Read Punu Jean 1 Bible Online

Jean 1 - Punu bible

Jean 1

¹Ne Nsambi akasunda bulongu vamaba mutu diina diandi Diambu na Diambu dimaba na Nsambi na Diambu dieni dimaba Nsambi.

²Kabogu Diambu dimaba vana dibandu na Nsambi.

³Bima biotsu bimasundu nandi na vagaa ne yimosi mu abimasundu ayisamasundu nandi.

⁴Mu dionyi mumaba monyu na monyu eni umalasa batu yijalala.

⁵Yijalala yibangingi mu pisama na pisama jigoyitsimisa, via!

⁶Vamalabana mutu agumasindugu na Nsambi: diina diandi Jean.

⁷Amaruga uba mbeji uvosa bumbeji buyijalala yiri botsu boyivayila yitu.

⁸Asamaba yijalala tumba amalabana uvosa bumbeji buyijalala.

⁹Yijalala yieni yimaba tindi yijalala; ava yimaruyila mu bulongu yimamonitsa batu botsu.

¹⁰Diambu dimaba mu bulongu na Nsambi amadisalisa ava amasundila bulongu diuleba bulongu busamadijaba.

¹¹Dimaruga ombu abandi na abandi basamadidila.

¹²Tumba ombu botsu abamadidila ombu jogu abamavayila diina diandi yitu jandi amabavega musuga uba baana baNsambi.

¹³Bamaburu tsiri na malungu nesi na duganu dumusonyi vo na duganu dumutu tumba na duganu duNsambi agumaba Taji ogu.

¹⁴Diambu dimaburu mutu agumatsananga va gari etu agumaba ubasa de na maboti na ngensa na bundumba. Bundumba bueni bumaba abu Muana divingu amadila ombu Taji.

¹⁵Jean amasingisila bumbeji na amagamuga rie: La jandi agu nyimavosila rie: Jandi oyiruyi o nsima ami amateyila mu mbari jandi amateyila uba.

¹⁶Jetu botsu tumadila dikabu dibusina buandi diwendi rie: amatugagabila miula.

¹⁷Mugaga uNsambi umavegu na Moise tumba maboti maNsambi na ngensa bimavegu na Jesus Christ.

¹⁸Mutu asadkalaba Nsambi. Tumba Muana divingu avu Nsambi aguitsaningi na Taji la jandi agumamujabisa.

¹⁹Abubu bumbeji buJean ava baJuif baJerusalem bamasindiyila bivunda bibavagulitsi bapagu na baana baLevi umuwivula rie: Ndeju la nyi?

²⁰Asamabusa uwagula tumba amasinga va gusu botsu rie: Ngaa Christ.

²¹Bamamuwivula rie: Kabogu yika tsie? Ndeju la Elie? Amawagula rie: Ngaa Elie. Bamamuwivula rie: Ndeju la mubiyitsi? Amabagabusila rie: Nesi.

²²Mbana bamamuwivula rie: Ndeju la nyi? Tuirondi uwagula jogu abatsitusindiga. Mbe ka ndeʼ yi guivosi?

²³Jean amawagula rie: Menu la Diufi dijandi oyigamuyi o kumu rie: Futsanu nsila Fumu! (Mubiyitsi Esaie agumadivosa.)

²⁴Va gari bilumbi abimasindugu ombu Jean bamosi bamaba baJuif abamaba baPharisie.

²⁵Bamamuemuwivula yivu yieyiyi rie: Kabogu dibandu yi guibatisili pa gugaa Christ vo Elie vo mubiyitsi?

²⁶Jean amabagabusila rie: Menu nyibatisi mu mamba tumba va gari enu va mutu agu jenu dugejabi.

²⁷Eruyi va nsima ami na nyisawelimina ne unyangula mikudu mibapondu bandi.

²⁸Motsu mana mamavagulu o Bethanie o disimu dina diJourdain agu Jean amabatisilanga.

²⁹Ava kedi Jean amalabilila Jesus uruga eruyi ombu gandi na amavosa rie: Labanu Muana Yindombu yiNsambi aguigusuli masumu mabisi bulongu.

³⁰La jandi agu nyimavosila rie: Va nsima ami veruyi mutu agumateyila mu mbari jandi amateyila uba.

³¹Nyisamalemujaba tumba nyimaruga uyibatisa na mamba nomujabisa ombu baIsrael.

³²Mbana Jean amasingisila bumbeji buebubu rie: Nyimalaba Yinyunyi ava amasunduyila o julu nana dibembi na amasikama ombu gandi.

³³Nyisamalemujaba tumba Nsambi agumansindiga ubatisa na mamba, jandi guria amansingula rie: Gulaba Yinyunyi aguiruyili ombu Nsambi ava osunduyila nosikama ombu mutu; la jandi agubatisa na Yinyunyi yiNsambi.

³⁴Nyimalaba na nyimasingisila bumbeji yiri jandi aji MuanaNsambi.

³⁵Ava kedi Jean mbe akivu vana na badukitsi bandi babeji

³⁶ava amalabilila Jesus uvioga evioyi amavosa rie: Labanu Muana Yindombu yiNsambi.

³⁷Badukitsi babeji baJean bamagulu adi evosi na bamaduka Jesus.

³⁸Jesus amageluga na anobalaba amabawivula rie: Yi duirombi? Bamamugabusila rie: Rabbi (divindugulu rie: mulonsi) agunyi guitsanini?

³⁹Amabatsingula rie: Ruganu uyilaba. Bamamuduka na jogu botsu bamatsana nandi. (Bamatola ava tsisiga.)

⁴⁰Andre muananguji Simon Pierre amaba umosi va gari babeji abamagulu mambu maJean na abamaduka Jesus.

⁴¹La jandi agumabenguna tetega na muana nguji andi Simon na amamutsingula rie: Jetu tumaiaba Messie (divindugulu rie: Christ).

⁴²Amamubega ombu Jesus. Jesus anomugengila amavosa rie: Ndeʼ la Simon muana uJean; gunengulungu Cephas (divindugulu rie: dimanyi).

⁴³Ava kedi Jesus amaronda uwenda o Galilee na amabenguna na Philippe. Amamutsingula rie: Nduki!

⁴⁴(Philippe amaba muisi Bethsaida musiengi uAndre na Pierre.)

⁴⁵Philippe amabenguna na Nathanael na amamutsingula rie: Jetu tumalaba jandi agu Moise amasonina mu mugaga na agu babiyitsi bamabiyila. Jandi la Jesus muana Joseph agumaruyila o Nazareth.

⁴⁶Nathanael amamuwivula rie: Diboti diurungula upalila oNazareth? Philippe amawagula rie: Ruga yilaba.

⁴⁷Jesus anolaba Nathanael uruga eruyi ombu gandi amavosa rie: Labanu tindi muisi Israel, ndunsulu tsigaa nandi, via!

⁴⁸Nathanael amamuwivula rie: Agunyi gumanjabila? Jesus amamugabusila rie: Ne Philippe akagunengila ava gubetsili va tsi mumanga, nsigulaba.

⁴⁹Nathanael amamugabusila rie: Mulonsi ndeju la Muana Nsambi, ndeju la kaga jiIsrael.

⁵⁰Jesus amamugabusila rie: Guipayili yitu mu mbari nsigutsingula nsigulaba va tsi mumanga? O gusu gulaba mambu ameviolili diambu diedidi.

⁵¹Amabuela rie: Dingensa dulaba julu jiudibuga na biansa biumatanga nosunduganga ombu Muana Mutu.