Read Punu Jean 11 Bible Online

Jean 11 - Punu bible

Jean 11

¹Vamaba dibaala adimabela, diina diandi Lazare. Jogu na Marie na muana nguji ogu Marthe bamatsananga o Bethanie.

²(Marie eni ajimagotsa Fumu muyombu na amamufienyi makulu na nanga tsiandi; omabela muana nguji andi Lazare.)

³Bibusi biandi bamasindiga mutu uyetsingula Jesus rie: Fumu, mbatsi agu ubela ebeli.

⁴Jesus anogulu dionyi amavosa rie: Buali buLazare bugomuboka; buonyi bumalabana ulasa bundumba buNsambi na mu buonyi Muana Nsambi ododusu.

⁵Jesus amarondanga Marthe na yibusi yiandi na Lazare.

⁶Kabogu ava amagululu yiri Lazare ubela ebeli amabuesa utsana bilumbu bibeji va mbura aji amaba

⁷mbana amatsingula badukitsi bandi rie: Tugabusilianu o yiari yiJudee.

⁸Badukitsi bamamuwagula rie: Mulonsi, baJuif bamaleronda uguboka ne nana guirondi umuegabusila o Judee?

⁹Jesus amabawivula rie: Yilumbu yigaa na digumi na maweru mabeji? Pa mutu elingi nyangu ageduku dibaku mu mbari yijalala yivu.

¹⁰Tumba pa mutu elingi o tsi pisama eduku dibaku mu mbari yijalala yigatsi.

¹¹Jesus anomana uvosa nana amabatsingula rie: Mbatsi etu Lazare aka yilu tumba nyiwendi umurambusa.

¹²Badukitsi bamamugabusila rie: Fumu pa aji yilu kabogu obeluga.

¹³Jesus amabatubulila mfuanga tumba bamagulu yiri aji yilu.

¹⁴Mbana Jesus amabatsingula na buranga rie: Lazare amafu.

¹⁵Mu diambu dienu nyilabi ubueji mu mbari ngaabetsi vana yiri yitu yienu yiuwara. Tʼwendianu ombu gandi.

¹⁶Thomas (ajimanengulungu divasa) amavosa na badukitsi basusu rie: Tʼwendianu yiri tufuanu na Mulonsi.

¹⁷Jesus anotola amarasuna yiri Lazare aka bilumbu bina o ngila.

¹⁸Nana Bethanie jimaba yika kilumetera yirieru na Jerusalem

¹⁹baJuif bapuela bamawenda ombu Marthe na Marie uyelila muana nguji ogu.

²⁰Ava Marthe amagululu yiri Jesus aka bebeli amawenda umubengusana tumba Marie asamamuduka.

²¹Marthe amatsingula Jesus rie: Fumu mbe ndeʼ gubetsi vava muana nguji ami mbe agaafu.

²²Tumba nesi nana nyijabi yiri motsu ama ndeʼ guwivula Nsambi, Nsambi ogusingisa monyi.

²³Jesus amamutsingula rie: Muana nguji agu orambuga.

²⁴Marthe amamugabusila rie: Nyijabi yiri jandi orambuga mu yilumbu yinsimunina.

²⁵Jesus amamutsingula rie: Menu ladurambugu na monyu. Jandi oyipayili yitu odila monyu nesi amafu;

²⁶na uotsu aguvu monyu na epayili yitu agofu, via! Guidivayili yitu?

²⁷Amamugabusila rie: Nyiina, Fumu nyina yitu yiri ndeʼ la Christ Muana Nsambi agumaruga o bulongu.

²⁸Banomana uvosa nana Marthe amayenengila muana nguji andi Marie o musuega nomutsingula rie: Wagula Mulonsi.

²⁹Yika Marie egulu nana amamuwagula mbangu.

³⁰(Mu mbari mbe Jesus asakakota o dimbu akivu o mbura aji Marthe amamubengunina.)

³¹BaJuif abamalilanga na Marie o ndagu banomulaba upala epali, bamamuduka. Bamavosa rie: O ngila ewendi uyelila.

³²Ava Marie amatolila va mbura aji Jesus amaba amagudama va gusu andi novosa rie: Fumu mbe gubetsi vava mbe muana nguji ami agaafu.

³³Jesus anolaba jandi na baJuif abamaruga nandi ulila belili amatsukama.

³⁴Amawivula rie: Agunyi dumamubuaga? Bamamugabusila rie: Fumu ruga yilaba.

³⁵Jesus amalila.

³⁶Mu dionyi baJuif bamavosa rie: Labatianu nana atsimurondilanga.

³⁷Bamosi bamawivula rie: Tsia jandi omatiemusa yidunga? Asamarungula ugandisa dufu duLazare?

³⁸Jesus amamuetsukama mbana amawenda o ngila. Jimaba dilima adimadibugu na dimanyi.

³⁹Jesus amavosa rie: Gusulanu dimanyi. Marthe yibusi yimfumbi amavosa rie: Fumu aka mbunga; aka bilumbu bina o ngila.

⁴⁰Jesus amamuwivula rie: Ngaalegutsingula yiri pa guna yitu gulaba mangolu maNsambi.

⁴¹La dibandu bamagusulila dimanyi. Jesus anogengila o julu amavosa rie: Tata nyigugabusili diboti mu mbari duikulu.

⁴²Nyijabi yiri guikulungu temu tsiotsu tumba nsivosa nana mu diambu dibatu abavu nami yiri bojaba rie: Gumansindiga.

⁴³Anomana uvosa nana amagamuga rie: Lazare, pala!

⁴⁴Mfumbi jimapala, makulu na miogu bitungu na yinsi yipietu na tsanda. Jesus amabatsingularie: Munyangulianu na mudundianu, awendingi.

⁴⁵BaJuif bapuela abamaduka Marie banolaba adi Jesus amavaga, bamamuvayila yitu.

⁴⁶Tumba basusu bamawenda ombu baJuif abamaba baPharisie na bamabatsingula adi Jesus amavaga.

⁴⁷Mbana bivunda bibavagulitsi bapagu na baPharisie bamanengila botsu o yibenguna yiogu na bamawivusana rie: Yi tuvaga? Mu mbari dibaala diedidi evayi bimaga bipuela.

⁴⁸Pa tumudunda yiri avayingi botsu bomuvayila yitu na bisi Rome boruga uyipansa Ndagu Nsambi etu nesi dilongu dietu.

⁴⁹Caiphe, umosi va gari ogu agumaba yivunda yibavagulitsi bapagu yilima yieni amabatsingula rie: Dugegulu ne diambu dimosi.

⁵⁰Digaa diviolila ubueji yiri mutu mosi buandi afiiili batu yiri botsu bagobungana?

⁵¹(Kabogu asamavosa dionyi mu jaʼ beni. Amadivosa mu mbari amaba yivunda yibavagulitsi bapagu yilima yieni na amabiga yiri Jesus akifuiia baJuif

⁵²na abandi botsu basusu na yiri ogukiga va mbura mosi abandi abamapansiga yiari na yiari.)

⁵³Murta yilumbu yieni bivunda bibaJuif bamatabula diambu umuboka.

⁵⁴La dibandu Jesus asamamuekelasanga va gari baJuif tumba amarina o kumu o musiengi aguinengulu Efraim na amayetsana na badukitsi bandi.

⁵⁵Feta Paque jimaba bebeli. Batu bapuela bamawendanga o Jerusalem uyedugusungu migaga miogu mimuyitsa ne Paque jikatola.

⁵⁶Bamarombanga Jesus na bamawivusananga o Ndagu Nsambi rie: Yi duitasi? Oruga o feta vo agoruga?

⁵⁷Kabogu bivunda bibavagulitsi bapagu na baPharisie bamavosa rie: Pa mutu ejabi agu Jesus avu, adivosi yiri tumugaanga.