu mivu nogu. Babi bafumu babanda na tandu!

²⁴Mu diambu dibategula baAsser Moise amavosa rie: BaAsser babi na miula va gari baIsrael. Baana bataji bogu bolabanga ubueji nogu! Matsi mogu mabi mapuela mapuela!

²⁵Mibindugu mibibaga biogu miuba mimadilu na mibakunga, mangolu mogu mabi dedi na bilumbu biogu!

²⁶Mbana Moise amabuesa rie: BaIsrael, vagaa nsambi aguibagunu na Nsambi Israel, esunduyi o julu tsiotsu na bundumba buandi va gari mamungi uyiduwamusa.

²⁷Nsambi mutubu ava yisuemunu, o tsi miogu miandi uvu divumunu dimutubu. Amadubingila bavinitsi na amaduruma rie: Babokianu.

²⁸BaIsrael betsarimgi sui va mbura tsiogu, bategula baJacob bavu va jogu mbura o bulongu abuvu na ble na mienga julu tsibaborumusili disala.

²⁹Ka muna ubueji gu uvu na baIsrael! Banyi bavu nana jenu? Batu abamagobulu na Fumu! Avu ngubu ajidugayingi na dijenga dingungulu enu! Bavinitsi benu bokevongula va gusu enu; dutsiarila mbura tsiogu tsiduyitsu!